İngiltərənin nüfuzlu «Halı» jurnalında Azərbaycanın xalça sənətindən bəhs edən geniş məqalə dərc olunmuşdur

İngiltərənin nüfuzlu "Halı" jurnalının 173-cü nömrəsində Azərbaycan haqqında geniş məqalə dərc olunmuşdur. Yazıda Azərbaycanda xalça sənətinin tarixinin çox-çox qədimlərə gedib çıxdığı bildirilir.

Məqalədə ölkəmizdə fəaliyyət göstərən "Azərilmə" Məhdud Məsuliyyətli Cəmiyyətinin "Sehrli ilmələr" qalereyası barədə ətraflı məlumat verilmiş, bu qalereyanın dünyadakı bir çox xalça mərkəzlərindən fərqləndiyi vurğulanmışdır. Bildirilmişdir ki, Azərbaycanda fəaliyyət göstərən "Sehrli ilmələr" qalereyasının fərqliliyi xalçanın hazırlanma prosesinin bütövlükdə bir mərkəzdə cəm olunmasıdır. Hazırda "Azərilmə"də rəssamların, sənətşünasların, xalçaçıların, boyaqçıların və digər mütəxəssislərin də çalışdığı vurğulanmışdır.

Məqalədə burada toxunan xalçaların beynəlxalq aləmdə də layiqli qiymətini aldığı bildirilmiş, Azərbaycanın xalça sənətinin tarixindən bəhs edən kitablar haqqında geniş məlumat verilmişdir.

Azərbaycan.-2012.- 19 oktyabr.- S.11.