Reymsdə Azərbaycanla bağlı sərgi açılmış və konsert təşkil olunmuşdur

Azərbaycanın birinci xanımı Mehriban Əliyeva tədbirlərdə iştirak etmişdir

Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə yeni layihə həyata keçirilir. Azərbaycan mədəniyyətinin təbliği məqsədilə Fransanın regionlarında mədəniyyət tədbirlərinin keçirilməsinə başlanmışdır. İlk belə tədbir oktyabrın 19-da Reymsdə baş tutmuşdur.

Azərbaycanın birinci xanımı, Heydər Əliyev Fondunun prezidenti Mehriban Əliyeva bununla bağlı tədbirlərdə iştirak etmişdir.

Reyms Fransanın ən qədim şəhərlərindən biridir. Memarlıq quruluşu ilə daha çox diqqəti çəkən bu şəhərdə bir çox tarixi hadisələr baş vermişdir. Ona görə də 300 min əhalisi və Şampan-Arden regionunun ən böyük şəhəri olan Reymsi Fransa tarixinin beşiyi də adlandırırlar. Ona görə də Azərbaycan mədəniyyətinin təbliği baxımından Fransa regionları arasında ilk olaraq Reymsin seçilməsi heç də təsadüfi deyildir. Bununla bağlı əvvəlcədən şəhərin müxtəlif küçələrində, ictimai nəqliyyat vasitələrinin üzərində tədbirlərlə bağlı elanların, afişaların vurulması bütövlükdə ölkəmizə olan marağı daha da artırmışdı.

Oktyabrın 19-da Azərbaycanın birinci xanımı, Heydər Əliyev Fondunun prezidenti Mehriban Əliyevanın Reyms şəhərinin meri xanım Adelin Hazan ilə görüşü olmuşdur.

Mehriban xanım Əliyeva Reymsdə Azərbaycan ilə bağlı mədəniyyət tədbirlərinin keçirilməsinə verdiyi dəstəyə görə şəhər merinə təşəkkürünü bildirmiş, bu cür tədbirlərin gələcəkdə Fransanın bir çox şəhərlərində baş tutacağını diqqətə çatdırmışdır.

Adelin Hazan da Azərbaycan mədəniyyətinin təbliğinə yönələn tədbirlərin maraqla qarşılandığını vurğulamış, budəfəki sərgi və konsertin də yüksək səviyyədə keçəcəyinə ümidvar olduğunu qeyd etmişdir.

Mehriban xanım Əliyeva meriyanın fəxri qonaqlar kitabına ürək sözlərini yazmış və xatirə şəkli çəkdirmişdir.

Reymsə səfəri çərçivəsində Azərbaycanın birinci xanımı şəhərin tarixi məkanları ilə tanış olmuşdur. Əvvəlcə Reyms Katedralına gələn Mehriban xanım Əliyevaya məlumat verilmişdir ki, Fransa memarlığının şah əsərlərindən olan bu kilsənin ötən il 800 illik yubileyi qeyd edilmişdir. V əsrdə təməli qoyulan kilsənin ərazisi lX-X əsrlərdə genişləndirilmişdir. Müharibələr vaxtı dağıdılan kilsə 1481-ci ildə bərpa olunmuş və hazırkı vəziyyətinə gətirilmişdir. Birinci Dünya müharibəsi illərində yenidən böyük zərər görən kilsə memar Anri Denonun layihəsi əsasında bərpa olunduqdan sonra 1938-ci ildə istifadəyə verilmişdir. Reyms Katedralının tarixi əhəmiyyətini artıran mühüm faktlardan biri də 1962-ci ildə Almaniya ilə Fransa arasında barışıq müqaviləsinin kansler Adenauer və Prezident Şarl de Qoll tərəfindən burada imzalanmasıdır. Digər mühüm məqam X-XVlll əsrlər boyu bütün Fransa krallarının tacqoyma mərasimlərinin bu kilsədə təşkil olunması ilə bağlıdır. Nadir memarlıq quruluşu və əzəməti ilə diqqət çəkən kilsə orijinal vitrajları ilə də məşhurdur, elə buna görə də uzun illərdir turistlər buraya böyük maraq göstərir.

Daha sonra Mehriban xanım Əliyeva Reyms Bazilik kilsəsində olmuşdur. Bu kilsə də Fransa memarlığının incilərindən hesab olunur. Xl-Xlll əsrlərdə tikilən Bazilik kilsəsi tarixi əhəmiyyətinə görə də diqqəti cəlb edir. Memarlığın müxtəlif kombinasiyalarının yüksək səviyyədə təcəssüm tapdığı bu tarixi abidə də Birinci Dünya müharibəsi illərində böyük dağıntılara məruz qalmış, sonralar yenidən bərpa olunmuşdur. Xüsusi akustikası ilə seçilən Bazilik kilsəsi dini mərasimlərin ən çox keçirildiyi yerdir və burada istifadə olunan memarlıq texnologiyaları müasir günümüzdə də aktuallığını itirməmişdir.

Oktyabrın 19-da Reymsdə "Qafqazın mirvarisi olan Azərbaycanın mədəni dəyərləri" sərgisinin açılış mərasimi olmuşdur.

Açılış mərasimində çıxış edən Azərbaycanın birinci xanımı Mehriban Əliyeva bu cür tədbirlərin Reymslə yanaşı, Fransanın daha on şəhərində keçiriləcəyini diqqətə çatdırmışdır. "Bu sərgi ölkələrimiz arasındakı dostluğa və qarşılıqlı hörmətə töhfə verəcəkdir" - deyən Mehriban Əliyeva bildirmişdir ki, gənc müstəqil ölkə olan Azərbaycan qədim tarixə, zəngin mədəniyyətə sahibdir və hər zaman Şərq ilə Qərb arasında körpü olan ölkəmiz müsəlman aləmində mütərəqqi nailiyyətlərə imza atmışdır. Bu sırada 1918-ci ildə müsəlman Şərqində ilk demokratik respublikanın qurulması, qadınlara səsvermə hüququnun verilməsi, qızlar üçün məktəbin açılması, opera və baletin yazılması kimi mühüm hadisələr vardır.

"Azərbaycan-Fransa əməkdaşlığı təqdirəlayiqdir. Biz Azərbaycanın mədəni zənginliyinə böyük ehtiram bəsləyirik".

Bu sözləri isə Reyms şəhərinin meri xanım Adelin Hazan demişdir. O, Azərbaycan ilə Reyms arasında mədəni və iqtisadi əməkdaşlığın inkişaf edəcəyinə ümidvar olduğunu vurğulamışdır.

Sərgidə ölkəmizin qədim və zəngin tarixinə, mədəniyyətinə dair eksponatlar nümayiş etdirilmişdir. Azərbaycan xalçaları buradakı ekspozisiyanın ən qiymətli inciləri sırasında idi. Milli xalçaçılığımızın bütün istiqamətlərinin təmsil olunduğu sərgidə yaşı yüz illərlə ölçülən xalça və xalça məmulatlarının geniş çeşidi təqdim olunmuşdur. Xalq incəsənətinin bütün istiqamətlərinə dair nümunələrin, misgərlik məmulatlarının, şəbəkələrin, Azərbaycan milli geyimlərinin, milli musiqi alətlərimizin təqdim edildiyi sərgidə Heydər Əliyev Fondunun xətti ilə nəşr olunan və ölkəmizin təbliğinə xidmət edən kitab və bukletlər, fransız dilində nəşr olunan ədəbiyyat toplusu da maraqla qarşılanmışdır.

Oktyabrın 19-da axşam Reyms Konservatoriyasında xalq artisti Teymur Göyçayevin dirijorluğu ilə Qara Qarayev adına Azərbaycan Dövlət Kamera Orkestrinin konserti olmuşdur. Bu konsert ölkəmizin həm milli dəyərlərə, həm də müasir meyillərə eyni dərəcədə hörmətlə yanaşdığını nümayiş etdirmişdir. Tamaşaçılar isə bu vəhdəti milli musiqimizin maraqlı interpretasiyalarında hiss etmişlər. Əslində, bu mədəniyyət tədbiri Reymsdə əsl hadisəyə çevrilməklə Azərbaycan mədəniyyətinin Avropa tamaşaçısına bir ərməğanı olmuşdur. Janr müxtəlifliyinin, zəngin improvizasiyaların bol olduğu bu konsert proqramı diqqəti bir daha Azərbaycana yönəltmişdir. Bu gecədən təəssüratlar kifayət qədər zəngin olmuş və özünəməxsus ovqatı ilə seçilən Azərbaycan mədəniyyətinə hörmətin nümunəsinə, həm də Reyms tamaşaçısında heç vaxt unudulmayacaq xatirəyə çevrilmişdir.

Sonra Azərbaycanın birinci xanımı Mehriban Əliyevanın adından ziyafət verilmişdir.

Əsgər ƏLİYEV,

AzərTAc-ın xüsusi müxbiri

Reyms

Azərbaycan.-2012.- 21 oktyabr.- S. 2.