Azərbaycanda İxracın və İnvestisiyaların Təşviqi Fondu ilə Bosniya və Herseqovinanın Xarici Ticarət Palatası arasında əməkdaşlığa dair Anlaşma Memorandumu imzalanmışdır

Bosniya və Herseqovinanın Rəyasət Heyətinin Sədri Bakir İzetbeqoviçin Azərbaycana rəsmi səfəri

Oktyabrın 18-də Bakı Biznes Mərkəzində Azərbaycan-Bosniya və Herseqovina biznes forumu çərçivəsində Azərbaycanda İxracın və İnvestisiyaların Təşviqi Fondu ilə Bosniya və Herseqovinanın Xarici Ticarət Palatası arasında əməkdaşlığa dair Anlaşma Memorandumu imzalanmışdır.

Azərbaycanın iqtisadi inkişaf naziri Şahin Mustafayev çıxış edərək, iş adamları arasında əlaqələrin qurulması üçün əlverişli şəraitin olduğunu, ölkəmizlə Bosniya və Herseqovinanın siyasi əlaqələrinin inkişaf etdiyini və bu məsələdə yüksək səviyyəli dövlət rəsmilərinin qarşılıqlı səfərlərinin mühüm rol oynadığını vurğulamışdır. Nazir Bosniya və Herseqovinanın Rəyasət Heyətinin Sədri Bakir İzetbeqoviçin Azərbaycana səfərinin də əməkdaşlığın inkişafına töhfə verəcəyini qeyd etmişdir.

Nazir Şahin Mustafayev bugünkü biznes forumun yeni əməkdaşlıq əlaqələrinin yaranmasına müsbət təsir göstərəcəyini bildirmişdir.

Bosniya və Herseqovinanın Rəyasət Heyətinin Sədri Bakir İzetbeqoviç Azərbaycana səfər çərçivəsində keçirdiyi görüşlərdən danışmış, respublikamızın dinamik iqtisadi inkişafından məmnunluğunu ifadə etmiş, Bosniya və Herseqovinanın Azərbaycan ilə əlaqələrin genişləndirilməsinə böyük önəm verdiyini, iki ölkə arasında əməkdaşlığın inkişaf etdiyini vurğulamış, biznes forumun və işgüzar görüşlərin iş adamları üçün əhəmiyyətli rol oynadığını demişdir.

Ölkəsinin böyük iqtisadi potensiala, əlverişli biznes və investisiya mühitinə malik olduğunu bildirən Bakir İzetbeqoviç azərbaycanlı iş adamlarını fəal əməkdaşlığa dəvət etmişdir. Bugünkü tədbirin ölkələrimiz arasındakı böyük potensialdan səmərəli istifadə olunması üçün mühüm rol oynayacağını söyləyən Bosniya və Herseqovinanın rəhbəri demişdir: "Əməkdaşlığımız inkişaf etməkdədir və ümidvaram ki, digər sektorlarla da əlaqələrimiz dərinləşəcəkdir.

AzərTAc

Azərbaycan.-2012.- 19 oktyabr.- S.4.