Kiyevdə Azərbaycanın sədrliyi ilə GUAM Milli Əlaqələndiriciləri Şurasının növbəti iclası keçirilmişdir

Sentyabrın 12-13-də GUAM-ın Kiyevdəki iqamətgahında qurumun Milli Əlaqələndiricilər Şurasının (MƏŞ) 25-ci iclası olmuşdur.

GUAM-ın Katibliyindən AzərTAc-a bildirmişlər ki, iclasda təşkilatın baş katibi Valeri Çeçelaşvili, Azərbaycan Xarici İşlər Nazirliyinin xarici siyasətin planlaşdırılması və strateji araşdırmalar idarəsinin rəisi Elman Ağayev, Gürcüstanın GUAM-dakı nümayəndəsi M.Antadze, Moldovanın Kiyevdəki diplomatik nümayəndəliyinin başçısı İ.Stevile, Ukrayna xarici siyasət idarəsinin iqtisadi əməkdaşlıq departamentinin direktoru İ.Nikolayko iştirak etmişlər.

Elman Ağayevin sədrliyi ilə keçən iclasda qarşılıqlı siyasi fəaliyyət, sahəvi tərəfdaşlıq və təşkilati fəaliyyət məsələləri, habelə beynəlxalq qurumlarda əməkdaşlığın perspektivləri müzakirə edilmişdir.

İclasda quruma üzv dövlətlərin BMT Baş Məclisinin "GUAM məkanında həlli uzadılan münaqişələr və beynəlxalq sülh, təhlükəsizlik və inkişaf üçün onların nəticələri" mövzusunda 66-cı sessiyasının gündəliyi çərçivəsində qarşılıqlı fəaliyyətinin gedişatı barədə fikir mübadiləsi aparılmışdır.

Tərəflər GUAM-ın Parlament Assambleyasının oktyabrın 1-də Gürcüstanda, oktyabrın 28-də isə Ukraynada keçiriləcək parlament seçkilərinə müşahidəçilər göndərmək niyyətini, habelə GUAM PA sədrinin assambleyanın növbəti iclasının bu il dekabrın 19-20-də Bakıda keçirilməsi qərarını dəstəkləmişlər.

İclasda, həmçinin sahəvi işçi qrupların nəqliyyat, turizm, iqtisadiyyat, ticarət, mədəniyyət, elm və təhsil sahələrində əməkdaşlığı, habelə mütəşəkkil cinayətkarlığa və çirkli pulların yuyulmasına qarşı mübarizədə fəaliyyəti ilə bağlı məsələlər müzakirə edilmişdir.

İclasda GUAM Katibliyinin və üzv ölkələrin beynəlxalq tədbirlərdə, o cümlədən BMT (Təhlükəsizlik Şurasının Antiterror Komitəsi), ATƏT (Təhlükəsizlik sahəsindəki problemlərin icmalı üzrə illik konfrans - ASRC), Avropa Şurası (Terrorçuluq üzrə Ekspertlər Komitəsi - CODEXTER, kibercinayətkarlığa qarşı mübarizə sahəsində "Ostobus" konfransı) çərçivəsində keçirilən tədbirlərdə iştirakı müsbət qiymətləndirilmişdir.

Tərəflər Xarici İşlər Nazirləri Şurasının BMT Baş Məclisi çərçivəsində XVIII iclasından irəli gələn məsələləri də müzakirə etmiş və müvafiq sənədlərin layihələrini razılaşdırmış, habelə Şuranın GUAM-ın 15 illiyinə həsr olunmuş növbədənkənar XIX iclasının oktyabrın 10-da Kiyevdə keçirilməsi təşəbbüsünü müzakirə etmişlər.

Zeynal AĞAZADƏ,

AzərTAc -ın xüsusi müxbiri

Kiyev

Azərbaycan.-2012.- 16 sentyabr.- S. 2.