Avropa Parlamenti Ramil Səfərov məsələsində Azərbaycana qarşı qərəzli mövqe nümayiş etdirmişdir

Macarıstanın Budapeşt Məhkəməsi tərəfindən məhkum edilmiş Ramil Səfərovun Azərbaycana verilməsi məsələsi ilə əlaqədar "Avropa Parlamentinin Azərbaycan ilə bağlı 2012-ci il 13 sentyabr tarixli qətnaməsi: Ramil Səfərovun işi" adlı sənəd dərin təəssüf hissi doğurur. Bu qərəzli sənəd mahiyyətinə görə hüquq məkanının çərçivəsindən kənara çıxmışdır və bütünlüklə siyasi mülahizələrə əsaslanır. Qətnamənin tam bir sıra müddəaları bunu əyani şəkildə sübut edir. Məsələn, iddia olunur ki, Azərbaycan zabitinin əfv edilməsi regionda sülh və barışıq prosesləri üçün təhlükə törədir, dinc təmasların gələcəkdə mümkün ola biləcək inkişafının qarşısını ala bilər və sair.

Lakin hamıya məlumdur ki, regionda sülh və təhlükəsizlik üçün başlıca təhdid mənbəyi, sabitliyin əsaslarını sarsıdan amil Azərbaycan ərazilərinin Ermənistan silahlı qüvvələri tərəfindən davam etməkdə olan işğalıdır. Bu işğalın nəticəsidir ki, əldə edilmiş atəşkəsə baxmayaraq, bu gün də nəinki Azərbaycanın hərbi qulluqçuları, həm də dinc əhali arasında çoxsaylı itkilər baş verir. Regionda sülh yaradılması üçün başlıca addım məhz işğalın aradan qaldırılmasıdır. Gözləmək olardı ki, Avropa İttifaqının müxtəlif strukturları ATƏT-in Minsk qrupu ilə birlikdə məhz bu istiqamətdə ardıcıl olaraq işləyəcəklər. Bunun əvəzinə, Avropa Parlamenti problemin mahiyyətini təhrif edən birtərəfli, qərəzli mövqe tutmuşdur. Bunu məsələnin hüquqi tərəfinə aşkar etinasızlıq göstərilməsi də sübut edir. Qəbul edilmiş qətnamədə iddia olunur ki, R.Səfərovun əfv edilməsi "Məhkum olunmuş şəxslərin verilməsi haqqında" Avropa Şurasının 1983-cü il tarixli Konvensiyasının ruhuna ziddir. Qətnamə müəlliflərinin fikrincə, həmin Konvensiya ona görə imzalanmışdır ki, bir dövlətin ərazisində məhkum edilmiş şəxsin cəzasının qalan hissəsini vətəndaşı olduğu dövlətin ərazisində çəkməsi üçün verilməsinə imkan yaradılsın. Eyni zamanda, qətnamə müəllifləri hər halda etiraf etməli olmuşlar ki, R.Səfərovun əfv edilməsi adıçəkilən Konvensiyanın müddəalarına uyğundur. Bir daha diqqəti buna yönəldirik ki, həm məhkumun verilməsi, həm də Azərbaycan tərəfinin bütün sonrakı hərəkətləri cinayət-hüquq məsələlərində qarşılıqlı əməkdaşlığa dair beynəlxalq hüquq normalarına tam müvafiq surətdə həyata keçirilmişdir.

Bununla əlaqədar Avropa Parlamentinin üzvlərinə təkidlə müraciət etmək istərdik ki, R.Səfərovun Azərbaycana verilməsi məsələsində ölçülüb-biçilmiş və obyektiv mövqe tutsunlar, siyasi mülahizələrə əsaslanan birtərəfli yanaşmadan əl çəksinlər. Bu, həm Azərbaycan ilə Avropa İttifaqı arasında əməkdaşlığın yüksək səviyyəsinə, həm də Cənubi Qafqaz regionunda sülh və təhlükəsizlik yaradılması mənafelərinə daha çox uyğun gələrdi.

Nizami SƏFƏROV,

hüquq elmləri doktoru

Azərbaycan.-2012.- 18 sentyabr.- S.5.