«Qadın hüquqları üzrə bələdçi» kitabının təqdimatı

Oktyabrın 23-də Ailə, Qadın və Uşaq Problemləri üzrə Dövlət Komitəsi (AQUPDK) Almaniya Beynəlxalq Əməkdaşlıq Cəmiyyəti (GİZ) ilə birlikdə "Qadın hüquqları üzrə bələdçi" kitabının təqdimatını keçirmişdir.

Geniş oxucu kütləsinə ünvanlanan bu nəşr həm hüquqi yardıma ehtiyacı olan qadınlar, həm də gənc hüquq müdafiəçiləri üçün nəzərdə tutulmuşdur. Səkkiz bölmədən ibarət kitabda ailə münasibətlərində qadın hüquqları, qadınların əmək hüquqları, məişət zorakılığı və digər mühüm məsələlər işıqlandırılmışdır.

Oxuculara qadınların ailədə, işdə, cəmiyyətdə üzləşə biləcəkləri müxtəlif situasiyalarda necə hərəkət etməli olduqları izah edilir, qanunvericilikdə nəzərdə tutulmuş hüquqları haqqında onlara hərtərəfli bilgilər verilir.

Azərbaycanda gender bərabərliyi, qadın hüquqlarının müdafiəsi sahəsində görülən işlər barədə məlumat verən AQUPDK-nın sədri Hicran Hüseynova bildirmişdir ki, ölkə həyatında elə bir sahə yoxdur ki, qadınlar orada təmsil olunmasınlar. Son illər qadınların qərar qəbulu səviyyəsində təmsilçiliyi daha da genişlənir, ölkədə sahibkarlıqla məşğul olan qadınların da sayı artır. Həyata keçirilən dövlət proqramlarının tərkibində gender məsələləri mühüm yer tutur.

Komitə sədri qeyd etmişdir ki, qadın hüquqlarının qorunmasında və cəmiyyətə bərabərhüquqlu üzvlər kimi inteqrasiyası sahəsində Azərbaycanın birinci xanımı, Heydər Əliyev Fondunun prezidenti Mehriban Əliyeva mühüm işlər görür. Onun təşəbbüsü ilə qadın hüquqları, gender bərabərliyi haqqında qanunlar qəbul olunmuşdur.

Təqdim olunan kitab haqqında danışan H.Hüseynova demişdir ki, bu nəşr qadınların hüquqi maarifləndirilməsi işinə gözəl töhfədir. Burada ailə münasibətlərində qadın hüquqları, pensiya və sosial münasibətlər, vərəsəlik hüququ, qadınların əmək hüquqları, sahibkarlıq fəaliyyəti, məişət zorakılığı haqqında ətraflı məlumat verilmişdir. Kitabda Azərbaycanda insan hüquqlarını müdafiə edən milli mexanizmlər, qadın hüquqları üzrə fəaliyyət göstərən qeyri-hökumət təşkilatları haqqında materiallar da yer almışdır.

GİZ-in "Cənubi Qafqazda hüquq və məhkəmə islahatlarına dəstək proqramı"nın qrup rəhbəri Şalva Papuaşvili "Qadın hüquqları üzrə bələdçi" kitabının Azərbaycan cəmiyyəti tərəfindən böyük maraqla qarşılanacağına ümidvar olduğunu bildirmişdir. O qeyd etmişdir ki, sadə, oxunaqlı dildə yazılmış kitabda həyati nümunələr verilmişdir. Yeni nəşr əhalinin hüquqi cəhətdən maariflənməsinə köməklik göstərəcəkdir. GİZ Azərbaycanda hüquqi islahatları dəstəkləyir və gələcəkdə də hüquqi mövzulara aid kitabların nəşrinə və hüquqi maarifləndirmə tədbirlərinə dəstək göstəriləcəkdir.

Dövlət qurumlarının və qeyri-hökumət nümayəndələrinin iştirakı ilə keçirilən tədbirdə kitabın əhəmiyyətindən danışılmışdır. Bildirilmişdir ki, qadının öz hüququnu bilməsi onun potensialını reallaşdırmaq imkanını genişləndirir, cəmiyyətə inteqrasiyasını sürətləndirir. "Qadın hüquqları üzrə bələdçi" yaşından asılı olmayaraq, hər bir qadının gündəlik müraciət etdiyi vəsait olacaqdır.

AzərTAc

Azərbaycan.-2012.- 24 oktyabr.- S.4.