Moskvada vokalçıların qarşıdakı M.Maqomayev adına Beynəlxalq müsabiqəsinə həsr edilmiş mətbuat konfransı olmuşdur

 

 Vokalçıların Müslüm Maqomayev adına 2-ci Beynəlxalq müsabiqəsi ərəfəsində "Metropol" hotelinin konfrans salonunda müsabiqənin münsiflər heyətinin sədri, SSRİ xalq artisti Tamara Sinyavskayanın və M.Maqomayev adına Fondun təsisçisi Araz Ağalarovun mətbuat konfransı keçirilmişdir. Mətbuat konfransında həmçinin tanınmış Azərbaycan bəstəkarı və müğənnisi, müsabiqədə xüsusi dəvət olunmuş qonaq kimi çıxış edəcək EMİN də iştirak etmişdir.

Tamara Sinyavskaya jurnalistlərə müsabiqəyə hazırlığın son mərhələsindən danışaraq bildirmişdir ki, müsabiqə oktyabrın 20-21-də Moskvanın ən böyük konsert zalında - Müslüm Maqomayevin adını daşıyan "Krokus Siti Holl"da olacaqdır. O bildirmişdir ki, bu il müsabiqədə 10 ölkədən - Rusiya, Azərbaycan, Belarus, Gürcüstan, Almaniya, Koreya Xalq Demokratik Respublikası, Monqolustan, ABŞ, Özbəkistan və Ukraynadan 18 ifaçı iştirak edəcəkdir. T.Sinyavskaya demişdir: "Müsabiqə həm də ona görə unikal xarakter daşıyacaq ki, burada vokalçılar öz istedad və bacarıqlarını həm klassik, həm də estrada repertuarının ifasında göstərəcəklər. Bundan başqa, müsabiqəçilərin ifa edəcəyi proqram təkrar olunmayacaq. Birinci gün vokalçılar opera və estrada əsərlərini, ikinci gün isə SSRİ xalq artisti Müslüm Maqomayevin repertuarından əsərlər ifa edəcəklər".

Araz Ağalarov bildirmişdir ki, müsabiqədə iştirak etmək üçün cəmi 230 ərizə verilmişdi, son dərəcə ciddi seçim olmuşdur. Bu seçim çox gözəl vokal göstəriciləri olan layiqli ifaçıları aşkara çıxarmışdır. O demişdir: "Müsabiqə maraqlı olacaq, çünki bərabər imkanlar şəraitində ən yaxşı ifaçı qalib gələcəkdir".

Bu il müsabiqənin münsiflər heyətinə Rusiya, Azərbaycan, İtaliya və Latviyadan görkəmli incəsənət xadimləri, musiqiçilər daxil olmuşlar. Onların arasında SSRİ-nin və Azərbaycanın xalq artisti, Bakı Musiqi Akademiyasının rektoru Fərhad Bədəlbəyli də vardır.

 

 

Asya HACIZADƏ,

AzərTAc-ın xüsusi müxbiri

Moskva

 

Azərbaycan.-2012.- 18 oktyabr.- S.5.