Türkiyə deputatı 15 sentyabrın Türkiyə-Azərbaycan Qardaşlıq Günü elan olunmasını təklif etmişdir

Türkiyə deputatı, Türkiyə-Azərbaycan parlamentlərarası dostluq qrupunun sabiq sədri Mustafa Kabakçı AzərTAc-a bildirmişdir ki, Nuru Paşanın komandanlığı ilə Qafqaz İslam Ordusunun Bakını işğaldan azad etdiyi tarixin - 15 sentyabrın Türkiyə-Azərbaycan Qardaşlıq Günü elan olunmasını təklif etmişdir.

Bu təklifi, habelə Bakıda Nuru Paşanın abidəsinin ucaldılması ideyasını Türkiyədə mətbuat üçün bəyanatında da səsləndirdiyini bildirən deputat demişdir ki, Bakının işğaldan azad olunması Çanaqqala zəfəri qədər mühümdür. Türkiyədə və Azərbaycanda bütün qardaşlarımız bilməlidirlər ki, 1918-ci ildə erməni-bolşevik quldur dəstələrinə qarşı qələbə qazanan Nuru Paşanın cəmi 27 yaşı var idi və bu cəsur komandan 20 min Azərbaycan türkünün qətlə yetirildiyi Bakıda minlərlə dinc insanın həyatını xilas etmişdir. Bakı zəfəri bizim ortaq tariximizin və qardaşlığımızın ən gözəl örnəklərindən biridir. Bu gün Azərbaycanın Şamaxı, İsmayıllı, Göyçay və digər şəhərlərində Qafqaz İslam Ordusu əsgərlərinin adsız məzarı vardır. Azərbaycan xalqı Nuru Paşanın və əsgərlərin xatirəsini daim qəlbində yaşadır. Deputat ümidvar olduğunu bildirmişdir ki, iki qardaş ölkənin rəsmiləri bu təklifi müsbət qiymətləndirəcəklər.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.-2012.- 14 sentyabr.- S.3.