Avropalı deputatlar Ramil Səfərovun Azərbaycana qaytarılması ilə bağlı Ermənistanın mövqeyinə etirazlarını bildirirlər

Avropalı deputatlar Ramil Səfərovun Azərbaycana qaytarılması ilə əlaqədar Ermənistanın mövqeyinə kəskin etirazlarını bildirməkdə davam edirlər. Bu dəfə Almaniya Bundestaqının üzvləri rəsmi Yerevanın bu məsələ ilə bağlı tutduğu mövqeyi kəskin pisləmişlər.

Avropa Azərbaycan Cəmiyyətindən verilən məlumata görə, Almaniya Bundestaqının deputatı, Xristian Demokrat Partiyasının üzvü Olav Gutting hesab edir ki, ekstradisiyanın Avropa hüquq müstəvisində qanuniliyinə heç bir şübhə yoxdur. Deputat Ermənistan hökumətini, eləcə də erməni diasporunu Almaniyanın tərəfdaşı olan Macarıstana qarşı tənqid tonunu azaltmağa səsləmişdir.

Almaniya Bundestaqının üzvü vurğulamışdır ki, Ermənistan tərəfinin Macarıstanın beynəlxalq hüququ pozmasına dair iddialarının sadəcə yanlış və əsassız olduğu sübut oluna bilər.

1992-ci ilin fevralında yüzlərlə azərbaycanlının ermənilər tərəfindən qətlə yetirildiyi Xocalıda törədilən qırğından əvvəl azərbaycanlıların ermənilərin dinc əhaliyə ziyan vurmağa qadir olduğuna inanmadığını deyən hazırkı Ermənistan prezidenti Serj Sarkisyanın son vaxtlar səsləndirdiyi bəyanatlar Cənubi Qafqazda sülhə nail olmağa əngəl törədir.

Almaniya Bundestaqının digər üzvü, hakim Xristian Demokrat İttifaqı/Xristian-Sosial İttifaqı parlament fraksiyasının xarici siyasət komitəsinin sözçüsü Filipp Misfelder də məsələyə münasibət bildirərək demişdir: "Avropa İttifaqının (Aİ) üzvü kimi Macarıstan Respublikası Aİ-nin hüquqi dövlət prinsiplərinə bağlıdır, ona görə də Budapeştin Ramil Səfərovun Azərbaycana ekstradisiya etməsinin qanunauyğunluğuna heç bir şübhə yoxdur. Ermənistan hökumətinin "bizim yaxın tərəfdaşımız olan Macarıstanın Ramil Səfərovu Azərbaycana ekstradisiya etməsi Azərbaycan ilə Ermənistan arasında sülh prosesini təhlükə altına alır" iradı Macarıstanda mövcud olan Avropa ədliyyə və hüquq standartlarına uyğun gəlmir.

F.Misfelder hesab edir ki, əslində beynəlxalq hüquqla tanınmayan "Dağlıq Qarabağ Respublikası"nda cari il iyulun 19-da keçirilmiş qondarma "prezident seçkiləri" beynəlxalq birliyin Ermənistan və Azərbaycan arasında sülhün bərqərar olması və normal qonşuluq münasibətlərinin yaradılması istiqamətində səylərinə ağır zərbə vurmuşdur. Qondarma "prezident seçkiləri"nin birtərəfli nəticəsi Ermənistan-Azərbaycan, Dağlıq Qarabağ münaqişəsinin sülh yolu ilə həlli imkanlarını yenidən çətinləşdirmişdir.

* * *

Avropa Azərbaycan Cəmiyyətindən verilən digər məlumata görə, Böyük Britaniya Lordlar Palatasının üzvləri də Ermənistanın bu məsələ ilə bağlı mövqeyini kəskin tənqid etmişlər.

Ramil Səfərovun Azərbaycana ekstradisiyası ilə əlaqədar Ermənistan hökumətinin aqressiv mövqeyinə münasibət bildirən Böyük Britaniya Parlamentinin Lordlar Palatasının üzvü Ken Maginnis demişdir: "Ermənistan ordusunun zabitini qətlə yetirdiyi üçün həbs olunan və cəzasının səkkiz ilini çəkən Ramil Səfərovun bu yaxınlarda azadlığa buraxılması Ermənistanda və erməni diasporu tərəfindən birmənalı qarşılanmamışdır. Həssas regionda gərginliyi artıracaq hər bir şeyə qarşı çıxmaq lazımdır. Ermənistan hökuməti də qəbul etməlidir ki, bir vaxtlar azərbaycanlılar və türklər də qətlə və terrorizmə görə məhkum olunmuş ermənilərin azadlığa buraxılması və ondan sonra əfv edilməsindən hiddətlənmişlər. Xatırlasınlar ki, Parisin aeroportunda "Türk Hava Yolları"na məxsus şöbəyə hücum nəticəsində türk və avropalı dinc vətəndaşlar həlak olmuşdur. Lakin buna baxmayaraq, nə beynəlxalq ictimaiyyət, nə də Qərb mətbuatı məhkum olunmuş o terroristlərin azad edilməsini pisləyərək, gərginliyi artırmaq üçün fürsət axtardı".

K.Maginnis vurğulamışdır ki, ermənilər türk və azərbaycanlı diplomatların həyatını təhdid etməkdə davam edirlər.

Böyük Britaniya Parlamentinin Lordlar Palatasının üzvü Lord Laird da həmkarının fikri ilə bölüşür. Deputat demişdir: "Erməni zabitini öldürdüyü üçün cəza çəkən Ramil Səfərovun səkkiz ildən sonra azadlığa buraxılması Ermənistanda çox kəskin qarşılanmışdır. Lakin Ermənistanın reaksiyasının getdikcə əndazəsini aşma təhlükəsi vardır. Səfərovun azad olmasına cavab olaraq, onlar Dağlıq Qarabağ münaqişəsinin yenidən alovlandırılması, Macarıstan ilə diplomatik münasibətlərin pozulması və Avropada yaşayan azərbaycanlıların öldürülməsi ilə hədələyir. Amma nədənsə Səfərovun doğulduğu Cəbrayıl rayonunun son 20 ildə erməni işğalı altında olması heç bir yerdə qeyd olunmur. Bütün regionda sülh Ermənistanın geri addım ataraq yenidən özünü təmkinli aparmasından asılıdır."

Lordlar Palatasının digər üzvü Lord Kilkluni də məsələyə münasibət bildirərək vurğulamışdır ki, ermənilər özləri də illər boyu xaricdə terror hücumları və qətllər törətmiş bir neçə vətəndaşının azad olunmasını təmin etmişlər. Ermənistan prezidenti Serj Sarkisyan sülhə çağırmaqdansa, müharibə ilə hədələyir. "Dondurulmuş" münaqişələrin tez bir zamanda necə alovlandığını görmüşük. Dağlıq Qarabağın işğalı zamanı müharibəni dadan Ermənistan prezidenti dərk etməlidir ki, yenidən açıq düşmənçiliyə qayıtmaq tərəflərin hər biri üçün dəhşətli ola bilər.

AzərTAc

Azərbaycan.-2012.- 11 sentyabr.- S. 10.