Cinayətkarlıqla mübarizədə beynəlxalq əməkdaşlıq olduqca faydalıdır

MDB Daxili İşlər Nazirləri Şurasının sədrliyi Azərbaycana keçdi

Müasir dünyada baş verən qloballaşma prosesləri mütərəqqi cəhətləri ilə bərabər, dövlətin və cəmiyyətin təhlükəsizliyi baxımından müəyyən potensial təhdidləri də ön plana çıxarır. Elə buna görə də təsadüfi deyil ki, çağdaş dövr təhlükəsizlik sahəsində tədbirlərin daha çevik və adekvat olmasını tələb edir. Şərqlə Qərbi birləşdirən geostrateji tranzit xətlərinin, qlobal enerji layihələrinin başlıca təminatçısına çevrilən, milli-etnik və dini dözümlülüyün yüksək səviyyəsinə görə fərqli sivilizasiyaları, müxtəlif mədəniyyətləri bir araya gətirən Azərbaycanda da dövlətin və cəmiyyətin təhlükəsizliyinin, sabitliyinin təminatı xüsusilə aktualdır.

Bu baxımdan Azərbaycanın əsas güc strukturlarından olan daxili işlər orqanlarının üzərinə böyük, məsuliyyətli, eyni zamanda şərəfli vəzifə düşür. Məhz Azərbaycan polisinin fədakar fəaliyyətinin nəticəsidir ki, respublikamızın sabitliyin etibarlı təminatı, ictimai asayişin qorunması baxımından bölgənin və dünyanın ən yaxşı göstəricilərə malik ölkələrindən biri olması hər birimizdə qürur və fəxarət hissi doğurur. Dövlətimizin və xalqımızın mənafeyi naminə hər cür rəşadət göstərməyə qadir olan Azərbaycan daxili işlər orqanlarının cinayətkarlığa qarşı mübarizə sahəsində qazandığı bu nailiyyətlər sübut edir ki, ölkəmiz sosial-iqtisadi inkişafla yanaşı, həm də cinayətkarlığa qarşı mübarizə və ictimai asayişin, əmin-amanlığın qorunması sahəsində də liderdir.

Əlbəttə, daxili işlər orqanlarımız bu uğura birdən-birə nail olmamışdır. Dövlət müstəqilliyimizin ilk illərində ölkəmizdə olan hakimiyyət boşluğunun daxili işlər orqanlarına da sirayət etməsi, təsadüfi insanların Daxili İşlər Nazirliyində yüksək vəzifələrə təyin olunması nəticəsində kriminogen durumun nəzarətdən çıxması və baş verən cinayət hadisələrinin sayının misli görünməmiş dərəcədə artması yaddaşlardan silinməyib.

O çətin və keşməkeşli günlərdə ulu öndər Heydər Əliyev hakimiyyətə qayıtmasaydı, kim bilir, Azərbaycan dövlətçiliyini və xalqımızı daha hansı müsibətlər gözləyərdi. Ulu öndərin hakimiyyətə qayıdışı ilə daxili işlər orqanları da təsadüfi insanlardan təmizləndi, polisin şərəfli adı özünə qaytarıldı. 1994-cü il aprelin 29-da ulu öndər Heydər Əliyev Daxili İşlər Nazirliyinin rəhbər işçilərinin iştirakı ilə keçirdiyi müşavirədən sonra isə daxili işlər orqanlarının fəaliyyətində ciddi dəyişikliklər baş verdi. İlk növbədə daxili işlər orqanlarında mühüm islahatlara başlanıldı. Tezliklə möhkəmlənən, mətinləşən Azərbaycan polisi 1994-cü ilin oktyabr, 1995-ci ilin mart aylarında, eləcə də 2003-cü ilin və 2005-ci ilin oktyabrında ölkəmizdə sabitliyin pozulmasına, hakimiyyətin zorla dəyişdirilməsinə yönəlmiş cinayətkar əməllərin qarşısını almaqla dövlətçiliyimizin keşiyində sadiq dayandığını sübut etdi.

Təbii ki, təhlükəsizliklə bağlı məsələlər adətən bir ölkənin sərhədləri daxilində yekunlaşmır. Çünki müasir dövrdə dünyada baş verən sürətli dəyişikliklər şəraitində həm də cinayətkarlığın sərhədləri aşan müxtəlif formaları meydana çıxır. Bu mənada hazırda bütün dünya ölkələrinin etiraf etdiyi həqiqət bundan ibarətdir ki, təhlükəsizliyin və ictimai asayişin etibarlı təminatı məsələsi daxili imkanlarla yanaşı, beynəlxalq birliyin qarşılıqlı faydalı əməkdaşlığı sayəsində effektiv nəticə verir. Reallıqlar ondan ibarətdir ki, bir sıra cinayət hadisələrinin qarşısının alınması və cinayət-axtarış tədbirləri ilə bağlı beynəlxalq əməkdaşlığın həyata keçirilməsi olduqca səmərəlidir.

Hazırda Azərbaycanın Daxili İşlər Nazirliyinin İnterpol və bir sıra ölkələrin polis orqanları ilə sıx əlaqələri mövcuddur. BMT, Avropa Şurası kimi mötəbər təşkilatların hüquq-mühafizə sahəsi üzrə ixtisaslaşdırılmış qurumları ilə də münasibətlər intensiv inkişaf edir. İndiyədək DİN tərəfindən müxtəlif dövlətlərin aidiyyəti qurumları ilə çoxsaylı ikitərəfli və çoxtərəfli idarələrarası və hökumətlərarası saziş, memorandum və protokollar imzalamışdır. Həmin beynəlxalq hüquqi sənədlərin predmetini transmilli cinayətkarlığın müxtəlif növləri, narkotik vasitələrin, psixotrop maddələrin, silahların qanunsuz dövriyyəsi, terrorçuluq, insan alveri, qanunsuz miqrasiya, qaçaqmalçılıq və digər cinayətlərlə mübarizədə qarşılıqlı fəaliyyət əsasında məlumat və təcrübə mübadiləsinin, birgə əməliyyat-axtarış tədbirlərinin həyata keçirilməsi, polis təlim və təhsili sahəsində əməkdaşlıq məsələləri təşkil edir.

Təcrübə göstərir ki, beynəlxalq təşkilatlar dünyada yaranan yeni təhdidlərlə mübarizədə getdikcə daha çox rol oynamaqda davam edirlər. Belə ki, beynəlxalq təşkilatlar təhdidlərin aradan qaldırılmasına və ya onların qarşısının alınmasına yardım etməklə yanaşı, Azərbaycan Respublikasının milli maraqlarının qlobal siyasətdə müdafiəsinə geniş imkanlar yaradırlar. Beynəlxalq cinayətkarlıqla mübarizədə Müstəqil Dövlətlər Birliyinə üzv olan ölkələr arasındakı mövcud əməkdaşlığın mühüm əhəmiyyəti var. Bu günlərdə MDB üzvləri olan ölkələrin Daxili İşlər Nazirləri Şurasının Bakıda keçirilən növbəti iclası da bu məsələyə həsr olunmuşdu.

Öncə qeyd edək ki, iclas iştirakçılarını Prezident İlham Əliyev qəbul edib. Yeni çağırışlara və təhdidlərə hazır olmağın vacibliyini qeyd edən dövlət başçısı deyib: "Vətəndaşlarımızın bir çox mənada təhlükəsizliyi və həyatı dost ölkələrin, - indiki halda MDB məkanında, - qarşılıqlı fəaliyyətinin nə dərəcədə səmərəli təşkil edilməsindən asılı olacaqdır. Yəni, mən bizim və MDB ölkələrinin daxili işlər orqanları arasında əməkdaşlığı təşkilatımız çərçivəsində, habelə ikitərəfli formatda çox müsbət dəyərləndirirəm və qiymətləndirirəm. Əminəm ki, Bakıda keçirəcəyiniz günlər inkişafın gələcək yollarının müəyyən edilməsi, bu əməkdaşlığın möhkəmləndirilməsi baxımından çox əhəmiyyətli olacaqdır. Bu əməkdaşlıq həm də ümumi müsbət meyilin ayrılmaz hissəsidir. Azərbaycan postsovet məkanında MDB-nin fəal üzvüdür, bir çox proqramlarda, bir çox layihələrdə - həm humanitar, həm iqtisadi sahələrdə, həm də təhlükəsizliyin möhkəmləndirilməsi məsələlərində iştirak edir".

MDB iştirakçısı olan dövlətlərin Daxili İşlər Nazirləri Şurasının sentyabrın 7-8-də Bakı şəhərində keçirilən növbəti iclasında Azərbaycan, Belarus, Qazaxıstan, Qırğız, Moldova, Tacikistan, Türkmənistan, Özbəkistan, Ukrayna respublikalarının və Rusiya Federasiyasının daxili işlər nazirliklərinin nümayəndələri, habelə MDB İcraiyyə Komitəsinin icraçı katibi Sergey Lebedev, MDB ərazisində mütəşəkkil cinayətkarlıq və cinayətkarlığın başqa təhlükəli növləri ilə mübarizə üzrə Əlaqələndirmə Bürosunun rəhbəri Nikolay Ovçinnikov, Beynəlxalq Kriminal Polis Təşkilatı - İnterpolun baş katibi Ronald Noubl və digər şəxslər iştirak ediblər.

Azərbaycanın daxili işlər naziri, general-polkovnik Ramil Usubov tədbiri açaraq MDB DİNŞ formatında əməkdaşlığın daim möhkəmləndiyini, iştirakçı dövlətlərin mənafelərinə xidmət edən yeni konkret məzmun aldığını diqqətə çatdırıb. Nazir Ramil Usubov əmin oluduğunu bildirib ki, bu proses eyni dərəcədə uğurla davam edəcəkdir. Bu formatda əməkdaşlıq müasir çağırışlara və təhlükələrə layiqli cavabdır.

MDB ərazisində mütəşəkkil cinayətkarlıq və cinayətkarlığın başqa təhlükəli növləri ilə mübarizə üzrə Əlaqələndirmə Bürosunun rəhbəri Nikolay Ovçinnikov iclasın gündəliyi, eləcə də ötən iclasdan sonra görülmüş işlər barədə məlumat verib və MDB DİNŞ-nin sədrliyinin Azərbaycana keçdiyini elan edib.

İclasda iştirak edən Azərbaycanın Baş naziri Artur Rasi-zadə bildirib ki, dövlətlərarası əməkdaşlığın yaxşılaşdırılması zəmanəmizin təhdid və çağırışlarına müasir və adekvat münasibətin, ictimai asayişin və cinayətkarlıqla birgə mübarizənin prioritet istiqamətlərindən biridir. Ötən illər ərzində MDB məkanında ekstremizmin, beynəlxalq terrorizmin və transmilli mütəşəkkil cinayətkarlığın artmasının qarşısını almaq üçün səmərəli iş görülüb. Xüsusi əməliyyatlar zamanı birgə səylər nəticəsində ağır cinayətlərin üstü açılmış, dövlətlərarası və beynəlxalq axtarışda olan minlərlə şəxs saxlanılmışdır. Birgə, razılaşdırılmış səylərlə aparılan operativ istintaq tədbirləri nəticəsində yüzlərlə cinayətkar birlik ifşa edilmişdir. Baş nazir Artur Rasi-zadə vurğulayıb ki, DİNŞ-nin fəaliyyəti bir çox təşəbbüslərə təkan verir, kriminal vəziyyətə nəzarəti təmin etmək üçün müasir tədbirlər görməyə şərait yaradır.

MDB İcraiyyə Komitəsinin icraçı katibi Sergey Lebedev isə çıxışında deyib ki, MDB ölkələrinin milli təhlükəsizliyinin təmin edilməsi ölkələrin müdafiə səviyyəsindən birbaşa asılıdır. Buradan belə nəticə çıxarmaq olar ki, Birlik ölkələrinin hüquq-mühafizə sahəsində əməkdaşlığının inkişaf etdirilməsi və möhkəmləndirilməsinə birgə yanaşmaya ehtiyac var. İnterpolun baş katibi Ronald Noubl isə Beynəlxalq Kriminal Polis Təşkilatının MDB DİNŞ-nin fəaliyyətinə böyük önəm verdiyini və birgə əməkdaşlıqda maraqlı olduğunu diqqətə çatdırıb.

İki gün davam edən iclasda MDB-nin iştirakçısı olan dövlətlərin daxili işlər nazirliklərinin əməkdaşlığının prioritet istiqamətləri, cinayətkarlıqla mübarizədə dövlətlərarası proqramın həyata keçirilməsinin gedişi, 2014-2018-ci illərdə cinayətkarlıqla mübarizədə birgə tədbirlər üzrə Dövlətlərarası Proqramın və 2014-2018-ci illərdə narkotik vasitələrin, psixotrop maddələrin və onların prekursorlarının qeyri-qanuni dövriyyəsi ilə mübarizədə və narkomaniyaya qarşı fəaliyyətdə MDB-yə üzv dövlətlərin proqramının layihələrinin işlənib hazırlanması, bu dövlətlərin daxili işlər nazirliklərinin əməkdaşlığının İnkişaf Konsepsiyasının layihəsinin hazırlanması, şəxslərin dövlətlərarası axtarışının həyata keçirilməsi qaydalarını müəyyən edən sənəd layihəsinin hazırlanması, MDB-nin iştirakçısı olan dövlətlərin ərazisində mütəşəkkil cinayətkarlıq və cinayətkarlığın digər növləri ilə mübarizənin əlaqələndirilməsi üzrə Büronun maliyyə-təsərrüfat fəaliyyətinin aparılması üzrə Təlimatın layihəsi, DİNŞ nəzdində Elmi-Məsləhət Şurasının yaradılması və s. məsələlər ətrafında geniş müzakirələr aparılmış, müvafiq qərarlar qəbul edilmişdir.

Mütəşəkkil cinayətkarlıqla, terrorizmlə mübarizədə müvəffəqiyyət birlikdə, qarşılıqlı anlaşmada və insanların dinc həyatının müdafiəsi üçün birgə fədakar səylərin tarazlığındadır. MDB məkanında kriminal hallara qarşı mübarizədə vahid cəbhənin yaradılması quruma üzv ölkələrin hamısının səylərinin birləşdirilməsini tələb edir. Hər bir məsələdə dost ölkələrə yardımını əsirgəməyən Azərbaycan beynəlxalq miqyasda təhlükəsizliyin təmin olunması sahəsində də üzərinə düşən öhdəliklərə daim sadiqdir.

Rəşad CƏFƏRLİ

Azərbaycan.-2012.- 12 sentyabr.- S.8.