Moskvada dahi Azərbaycan şairi Nizami Gəncəvinin 870 illiyinə həsr edilmiş təntənəli tədbir keçirilmişdir

Rusiya paytaxtının mərkəzində, Azərbaycan Respublikasının Rusiya Federasiyasındakı səfirliyinin yanındakı bağda dahi Azərbaycan şairi Nizaminin abidəsi önündə böyük şair, mütəfəkkir və filosof Nizami Gəncəvinin 870 illiyinə həsr edilmiş təntənəli tədbir olmuşdur. Rəsmi mərasim başlanmazdan əvvəl qonaqlar 1991-ci ildə qoyulmuş bu abidənin önünə tər çiçəklər düzmüşlər.

Təntənəli mərasimi Azərbaycanın Rusiyadakı səfiri Polad Bülbüloğlu açmışdır. O, orta əsr Şərqinin dünya ədəbiyyatı şedevrləri sırasına daxil olmuş ən böyük şairlərindən birinin yaradıcılıq irsindən danışmışdır. P.Bülbüloğlu qeyd etmişdir ki, Nizaminin yubileyinin dünyanın mədəni mərkəzlərindən birində keçirilməsi mühüm hadisədir. Səfir bildirmişdir ki, yubiley tədbiri Azərbaycan Prezidenti İlham Əliyevin sərəncamı ilə ölkənin hər yerində keçirilir. Səfir, həmçinin qeyd etmişdir ki, dahi Azərbaycan şairinə təkcə Moskvada deyil, həm də Sankt-Peterburqda, Rusiyanın şimal paytaxtının mərkəzindəki eyniadlı bağda gözəl abidə qoyulmuşdur.

Azərbaycan Yazıçılar Birliyinin sədri, xalq yazıçısı Anar çıxışına ümummilli lider Heydər Əliyevdən belə bir sitatla başlamışdır: "Nizami elə şairdir ki, onun yubileyini hər il qeyd etmək lazımdır". Anar dahi şairin yaradıcılığından bəhs edərkən demişdir ki, Nizami öz əsərləri ilə dünyanın qlobal mənzərəsini yaratmış və əbədi dünya vətəndaşı olmuşdur.

Moskva Yazıçılar İttifaqının sədri Yevgeni Sidorov öz çıxışında demişdir ki, böyük mütəfəkkir və şair Nizaminin adı dünya mədəniyyəti ənginliyində sönməz parlaq ulduzlar kimi şölələnən sənətkarlar sırasındadır. O demişdir: "Şərqin dahi şairi, Azərbaycan torpağının böyük oğlu Nizami bütün dövrlərin sənətkarı olmuş, sonrakı dövrlərin lirikasına və eposuna çox böyük təsir göstərmişdir. Onun əsərlərinin qəhrəmanları dünya ədəbiyyatında ümumi əbədi obrazlara çevrilmişdir".

"Ocaq" Azərbaycan Mədəniyyəti Cəmiyyətinin sədri Tofiq Məlikli və şair, həmçinin Nizami əsərlərinin tərcüməçisi Alla Axundova şairin təkcə Azərbaycan mədəniyyətinə deyil, həm də bütün dünya mədəniyyətinə və ədəbiyyatına məxsus olan ölməz əsərlərinin əhəmiyyətindən danışmışlar.

Sonra Rusiya və Azərbaycan artistlərinin ifasında hər iki dildə yubilyarın şeirləri əsasında hazırlanmış poetik kompozisiyalar səslənmiş, Bakıdan dəvət olunmuş xalq artistləri Mələkxanım Əyyubovanın, Fəxrəddin Dadaşovun, Möhlət Müslümovun iştirakı ilə konsert proqramı nümayiş etdirilmişdir.

Yubiley şənliyində Rusiya ictimaiyyətinin və yaradıcı ziyalıların nümayəndələri, bir sıra ölkələrin səfirləri, Rusiya Federasiyası Dövlət Dumasının deputatları, Xarici İşlər Nazirliyinin əməkdaşları, Azərbaycandan xüsusi olaraq dəvət olunmuş qonaqlar, habelə Azərbaycan diasporunun tanınmış nümayəndələri iştirak etmişlər.

Asya HACIZADƏ,

AzərTAc-ın xüsusi müxbiri

Moskva

Azərbaycan.-2012.- 14 sentyabr.- S.7.