Sözlə musiqinin qoşa qanadı birgə anılıb

Əsrlər öncə xalqımızın söz xəzinəsinə incilər bəxş edən dahi Nizami Gəncəvinin anadan olmasının 870 illiyinin ölkəmizin hər guşəsində yüksək səviyyədə keçirildiyi bu günlər daha bir əlamətdar hadisə ilə - IV Üzeyir Hacıbəyli Beynəlxalq Musiqi Festivalı ilə tarixə çevrilməkdədir. Korifey sənətkarlarımızın - söz və milli musiqi sənətimizin banilərinin əsərlərinin dünyanın bir çox qütblərinə qanad açdığı bu günlərdə respublikamızın əksər mədəniyyət və incəsənət müəssisələrində keçirilən tədbirlər silsilə xarakter alıb.

Mədəniyyət və Turizm Nazirliyi ilə Azərbaycan Milli Kitabxanasının birgə layihəsi əsasında keçirilən "Musiqimizin Üzeyir dünyası" kitab sərgisi ilə SD-nin təqdimatı da bu qəbildən olan tədbirlərdən biri kimi xarakterizə edilib. Azərbaycan Milli Kitabxanasının direktoru Kərim Tahirov tədbirdə qonaqlara hər iki korifey sənətkarın yaradıcılığının mahiyyəti və mənəviyyatın kamilləşməsindəki rolundan söz açıb. O bildirib ki, bu əlamətdar hadisə Azərbaycan Respublikası Prezidentinin "Üzeyir Musiqi Gününün keçirilməsi haqqında" 1995-ci il 18 sentyabr tarixli fərmanına uyğun olaraq qeyd olunur. 2009-cu ildən başlayaraq isə hər ilin sentyabr ayında dahi bəstəkar, Azərbaycan professional musiqisinin banisi Üzeyir bəy Hacıbəyliyə həsr olunmuş Beynəlxalq Musiqi Festivalı keçirilir.

Respublikamızın musiqi ictimaiyyəti nümayəndələrinin iştirak etdiyi tədbirin aparıcısı onu da xüsusi olaraq qeyd edib ki, bu gün söz dühası Nizami Gəncəvi ilə peşəkar milli musiqimizin banisi Üzeyir bəy Hacıbəylini bir-birinə bağlayan hər iki sahənin incilərindən ibarət sənət əsərləri yaratmaları olub. Kitabxananın kollektivi də bu əlamətdar hadisəyə öz töhfələrini vermək üçün Mədəniyyət və Turizm Nazirliyi ilə birgə layihə üzərində çalışıb. Nəticədə dahi Nizaminin sözlərinə Üzeyir Hacıbəylinin yazdığı musiqilərdən ibarət SD hazırlanıb.

Bəstəkarlar İttifaqının katibi, xalq artisti Eldar Mansurov, Mədəniyyət və Turizm Nazirliyinin şöbə müdiri, şair-publisist Vaqif Bəhmənli, Üzeyir Hacıbəylinin ev muzeyinin direktoru Sərdar Fərəcov, Musiqi Mədəniyyəti Myzeyinin direktoru Alla Bayramlı, Musiqi Akademiyasını təmsil edən Nazim Kazımov və digərləri sözlə musiqinin qoşa qanadlarının bundan sonra da daim birgə anılacağını vurğulayıblar.

Musiqi bayramı

Üzeyir Hacıbəyli Beynəlxalq Musiqi Festivalı çərçivəsində dahi bəstəkarın anadan olmasının 127 illiyi münasibətilə Azərbaycan Dövlət Mədəniyyət və İncəsənət Universitetinin Musiqi sənəti fakültəsində də tədbir keçirilib. Sənətşünaslıq elmləri üzrə fəlsəfə doktoru, dosent Ellada Hüseynova tədbiri açıb. O, sözün əsl mənasında, "musiqi bayramı" adlandırılan tədbirin iştirakçılarını - müəllim və tələbələri bu əlamətdar gün münasibətilə təbrik edib. Tədbirdə çıxış edən sənətşünaslıq elmləri üzrə fəlsəfə doktoru, dosent Kamilə Dadaşzadə isə dahi bəstəkarın həyat və yaradıcılığından, özünün bu sahədə tədqiqatlarından danışıb.

Tədbirdə iştirak edən xalq artisti, Muğam kafedrasının müdiri, professor Canəli Əkbərov, İnstrumental ifaçılıq kafedrasının müdiri, dosent Gülağa Zeynalov, Musiqi fənləri və dirijorluq kafedrasının müdiri, əməkdar incəsənət xadimi, dosent Sonaxanım İbrahimova bəstəkar haqqında, həmçinin ölməz sənətkarın bədii irsinə son illər dövlət və ictimaiyyət tərəfindən verilən yüksək qiymətdən söz açıblar.

Festival çərçivəsində keçirilən tədbirin sonunda Gülağa Zeynalovun rəhbərliyi ilə xalq çalğı alətləri orkestrinin ifasında daim musiqilərində yaşayacaq dahi bəstəkarın "Ləzgi rəqsi" əsəri, "Arşın mal alan" operettasından nömrələr səsləndirilib. Universitetin müəllimlərindən Minisə Yaqubova (skripka) S.Raxmaninovun "Vokaliz", Seyidxanım Babayeva (fortepiano) F.Şopenin I və III nömrəli balladalarını ifa ediblər.

Məhəmməd NƏRİMANOĞLU

Azərbaycan.- 2012.- 20 sentyabr.- S. 11.