Siyasi partiyaların birlikdə Azərbaycan xalqının iradəsini ifadə etmələri müsbət qiymətləndirilir

Sentyabrın 14-də Azərbaycanın siyasət tarixində nadir olan hadisələrdən biri baş verdi: Yeni Azərbaycan Partiyasının təşəbbüsü ilə iqtidarla müxalifət nümayəndələri hakim partiyanın qərargahında bir araya gələrək Ramil Səfərovun ekstradisiyası ilə bağlı qətnamə qəbul edən Avropa Parlamentinə etiraz müraciəti ünvanladılar.

Bu fakt onu sübut etdi ki, Azərbaycan ictimaiyyəti və siyasi partiyalar ümummilli məsələlərdə vahid mövqe sərgiləyə, eləcə də Ermənistan-Azərbaycan, Dağlıq Qarabağ münaqişəsinin həlli istiqamətində həmrəy ola bilərlər. Yeni Azərbaycan Partiyasının sədr müavini - icra katibi, Milli Məclisin deputatı Əli Əhmədov da bildirib ki, hakim partiya daim ictimai maraq doğuran bütün məsələlər ətrafında müxalifət partiyaları ilə müzakirələr aparmağa hazırdır. Avropa Parlamentinin məlum qətnaməsi isə Azərbaycanın bütün siyasi partiyalarının narazılığına səbəb olub.

Milli Məclisin deputatı, Milli Dirçəliş Hərəkatı Partiyasının (MDHP) sədri Fərəc Quliyev əməkdaşımızla söhbətində qeyd etdi ki, Azərbaycana qarşı qərəzli bir qətnamənin qəbul olunmasına ölkə ictimaiyyətinin ən tutarlı cavabı iqtidar və müxalifətdə olmasından asılı olmayaraq bütün qüvvələrin birgə rəyi oldu. Bunu çox təqdirəlayiq hal hesab edən deputatın fikrincə, artıq Azərbaycanda bir çox siyasi partiyaların arzu etdiyi vəziyyət yaranmağa başlayır: "Hakimiyyət uğrunda mübarizə aparmaq normal haldır. İnsanlar öz platforma, proqramları ilə alternativ göstərməyi bacarmalıdırlar. Ancaq ümummilli məsələlər ortaya çıxanda kimliyindən asılı olmayaraq bütün işlərdə milli mənafe öndə olmalı, hər kəs birlikdə olmağı bacarmalıdır. Milli mənafeyə uyğun addım atıldıqda hər kəs kimliyindən asılı olmayaraq onun qarşısında olmalıdır". Fərəc Quliyev onu da vurğulayıb ki, Avropa Parlamentinin Azərbaycana qarşı qərəzli davranışının qarşısında durmaq üçün ölkə ictimaiyyətinin həmrəyliyi vacibdir və bu da baş verdi.

Yeni Azərbacan Partiyasının təşkil etdiyi toplantıda MDHP-nin də nümayəndəsinin iştirak etdiyini deyən deputat belə məsələlərdə düşünmədən addım atacaqlarını bəyan edib: "Hesab edirəm ki, əgər Azərbaycanda siyasi təşkilatlar, vətəndaş cəmiyyətləri birgə davranış nümayiş etdirsələr və milli mənafeyi qorumaq üçün bunu həm də dünya ictimaiyyətinə göstərə bilsələr, heç bir qüvvə Azərbaycana təzyiq edə bilməyəcək. İqtidar-müxalifət birliyi çox uğurlu hadisədir və bundan sonra da davam etməlidir".

Milli Məclisin deputatı, Böyük Quruluş Partiyasının başqanı Fazil Mustafa isə qeyd edib ki, Avropa Parlamentinin Azərbaycanla bağlı qəbul etdiyi qətnamə birmənalı şəkildə qərəzlidir və bu qurum daha ciddi işlərlə məşğul olmaq əvəzinə bir tərəfin mövqeyini dəstəkləyir və onun təsiri altında qərar qəbul edir: "Bir ölkənin prezidentinin Xocalıda qətliam törətməsinə göz yuman və ona qarşı hər hansı bir sayğısız addım atmağı düşünməyən belə qurumlar indi bir Azərbaycan zabitinin qanuni şəkildə əfv olunmasına bu cür aqressiv mövqe nümayiş etdirirlərsə, bu, tamamilə tərəfli mövqedir. Bu mövqe isə Azərbaycan tərəfindən qətiyyən qəbul oluna bilməz və bu, insan haqlarına zidd yanaşmadır. Çünki bu qurumlar Azərbaycanla Ermənistan arasında fərq qoyur".

F.Mustafanın sözlərinə görə, bu tədbirin harada keçirilməsindən asılı olmayaraq, əsas mahiyyətdir. Belə məsələlərdə Azərbaycanda siyasi partiyaların bir araya gələrək münasibət bildirməsi çox müsbət haldır: "Ölkədə ümummilli məsələlərdə hamının rahatlıqla bir araya gəlib öz vətəndaş mövqeyini ifadə etməsi, siyasi partiya olaraq özünün məsələyə münasibətini dövlət mənafeyi baxımından birlikdə ortaya qoyması ancaq sevindiricidir. Mən bu ənənənin davam etməsini vacib hesab edirəm".

Partiya sədrinin fikrincə, burada həm hakimiyyətin, həm də müxalifətin üzərinə məsuliyyət düşür. Birlikdə Azərbaycan xalqının iradəsini dünyaya göstərmək nüfuzumuzun artmasına təsir göstərər".

Milli Məclisin deputatı, Ədalət Partiyasının sədri İlyas İsmayılov da hesab edir ki, Ramil Səfərovun ekstradisiyası beynəlxalq konvensiyaya uyğun həyata keçirilib və burada heç bir qanunauyğunsuzluq yoxdur. Amma Avropa Parlamenti bir daha Azərbaycana qarşı öz qərəzli mövqeyini nümayiş etdirib: "Bu qətnamə obyektiv deyil və siyasi mülahizələrə əsaslanan birtərəfli yanaşmadır". Onun sözlərinə görə, beynəlxalq birlik daim Azərbaycana ikili standartlarla yanaşıb, amma Ermənistanın terrora dəstək verən bir dövlət olduğunu bilə-bilə heç bir qətnamə, müraciət qəbul edilməyib. Deputat qeyd edib ki, Azərbaycanın siyasi partiyalarının bu məsələdə də birlikdə olması dünyaya bir mesaj oldu: "Azərbaycanın bütün siyasi partiyaları ümummilli məsələlərdə vahid mövqe nümayiş etdirməyi bacarır və bu, ölkə ictimaiyyəti tərəfindən müsbət qarşılanır. Bizim partiya da həmin toplantıda iştirak etdi və Avropa Parlamentinə göndərilən müraciətə imza atdıq. Biz bütün ümummilli məsələlərdə hər kəslə həmrəy olmağa daim hazırıq. Bilirəm ki, Ermənistan-Azərbaycan, Dağlıq Qarabağ münaqişəsinin həlli məsələsində bu, eyni cür olacaq. Xalq birlikdə öz sözünü deyərsə, beynəlxalq birlik Azərbaycanın haqq səsini eşidər".

Rəşad BAXŞƏLİYEV

Azərbaycan.-2012.- 19 sentyabr.- S.6.