«Mən sülh elçisiyəm» mövzusunda rəsm sərgisi açılmışdır

Azərbaycan Respublikasının İnsan Hüquqları üzrə Müvəkkili (Ombudsman) Aparatının təşəbbüsü ilə ölkəmizdə elan edilmiş "Sülh aylığı" çərçivəsində sentyabrın 21-də Tofiq İsmayılov adına "Uşaq dünyası" rəsm qalereyasında "Mən sülh elçisiyəm" mövzusunda rəsm sərgisi açılmışdır.

AzərTAc xəbər verir ki, Beynəlxalq Sülh Gününə həsr olunmuş sərginin açılış mərasimində dövlət qurumlarının, beynəlxalq və qeyri-hökumət təşkilatlarının nümayəndələri iştirak etmişlər.

"Mən sülh elçisiyəm" rəsm sərgisi ilə ölkəmizdə avqustun 21-dən sentyabrın 21-dək davam edən, artıq ənənə halını almış "Sülh aylığı"na yekun vurulmuşdur.

Sərginin açılışını bildirən rəmzi lenti kəsən Azərbaycan Respublikasının insan hüquqları üzrə müvəkkili Elmira Süleymanova sülhün bəşəriyyət üçün ən vacib və qiymətli məfhum olduğunu vurğulamışdır. E.Süleymanova Beynəlxalq Sülh Günü münasibətilə tədbir iştirakçılarını təbrik etmiş, ənənə halını almış tarixi günün əhəmiyyətindən danışmışdır.

Ombudsman bildirmişdir ki, torpaqlarının 20 faizi işğal olunmuş, bir milyondan artıq qaçqın və məcburi köçkününün üçdəbirini uşaqlar və gənclər təşkil edən, 100 minlərlə insanı çadırlarda dünyaya göz açmış ölkəmizdə sülh mövzusu xüsusilə aktualdır. Bu təəssüfedici məqamlara baxmayaraq, biz bütün hallarda sülh və əmin-amanlıq tərəfdarıyıq və ümid edirik ki, tezliklə belə əlamətdar günləri azad edilmiş torpaqlarımızda qeyd edəcəyik.

UNICEF-in Azərbaycandakı nümayəndəsi Mark Hervord sülhün bəşəriyyət üçün önəmli olduğunu vurğulamışdır.

M.Hervord qeyd etmişdir ki, uşaqlar və sülh bir-biri ilə sıx bağlı olan mövzulardır. Uşaqlar ürəklərində sülhməramlıdırlar və bununla da bəşəriyyəti sabit gələcəyə aparırlar. Sərgidə nümayiş olunan sülh mövzusundakı əsərlərə baxdıqca belə bir nəticəyə gəlirik ki, gələcəkdə dünyada sülh bərqərar olacaqdır.

Sərgidə nümayiş etdirilən əsərlər arasında "Sülh", "Ailə səadəti", "Sülhün carçısı olan göyərçinlər" və s. mövzulardakı əl işləri diqqəti daha çox cəlb edir.

Sərgiyə baxışdan sonra "Mən sülh elçisiyəm" uşaq rəsm müsabiqəsinin iştirakçılarına və qaliblərə ombudsmanın sertifikatları və hədiyyələr təqdim edilmişdir.

Azərbaycan.-2012.- 22 sentyabr.- S. 5.