Azərbaycanın birinci xanımı Mehriban Əliyeva Bakının Buzovna qəsəbəsindəki texniki peşə məktəbinin açılışında iştirak etmişdir

Sentyabrın 14-də Bakının Xəzər rayonunun Buzovna qəsəbəsində Prezident İlham Əliyev və xanımı, Heydər Əliyev Fondunun prezidenti Mehriban Əliyevanın təşəbbüsü və dəstəyi ilə yenidən inşa edilmiş 5 nömrəli texniki peşə məktəbinin açılış mərasimi olmuşdur.

Mərasimdə Azərbaycanın birinci xanımı, Heydər Əliyev Fondunun prezidenti, Milli Məclisin Xəzər rayonundan deputatı Mehriban Əliyeva iştirak etmişdir.

Azərbaycanın birinci xanımı məktəbin rəmzi açılışını bildirən lenti kəsdi.

Mehriban xanım Əliyeva təhsil ocağının əvvəlki görüntüsünün əks olunduğu fotostendə baxdı.

Foyedə ulu öndər Heydər Əliyevin xatirəsinə yaradılmış guşədə ümummilli liderin abidəsi qoyulmuşdur. Abidə xalq rəssamı, Rusiya Rəssamlıq Akademiyasının fəxri üzvü professor Natiq Əliyev tərəfindən hazırlanmışdır.

Azərbaycanın birinci xanımına məlumat verildi ki, hazırda MDB məkanında bənzəri olmayan bu texniki peşə məktəbi 1,2 hektarlıq ərazidə yerləşir. 1969-cu ildən fəaliyyət göstərən məktəb yenidənqurmaya qədər tornaçı, bərbər, maliyyə-uçot ixtisasları üzrə təhsil vermişdir.

Bildirilmişdir ki, məktəb xarici görünüşü və maddi-texniki bazası ilə bərabər profilini də dəyişmiş, kino, teatr, həmçinin mədəniyyət və incəsənətin digər müvafiq işçi bazasını peşəkar texniklərlə təmin etməyi qarşısına məqsəd qoymuşdur. 5 nömrəli texniki peşə məktəbində kino, videoçəkiliş üzrə operatorlar, səhnə işıq və qrim ustaları, kinotelemontajçılar, səs operatorları, teatr, kino və telestudio dekoratorları, dərzilər, kompyuterlərin təmiri və xidməti üzrə texniklər hazırlanacaqdır.

Burada təhsil ikiillikdir. Bu il məktəbə ilk qəbul aparılmışdır və təhsil alacaq şagirdlərin sayı 160 nəfərdir. Lakin gələcək illərdə onların sayı 320-ə çatacaqdır. Hazırda 19, gələcəkdə isə 38 nəfər müəllim heyəti şagirdlərə incəsənətin texniki tərəfləri ilə bağlı peşələrin sirlərini öyrədəcəklər.

Məktəbin yeməkxanası ilə tanış olan Mehriban xanım Əliyeva burada yaradılmış şərait və səliqə-sahmandan razılığını bildirdi.

Daha sonra Azərbaycanın birinci xanımı məktəbdəki çəkiliş və səsyazma studiyalarına, rejissor otağına baxdı. Məlumat verildi ki, ən müasir səsyazma və səyyar telestudiya çəkiliş avadanlığının qurulduğu studiyalar birbaşa yayım imkanlarına malikdir.

Mehriban xanım Əliyeva məktəbin akt zalı, dərs, qrim, dekorasiya otaqları, dərzi sexi, tibb məntəqəsi, kitabxana və digər emalatxanaları ilə də tanış oldu.

Kitabxana ilə tanışlıq zamanı bildirildi ki, burada mədəniyyət və incəsənətə dair kitablarla yanaşı, müxtəlif dərs vəsaitləri də vardır.

Məktəbin həyətində ayrıca idman kompleksi inşa edilmişdir. Burada futzal, basketbol, voleybol, yüngül atletika qurğuları və trenajorlar yerləşdirilmişdir. İdman zalının divarlarını ulu öndər Heydər Əliyev və Prezident İlham Əliyevin idmana göstərdiyi qayğı və diqqəti əks etdirən fotoşəkillər bəzəyir.

Azərbaycanın birinci xanımı məktəbdə yaradılan şəraitdən razılığını bildirdi, burada tədrisin yüksək səviyyədə aparılmasının vacibliyini qeyd etdi.

AzərTAc

Azərbaycan.-2012.- 15 sentyabr.- S.6.