Azərbaycan ilə İndoneziya arasında qarşılıqlı sərmayə qoyuluşu məsələləri müzakirə edilmişdir

İndoneziyanın iqtisadi məsələlər üzrə əlaqələndirmə naziri Hatta Racasanın başçılığı ilə nümayəndə heyəti ölkəmizə səfəri çərçivəsində sentyabrın 17-də Azərbaycanın iqtisadi inkişaf naziri Şahin Mustafayev ilə görüşmüşdür.

Görüşdə nazir Ş.Mustafayev qarşılıqlı rəsmi və işgüzar səfərlərin, biznes forum və görüşlərin ölkələrimiz arasında iqtisadi əlaqələrin genişlənməsində əhəmiyyətli olduğunu vurğulamışdır.

İndoneziyalı nazir ölkəmizin dinamik iqtisadi inkişafından məmnunluğunu ifadə etmiş, ikitərəfli əlaqələrin inkişafında ölkələrimizin böyük perspektivə malik olduğunu diqqətə çatdırmışdır.

Görüşdə Azərbaycan ilə İndoneziya arasında iqtisadi əlaqələrin mövcud vəziyyəti və əməkdaşlıq perspektivləri, ticarət əlaqələrinin genişləndirilməsi, qarşılıqlı investisiya qoyuluşu məsələləri müzakirə edilmiş, işgüzar əlaqələrin genişlənməsi üçün potensial imkanlardan səmərəli istifadənin əhəmiyyəti diqqətə çatdırılmışdır.

AzərTAc

Azərbaycan.-2012.- 18 sentyabr.- S.3.