«Nor ASALA» da Azərbaycanın xaricdəki diplomatic nümayəndəliklərinə terror hədəli məktub göndərib

Erməni millətçilərinin xalqımıza qarşı apardığı soyqırımı və təcavüz siyasətinin iki yüz ildən artıq tarixi var. Bu mənfur siyasətin məqsədi azərbaycanlıları qədim torpaqlarından sıxışdırıb çıxarmaq, bu ərazilərdə erməni tarixçilərinin və ideoloqlarının uydurduğu "Böyük Ermənistan" dövləti qurmaq olub. Bu məqsədlə mərhələlərlə həyata keçirilən terror və soyqırımı siyasətinin qanlı fəsadları böyük türk dünyasının, o cümlədən Azərbaycan xalqının qan yaddaşında dərin izlər buraxmışdır.

Uzun illərdir Qərbdə və bir sıra Şərq ölkələrində kök salmış erməni terror təşkilatları zaman-zaman fəallaşmış, çoxsaylı insan tələfatına səbəb olan aksiyalar həyata keçirmiş və öz missiyasını yerinə yetirdikdən sonra qeyri-leqal şəraitdə fəaliyyətini davam etdirmişlər. 1972-1991-ci illərdə erməni terrorçuları dünyanın əksər ölkələrində Türkiyənin görkəmli siyasi xadimlərinə, məşhur diplomatlarına və tanınmış iş adamlarına qarşı 300-dən çox terror əməliyyatı törətmişlər. Bu terror aktlarının 100-dən çoxu ASALA terror təşkilatının "Orli", "9 İyun" və "3 Oktyabr" qruplaşmaları tərəfindən 24 ölkənin 38 şəhərində həyata keçirilmişdir.

1988-ci ildən Azərbaycana qarşı növbəti dəfə aşkar ərazi iddiaları ilə çıxış edən Ermənistan ərazisində yaşayan azərbaycanlıları deportasiya edərkən müxtəlif vandalizm aktlarına, o cümlədən terrora əl atmışdır. Sonrakı mərhələdə bəzi dövlətlərin himayəsi və dəstəyi ilə Azərbaycan ərazilərini işğal edən Ermənistan dinc əhalinin ölümü ilə nəticələnmiş çoxlu sayda terror aktı planlaşdırmış və həyata keçirmişdir. Ərazi ilhaqı məqsədi ilə terrorçuluğu və separatizmi özünə başlıca vasitə seçən ermənilər 1988-ci ildən başlayaraq Azərbaycanda 373 qanlı terror aktı törətmiş, nəticədə 1600-ə yaxın insan həlak olmuş, 1808 nəfər yaralanmışdır. Terror aktları nəticəsində həlak olanların böyük əksəriyyətini qadın, uşaq və qocalar təşkil etmişdir.

İndi də Ermənistan və erməni diasporu Azərbaycan Respublikası Silahlı Qüvvələrinin zabiti Ramil Səfərovun Azərbaycana verilməsi və əfv olunması ilə əlaqədar süni ajiotaj yaratmağa və beynəlxalq ictimai rəyi Azərbaycana qarşı yönəltməyə çalışır. Ermənistan hökumətinin qızışdırıcı, aqressiv mövqeyindən ruhlanan erməni terror təşkilatları isə Azərbaycanın xarici ölkələrdəki diplomatik missiyalarını, vətəndaşlarını hədəfə götürməklə hədələyirlər. Xəbər verildiyi kimi, sentyabrın 3-də Azərbaycanın Macarıstandakı səfirliyinə "ASALA Fighters" terror təşkilatından daxil olmuş məktubda Azərbaycan diplomatları, xaricdə təhsil alan azərbaycanlı tələbələr, iş adamları, diaspor təşkilatlarının fəalları hədəf kimi göstərilib və onların qətlə yetiriləcəyi bildirilib.

ASALA terror təşkilatından ölkəmizin Macarıstandakı və bir sıra digər ölkələrdəki səfirliklərinə daxil olmuş məktub ermənilərin iyrənc planlarının olmasından xəbər verir. Məktubda azərbaycanlılara qarşı hədələr, terror qorxusu və vandal üsulların tətbiq olunacağı ilə bağlı fikirlərin yer alması erməni xislətini bir daha ortaya qoyur. Erməni terror təşkilatlarının dünyanın gözü qarşısında bu cür aqressiv bəyanatlar səsləndirmələri terrorun ideoloji mərkəzi olan Ermənistanın açıq-aşkar terrorizmə rəvac verdiyini göstərir.

Bu günlərdə isə erməni "Nor ASALA" terror təşkilatı ("Yeni Asala") Azərbaycanın xaricdəki diplomatik nümayəndəliklərinə terror hədələri ilə dolu məktub göndərib. Məktubda qeyd olunur ki, təşkilat Ramil Səfərov və Kvanç Ağaoğlunun öldürülməsi ilə bağlı ciddi plan hazırlayıb.

APA-nın məlumatına görə, məktublar Azərbaycanın xarici ölkələrdəki bir sıra səfirliklərinə, o cümlədən Macarıstandakı səfirliyə göndərilib. Terror təşkilatı beynəlxalq kütləvi informasiya vasitələrinə, o cümlədən "Guardian"a məktub göndərərək onları terrorla hədələyib. Məktublarda Azərbaycanın diplomatik missiyasına, səfirlik əməkdaşlarına qarşı birbaşa təhdidlər yer alıb.

Azərbaycan Respublikası Xarici İşlər Nazirliyinin mətbuat xidmətinin rəhbəri Elman Abdullayev bildirib ki, bu addım Ermənistan tərəfinin növbəti dəfə terror üsuluna üstünlük verdiyini göstərir. XİN rəsmisi bildirib ki, beynəlxalq ictimaiyyət belə təhdidlərə reaksiya verməlidir, çünki Azərbaycan terrorçuluğa qarşı mübarizə işində aktiv əməkdaşlıq edən ölkələrdəndir: "Bu, Azərbaycan və Türkiyə dövlətlərinə qarşı yönələn açıq terror təhdididir. Dünya ictimaiyyəti buna biganə qalmamalıdır. Ermənistan tərəfindən yönəldilmiş bu terror üsulu tək Azərbaycana yox, terrorla mübarizə aparan bütün ölkələrə qarşı yönəlib. Buna görə də terrorla mübarizə aparan bütün ölkələr buna qarşı səylərini birləşdirməlidir".

E.Abdullayev onu da bildirib ki, Azərbaycan erməni terrorunun ağır nəticələrini görüb, minlərlə günahsız insan erməni terrorunun qurbanı olub. Bu kimi təhdidlər beynəlxalq ictimaiyyətə meydan oxumaqdır: "Azərbaycan tərəfi məsələ ilə bağlı araşdırmalarını davam etdirir. Diplomatik nümayəndəliklərimizin təhlükəsizliyinin artırılması üçün akreditə olunmuş ölkələrlə danışıqlar aparırıq. Ermənistan tərəfi terrora üstünlük verirsə, Azərbaycan tərəfi də terrorla mübarizə üsuluna üstünlük verir. Bu cür təhdidlər cəzasız qalmamalıdır. Beynəlxalq ictimaiyyət terror təhdidlərinə biganə yanaşmamalı, bunu qınamalıdır".

Erməni vandalları dünyanın gözü qarşısında Dağlıq Qarabağ müharibəsində dinc əhaliyə qarşı məhz bu amansız terrordan istifadə ediblər. Serj Sarkisyan da həmin vandalizm aktlarının başında durub. Erməni terror təşkilatından daxil olan sənədlər bir daha işğalçı ölkənin mahiyyətini ortaya qoyur. Beynəlxalq terrorizmə qarşı fəal mübarizə aparan dünya birliyi erməni terroru təhlükəsinə daha ciddi yanaşmalı, yaxın tarixdə baş vermiş çoxsaylı insan faciələrinin təkrarlanmasına yol verməməlidir. Erməni terror təhlükəsi bəşəriyyəti bürümədən onun qarşısı beynəlxalq hüquq normaları çərçivəsində alınmalıdır.

Elnur HACALIYEV

Azərbaycan.-2012.- 14 sentyabr.- S.5.