Hərbi əməkdaşlıq haqqında ikitərəfli saziş imzalanmışdır

Sentyabrın 17-də rəsmi səfər çərçivəsində Azərbaycanın müdafiə naziri general-polkovnik Səfər Əbiyev və Litvanın milli müdafiə naziri xanım Rasa Yuknyaviçene hərbi əməkdaşlıq haqqında ikitərəfli saziş imzalamış, habelə regional təhlükəsizlik məsələlərini, Əfqanıstanda aparılan əməliyyatları, perspektivləri və s. müzakirə etmişlər. 2002-ci ildən imzalanmış və yenidən nəzərdən keçirilmiş müqavilə hərbi hazırlıq sahəsində əməkdaşlığın həyata keçirilməsini, iki ölkənin ekspertləri arasında məsələlərin standartlaşdırılmasına dair məsləhətləşmə aparılmasını və s. nəzərdə tutur.

Azərbaycanın müdafiə naziri S.Əbiyev demişdir ki, Azərbaycan Litva ilə münasibətlərə çox ciddi yanaşır və hər iki ölkə öz müstəqilliyini qoruyub saxlamağa cəhd göstərir.

Görüşdə Litvanın müdafiə naziri Ermənistan-Azərbaycan, Dağlıq Qarabağ münaqişəsinin nizama salınması üzrə ölkəsinin mövqeyini bildirmişdir. Rasa Yuknyaviçene demişdir ki, status-kvo qəbuledilməzdir və aydındır ki, münaqişənin dinc həllindən savayı başqa bir alternativ yoxdur.

Görüşlərdə enerji təhlükəsizliyi məsələlərinə mühüm diqqət yetirilmişdir. R.Yuknyaviçene qeyd etmişdir ki, hökumət enerji müstəqilliyinə nail olmağa xüsusi səy göstərir.

Azərbaycanın müdafiə naziri Litvaya səfəri çərçivəsində general Yonas Jemaytis adına Litva Hərbi Akademiyasına gedəcək, orada təhsil alan azərbaycanlı zabitlərlə görüşəcək, həmçinin Vilnüsdəki Enerji Təhlükəsizliyi Mərkəzinə baş çəkəcəkdir.

Nigar HÜSEYNOVA,

AzərTAc-ın xüsusi müxbiri

Vilnüs

Azərbaycan.-2012.- 18 sentyabr.- S.3.