Beynəlxalq birlik Azərbaycana qarşı ədalətli mövqe sərgiləmir

Milli Məclisdə təmsil olunan siyasi partiyalar Dağlıq Qarabağ məsələsində eyni mövqe tutublar

Dünən Azərbaycanda səfərdə olan ATƏT-ə üzv ölkələrin daimi nümayəndələrindən ibarət heyətlə Milli Məclisdə təmsil olunan siyasi partiyaların təmsilçiləri arasında görüş keçirilib.

Milli Məclis Sədrinin müavini, parlamentdə çoxluq təşkil edən Yeni Azərbaycan Partiyası İdarə Heyətinin üzvü Bahar Muradova qonaqlara Azərbaycanın demokratik inkişafı, siyasi sistemi, beynəlxalq əlaqələri barədə ətraflı məlumat verib. B.Muradova bildirib ki, 1918-ci ildə Şərqdə ilk Demokratik Respublika olan Azərbaycanda qadınlara seçki hüququ verilib. Azərbaycan müstəqilliyini bərpa etdikdən sonra bu ənənə davam etdirilib. Hazırda Milli Məclisin 125 deputatından 20 nəfəri qadındır. Gələcəkdə bu rəqəmin daha da artacağı istisna edilmir. Parlamentdə 11 siyasi partiya təmsil olunur.

Müstəqilliyimiz dövründə Azərbaycan bütün demokratik təşkilatlar, o cümlədən ATƏT ilə əməkdaşlığa böyük önəm verib. Azərbaycanın ATƏT-lə əməkdaşlığının 20 ili ərzində münasibətlər yüksələn xətlə inkişaf etməkdədir. Azərbaycan bu quruma üzv ölkələrlə həm iqtisadi, siyasi, həm də humanitar sahə üzrə əməkdaşlığı yüksək səviyyədə davam etdirir.

Sonra Bahar Muradova vurğulayıb ki, bu gün Azərbaycan bölgədə və dünyada öz sözünü deyən və mötəbər beynəlxalq təşkilatların rəhbər orqanlarında təmsil olunan bir ölkədir. Ancaq Ermənistan-Azərbaycan, Dağlıq Qarabağ münaqişəsi bölgədəki vəziyyəti mürəkkəbləşdirir.

Görüşdə Milli Məclisdə təmsil olunan siyasi partiyaların təmsilçiləri Azərbaycanda vətəndaş cəmiyyətinin inkişafı, Dağlıq Qarabağ münaqişəsi barədə fikirlərini bölüşüblər.

Qeyd edilib ki, 20 ildir beynəlxalq birlik Azərbaycan xalqına qarşı ədalətli mövqe sərgiləmir. Hətta Azərbaycan torpaqlarının işğalı ATƏT tərəfindən birmənalı şəkildə işğal faktı kimi qiymətləndirilməyib. İndiyə kimi təcavüzkar ölkə qarşısında heç bir tələb qoyulmayıb. Bu səbəbdən də Azərbaycan xalqının beynəlxalq təşkilatlara olan inamı itib. Dağlıq Qarabağ münaqişəsi həll olunmadan bölgənin Avropaya inteqrasiyası mümkün deyil.

Ümid Partiyasının sədri İqbal Ağazadə, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Sosial Rifah Partiyasının sədri Xanhüseyn Kazımlı, Böyük Quruluş Partiyasının sədri Fazil Mustafa, Vətəndaş Həmrəyliyi Partiyasının nümayəndəsi Fəzail İbrahimli və Ana Vətən Partiyasının sədr müavini Zahid Oruc bu məsələyə münasibət bildiriblər. Deputatlar qeyd ediblər ki, Ermənistanın prezidenti Serj Sarkisyan Xocalıda qətliamın törədilməsində əli olduğunu şəxsən etiraf edib. Əgər kütləvi insan qırğınında əli olan bir şəxs prezident ola bilirsə, mübahisə zəminində bir nəfəri öldürmüş və cəzasının müəyyən hissəsini çəkmiş bir nəfərin azadlığa çıxması niyə təəccüb doğurur?

Siyasi partiyaların nümayəndələri Dağlıq Qarabağ münaqişəsinin həlli ilə birbaşa məşğul olan ATƏT-in və digər beynəlxalq təşkilatların məsələyə ikili standartlardan yanaşmasından narahat olduqlarını bildiriblər. Qeyd olunub ki, Azərbaycan torpaqlarını 20 ildən çox işğal altında saxlayan Ermənistanın hələ də təcavüzkar adlandırılmaması, BMT Təhlükəsizlik Şurasının, ATƏT-in, Avropa Şurasının məlum qərar və qətnamələrinin kağız üzərində qalması çox böyük təəssüf doğurur.

Bir fikir xüsusi vurğulanıb ki, Milli Məclisdə təmsil olunan siyasi partiyaların təmsilçilərinin hamısı Azərbaycan xalqının milli maraqlarını qoruyur. Onlar Dağlıq Qarabağ məsələsində isə eyni mövqedədirlər.

İrlandiyadan olan səfir Eoin O,Leri deyib ki, ATƏT-ə üzv ölkələrin daimi nümayəndələrindən ibarət bu heyət artıq Ermənistanda da olub. Səfərin məqsədi Cənubi Qafqaz ölkələri ilə yaxından tanış olmaq, Dağlıq Qarabağ münaqişəsi ilə bağlı ətraflı məlumat toplamaq və problemin həlli yollarını müzakirə etməkdir.

Sonra ATƏT-ə üzv ölkələrin daimi nümayəndələrinə Azərbaycanın iqtisadi sahədəki uğurları, beynəlxalq əlaqələri, investisiya imkanları, Milli Məclisdə qəbul olunmuş qanunlar və s. məsələlərlə bağlı ətraflı məlumat verilib.

Azərbaycan.-2012.- 12 sentyabr.- S.6.