AFƏRİN, «NEFTÇİ»!

Azərbaycan klubu ilk dəfə avrokubokların qrup mərhələsində çıxış edəcək

Adamın hələ də inanmağı gəlmir. Sanki möcüzə baş vermişdir. Heç kim Azərbaycan klublarından, o cümlədən "Neftçi"dən belə bir zəfər gözləmirdi. Doğrudur, futbol hər cür nəticəyə açıqdır, bu oyunda sürprizlər heç kimi təəccübləndirmir. Amma o da həqiqətdir ki, futbol kağız üzərində yox, meydanda oynanır, heç bir komandaya qələbə sinidə gətirilmir. "Neftçi" də oynadı və qazandı!

"Neftçi" Kipr torpağında, sözün həqiqi mənasında, tarix yazdı. Komandamız böyük uğura imza atdı. APOEL elə- belə rəqib deyildi. Kiçik bir ölkənin klubunun qitə səviyyəli turnirlərdə göstərdiyi nəticələrə qibtə etməmək olmur. "Neftçi" ilə srağagünkü görüşədək Kipr təmsilçisi avrokuboklarda 136 matç keçirmiş, 45 qələbə qazanmış, 60 dəfə məğlub olmuş, 31 dəfə meydandan heç-heçə ilə ayrılmış, 167 qol vurmuş, 226 qol buraxmışdı. Ötən mövsüm növbəti dəfə UEFA Çempionlar Liqasının qrup mərhələsinə vəsiqə qazanan APOEL-in Avropanın güclü komandaların başına açdığı "oyun"lar, yəqin ki, futbolsevərlərin yadındadır. "Portu" (Portuqaliya), "Zenit" (Rusiya), "Şaxtyor" (Ukrayna) kimi adlı-sanlı rəqiblərini geridə qoyaraq qrupunu lider kimi tamamlayan kiprlilər 1/8 finalda "Lion"la (Fransa) qarşılaşdı və bu səddi də keçdilər. 1/4 finalda isə rəqib heç kim yox, Madrid "Real"ı idi. APOEL-in belə bir futbol nəhəngini məğlub etməsi ağlabatan deyildi. Kiprlilər bu mərhələdə mübarizəni dayandırsalar da, artıq turnirdə sözlərini demişdilər.

Bu cür təcrübəli və formada olan komanda ilə qarşılaşmağı nəinki "Neftçi", heç təmsilçimizdən qat-qat güclü klublar da arzulamazdı. Ancaq nə etmək olar, rəqibi püşk müəyyənləşdirir. Amma onu da nəzərə almaq lazımdır ki, UEFA Avropa Liqasının təsnifat mərhələsinin son turuna gəlib çıxmaq da asan iş deyil. İndiyədək klublarımızdan yalnız "Qarabağ" və "Bakı" 2009/2010 mövsümündə belə bir nəticə göstərmişdi. O vaxt təmsilçilərimizin qrup mərhələsinə gedən yolunu Hollandiyanın "Tvente" və İsveçrənin "Bazel" komandaları kəsmişdi.

Klublarımızdan avroliqanın qrup mərhələsinə düşmək üçün üçüncü cəhdi isə "Neftçi" etdi və bu dəfə alındı! Özü də 3:1 hesablı möhtəşəm qələbə ilə! Özü də rəqib meydanında qalib gəlməklə! İndi dost da, düşmən də etiraf edir ki, "Neftçi"lər bu qələbəyə layiq idilər - nə təsadüfdən danışan var, nə başqa səbəblər axtaran.

Ümumiyyətlə, "Neftçi"nin avrokuboklarda builki çıxışları diqqətəlayiqdir. Ölkə çempionu kimi UEFA Çempionlar Liqasının təsnifat mərhələsinə qatılan "Neftçi" ilk raundda "Zestafoni" (Gürcüstan) ilə qarşılaşdı. İlk matçı evdə keçirən bakılılar rəqibi darmadağın etdilər - 3:0. Cavab görüşündə isə qalib müəyyənləşmədi - 2:2. Etiraf etmək lazımdır ki, gürcü futbolu heç vaxt bizimkindən zəif olmamışdır, elə indi də zəif deyil. Sadəcə olaraq, Bakı klubu güclü idi. Görünür, "Neftçi" "Zestafoni"ni mübarizədən kənarlaşdırmaqla "gizli plan"ını gerçəkləşdirirmiş... Növbəti raundda bakılılar "Hapoel Kryat Şmona" (İsrail) ilə üz-üzə gəldilər. Elə bir oyun üstünlüyü olmayan İsrail çempionu evində keçirdiyi ilk matçda "Neftçi"nin pley-off mərhələsinə çıxmaq şansının üstündən xətt çəkdi. Qapısından dörd cavabsız top buraxan "Neftçi"lərin cavab görüşündə də bir şey edə bilmədi və oyunu heç-heçə (2:2) ilə başa vuraraq Çempionlar Liqasına "əlvida" dedi.

Qaydalara görə, "Neftçi" bundan sonra mübarizəni UEFA Avropa Liqasının pley-off mərhələsində davam etdirməli idi. Bu turnirdə qruplara düşmək üçün cəmi bir maneəni keçmək lazım idi. Rəqib - APOEL isə İsrail klubu ilə müqayisə edilməyəcək dərəcədə güclü və təcrübəli idi.

İlk görüş Bakıda keçirildi. "Neftçi" pis oynamadı. Hesabı da komandamız açdı. Amma qələbəni qoruyub saxlamaq mümkün olmadı; müdafiəçilərin bir anlığa sayıqlığı itirməsi "Neftçi"yə baha başa gəldi. Oyunun gedişini dəyişdirmək üçün göstərilən səylər də nəticəsiz qaldı. Rəqib hesabı qoruyub saxlamağı bacardı.

Cavab görüşünün çətin keçəcəyi şübhə doğurmurdu. Rəqib Bakıda münasib nəticə əldə etmişdi, həm də qol vurmuşdu. "Neftçi"lərin vəziyyəti həqiqətən ağır idi: Nikosiyada mütləq qalib gəlməli, ya da bol qollu heç-heçəyə (2:2, 3:3...) nail olmalı. Bu məqsədə çatmaq isə APOEL kimi rəqib qarşısında ağlabatan görünmürdü. Odur ki, futbol mütəxəssisləri (özü də təkcə onlarmı?) cavab matçının formal xarakter daşıyacağına, "Neftçi"nin adadan əliboş qayıdacağına şübhə etmirdilər. "Neftçi" isə saydığını sayırdı...

Matç televiziya ilə yayımlanmırdı. Yerli telekanallardan heç biri oyuna maraq göstərməmişdi. Onları o qədər də qınamaq olmur; axı kim "Neftçi"nin uğuruna inanırdı ki, onlar da inansınlar? Haradan biləydilər ki, "Neftçi"lər heç kimin bəslənmədiyi ümidləri doğruldacaqlar?

Hamı internet saytlarına "sarılmışdı". Hesab 22-ci dəqiqədə açılır: "Neftçi"nin gənc oyunçusu Cavid İmamverdiyev komandasını irəli çıxarır. 8 dəqiqə sonra hesab dəyişir - Vobay ikinci topu ev sahiblərinin qapısından keçirir. Fasiləyə bir dəqiqə qalmış APOEL-in tunisli legioneri Səlim Ben Aşur hesabda fərqi minimuma endirir.

İkinci hissə başlayır. Kiprli futbolçuların matçda dönüş yaradacağını gözləyirik. 15 dəqiqə keçir və... başqa cür dönüşün şahidi oluruq: "Neftçi" Flavinyonun qolu ilə ev sahiblərini əməlli-başlı şoka salır. Onların nə hala düşdüklərini təsəvvür etmək çətin deyil. 83-cü dəqiqədə Elvin Yunuszadə "qırmızı vərəqə" alır və "Neftçi" azlıqda qalır. Bu da APOEL-ə kömək etmir: hesab dəyişmir ki, dəyişmir. Kiprlilər Azərbaycan komandasına boyun əymək məcburiyyətində qalırlar. "Neftçi" təbrikləri qəbul edir...

Beləcə, futbolumuzun tarixində yeni səhifə açılır. Bu səhifəni yazan futbolçular, məşqçilər, klub idarəçiləri hər cür tərifə layiqdirlər. Eşq olsun!

Dünən Avropa Liqasının qrup mərhələsinin püşkü atılmışdır. Püşkün nəticələrinə görə, "Neftçi" "İnter" (İtaliya), "Rubin" (Rusiya) və "Partizan" (Serbiya) ilə bir qrupa düşmüşdür. Komandamızı bir-birindən maraqlı matçlar gözləyir. Məhz maraqlı! Çünki ilk dəfə klublarımızdan biri bu cür mötəbər turnirə qatılır. İlk dəfə "Neftçi" qitənin güclü klubları ilə qarşılaşacaq. Futbolsevərlər Bakıda bu klubların matçlarını izləmək imkanı əldə edəcəklər. "Neftçi"nin qarşıdakı görüşlərdə hansı nəticələr göstərəcəyinin elə bir əhəmiyyəti yoxdur. Bu turnirə qatılmağın özü hələlik bəsimizdir!

Allahverdi MEHDİYEV

Azərbaycan.- 2012.- 1 sentyabr.- S.8.