Gecələri çıraqban, gündüzləri al-əlvan

Mingəçevir ölkəmizin qədim yaşayış məskənlərindəndir. Ərazidə aparılan arxeoloji tapıntılar nəticəsində təsdiq edilmişdir ki, Mingəçevirin 4 min ildən çox yaşı var. Tarixi İpək yolunun buradan keçdiyi bir çox elmi mənbələrdə təsdiqini tapmışdır. Müasir Mingəçevirin təməli isə ötən əsrin ortalarında qoyulmuş, o vaxtdan Kür çayı üzərində su elektrik stansiyasının tikintisinə və yaşayış qəsəbəsinin salınmasına başlanmışdır. 11 noyabr 1948-ci ildə isə bu qəsəbəyə şəhər statusu verilmişdir.

Ötən illər ərzində sürətlə inkişaf edən Mingəçevir indi ölkənin ən gözəl şəhərləri sırasında yer alır. Boz dağa söykənən, ana Kürün ayna sularında güzgülənən bu yaraşıqlı şəhər bütün zamanlarda şairlərimizin tərənnüm obyektinə çevrilmişdir. Mingəçevir təkcə gözəlliyi ilə diqqət mərkəzində yer almır. Bu gün respublikanın elektrik enerjisinə olan ehtiyacının çox hissəsi məhz bu şəhərin hesabına ödənilir. Gerçək bir enerji flaqmanı olan Mingəçevir ölkə iqtisadiyyatının yüksəlişində əvəzedilməz rola malikdir. Ulu öndər Heydər Əliyev Mingəçevir haqqında demişdir: "Mingəçevirin tikilməsində, qurulmasında, inkişaf etməsində vaxtilə mən çox zəhmət çəkmişəm. İndi mən buraya gəlib bu hündür binaları, gözəl küçələri, gözəl yaşıllıqları görəndə sevinirəm. Çünki 30 il bundan öncə mən Azərbaycana rəhbərliyə başlayarkən biz Azərbaycanın hər yerində quruculuq işləri aparırdıq. Ancaq Mingəçevir gənc şəhər olduğuna görə, energetiklər şəhəri olduğuna görə buraya xüsusi fikir verirdik".

Heydər Əliyev hələ o dövrdə böyük uzaqgörənliklə Azərbaycanın enerji asılılığından xilas olması yolları üzərində düşünür, müstəqilliyimizə hesablanan arzularını əzmlə həyata keçirirdi. Bütün Qafqazın enerji nəhəngi olan istilik-elektrik stansiyasının qonşu Gürcüstan, yaxud Ermənistana deyil, Azərbaycana, daha konkret desək, Mingəçevirə salınması məhz ümummilli lider Heydər Əliyevin tarixi xidmətlərindəndir...

Bütün dövrlərdə tikilməsinə, qurulmasına böyük önəm verilən Mingəçevirdə bu gün özgə büsat var. Bu yerin havası təmiz, suyu saf olduğu qədər də adamları səmimi, mehriban, işgüzar, qayğıkeş və qədirbiləndir. Əhalinin həyat şəraitini daha da yaxşılaşdırmaq üçün şəhər rəhbərliyinin qəbul etdiyi hər qərar, həyata keçirdiyi hər tədbir böyük razılıqla, hədsiz minnətdarlıqla qarşılanır. Son vaxtlar nur şəhəri intibah dövrünü yaşayır. Müasir dövrün tələblərinə uyğun olaraq energetiklər şəhəri yüksək zövqlə abadlaşdırılır, genişmiqyaslı təmir-tikinti, quruculuq işləri aparılır. Nur şəhərini ikiyə bölən ana Kürün sahillərində aparılan abadlıq işləri daha çox diqqət çəkir. Şəhər əhalisinin sevimli istirahət yeri olan Sahil parkının yenidən qurulması artıq başa çatmaq üzrədir. Parkın əvvəlki quruluşunda adamları narahat edən bir çox problemlər aradan qaldırılmışdır. Uzun illərdən bəri burada fəaliyyət göstərən çoxsaylı ictimai iaşə obyektləri hər kəsdə narahatlıq yaradırdı. Addımbaşı kabab manqallarından qalxan tüstü bütün sahil boyu yayılır, parka istirahətə gələnlərin narazılığına səbəb olurdu. Onillər boyu davam edən bu acınacaqlı vəziyyəti düzəltməyə isə şəhər rəhbərliyi məhəl qoymurdu. Yeni rəhbərlik isə əhalidən gələn təkliflərə, müraciətlərə ciddi reaksiya verərək Sahil parkının yenidən qurulmasına ilk tədbirlər sırasında başladı. Yöndəmsiz, primitiv iaşə obyektləri sökülüb götürüldü. Əlbəttə, sahibkarların fəaliyyətini davam etdirməsi üçün başqa münasib yerlərdə şərait yaradıldı. Böyük bir həvəslə qurulan park isə yeni görkəm alıb şəhərin gözəlliyində göz oxşayan naxışa çevrildi. Sahil parkında yeni qurulan işıqlandırma sistemi gecələr bu yerlərə xüsusi görkəm verir. Ayna sularda sayrışan işıqlar elə təsir oyadır ki, sanki göylərin ətək-ətək ulduzları tökülüb ana Kürün sinəsinə. Yeni inşa edilən fəvvarələr isti yay axşamlarının bürküsündə ətrafa sərinlik yayır. Ərazisi 3 hektara yaxın olan parkda çox sayda yaraşıqlı oturacaq qoyulub. Yaşıllıqlar boyu uzanan səkilərə gözəl daşlar düzülüb. Burada diqqəti daha çox çəkən cəhət odur ki, hər iş yüksək zövqlə görülür.

Nur şəhərində aparılan abadlıq, quruculuq işlərinin miqyası kifayət qədər böyükdür. Bayraq meydanının inşasında işlər sürətlə davam etdirilir. Şəhərin Xaldan tərəfdən girişində salınan meydan üçün 1 hektara yaxın ərazi ayrılmışdır. Hündürlüyü 42 metrə çatacaq müstəqil dövlətimizin rəmzi olan üçrəngli bayrağımız şəhərin hər yerindən aydın görünəcəkdir.

Şəhərdə Heydər Əliyev Mərkəzi və "Gənclər evi"nin tikintisi zərbəçi ahənglə davam etdirilir. Heydər Əliyev prospektində yeni işıqlandırma sistemi qurulur. Burada yaşıllıq sahəsi genişləndirilir, yeni ağaclar, gül-çiçək kolları əkilir. Şəhərdə turizmin inkişafı üçün zəruri tədbirlər görülməkdədir. Kürün sağ sahilində dördulduzlu hotelin inşasında son tamamlama işləri aparılır. Əlbəttə, müasir standartlara cavab verəcək bu yaraşıqlı hotelin fəaliyyətə başlaması daha çox turist qəbul etməyə və onlara nümunəvi xidmətin təşkilinə geniş imkanlar açacaqdır.

Mingəçevir Şəhər İcra Hakimiyyətinin başçısı Niyazi Bayramovun dedikləri:

- Hələ görüləsi işlərimiz çoxdur. Respublika Prezidenti İlham Əliyevin biz məmurlardan əsas tələbi, tapşırıq və tövsiyələri ondan ibarətdir ki, adamların firavan həyatını təmin edək, hər vasitə ilə onların həyat şəraitini yaxşılaşdırmağa nail olaq. Təbii ki, biz öz fəaliyyətimizi bu aydın istiqamətdə qururuq. Çalışırıq ki, qəbul etdiyimiz hər qərar, həyata keçirdiyimiz hər tədbir şəhər əhalisinin ürəyincə olsun. Bunun üçün əhali ilə tez-tez görüşlər keçirir, verilən hər təklifə, edilən hər müraciətə qayğı ilə, həssaslıqla yanaşırıq. Noyabrın 11-də "Şəhər günü" keçirməyə hazırlaşırıq. Çalışacağıq ki, bu, əsl el şənliyinə çevrilsin.

Niyazi Bayramov söhbətində yeni layihələrdən də söhbət açdı. Dedi ki, DRES qəsəbəsində yeni park salmağı qərara almışıq. Bunun üçün yer də artıq müəyyənləşib. "Dostluq parkı" isə tamamilə yenidən qurulacaqdır. Zümrüd libaslı parklar, xiyabanlar göz oxşayır. Ürəkdə xoş duyğular oyanır. Könlümdən keçən bir fikir isə istər-istəməz dilimdə pıçıltıya çevrilir: bu gözəlliyi yaradanlara min alqış!

Lazım QULİYEV

Azərbaycan.-2012.- 23 oktyabr.- S.5.