Biz xarici siyasətdə, iqtisadi və texnologiyalar sahəsində hadisələri qabaqlamalıyıq

Bu, dövlət başçısının qarşıya qoyduğu mühüm vəzifədir

Hər il ölkəmizlə sıx münasibətlər qurmaq istəyən dövlətlərin sayı artmaqdadır. Səbəb Azərbaycanın xarici diplomatiyasının fəallığı və dünyada nüfuzunun durmadan artmasıdır. Dövlətimizin ölçülüb-biçilmiş və milli mənafelərin qorunmasına xidmət edən xarici siyasət kursunun işlənib hazırlanması və reallaşdırılması istiqamətlərini ulu öndər Heydər Əliyev müəyyən edib. Bu gün bu sahədə, həm də digər sahələrdə müəyyən edilmiş strateji xətt uğurla icra edilir. Azərbaycan xarici siyasətini hər bir ölkə ilə bərabərhüquqlu və xoşniyyətlər əsasında formalaşdırır. Bu, dostcasına, qarşılıqlı, hörmət və əməkdaşlıq şəraitində baş tutur.

Azərbaycanın xarici siyasətindən söz düşərkən beynəlxalq analitiklər iqtisadiyyatı, xüsusilə də, neft amilini ölkəmizin dünyaya açılan pəncərəsi kimi qiymətləndirirlər. Əlbəttə, neft və qaz kəmərlərinin, digər müvafiq infrastrukturun tikintisi də daxil olmaqla Azərbaycanın neft sektorunun inkişafı ölkəmizin xarici siyasətinin formalaşdırılmasında böyük rolu olub. Regional və qlobal əməkdaşlıq üçün böyük imkanlar yaranıb. Bakı-Supsa, Bakı-Tbilisi-Ceyhan neft kəmərləri və Cənubi Qafqaz qaz kəməri kimi regional infrastruktur layihələrin uğurla həyata keçirilməsi ilə nəticələnən beynəlxalq əməkdaşlıq Cənubi Qafqaz regionunun əhəmiyyətini artırmış, qlobal enerji təhlükəsizliyinə töhfə vermiş, Avropa üçün yeni həyati əhəmiyyətli enerji mənbələrinin əsası qoyulmuşdur. Azərbaycanın karbohidrogen ehtiyatları strateji coğrafi mövqedə yerləşməsi ilə birlikdə ölkəmizi, əhəmiyyətli enerji mənbəyinə və beynəlxalq əhəmiyyətli enerji təchizatı sisteminin vacib tərkib hissəsinə çevirmişdir. Bu gün Azərbaycan dünyaya sübut edir ki, gələcəyini özü müəyyən edir. Bölgədə onun iştirakı və razılığı olmadan heç bir qlobal layihə rellaşa bilməz. Azərbaycan dünyanın mədəniyyət paytaxtına çevrilib. Ən mötəbər qlobal mədəni tədbirlər bu ölkədə və onun bölgələrində reallaşdırılır. Çünki mədəniyyət insanları daha da yaxınlaşdırır, onları xeyirxah düşünməyə və davranmağa vadar edir.

Bu gün Azərbaycanın uğurlu xarici siyasətinin real konturları özünü xarici diplomatik korpuslarımızın fəaliyyətində göstərməkdədir.

Xarici İşlər Nazirliyinin Diplomatik Akademiyasının yeni açılmış kompleksində keçirilmiş Azərbaycanın diplomatik xidmət orqanları rəhbərlərinin dördüncü geniş müşavirəsində bu məsələlər müzakirə olunub. Müşavirədə çıxış edən Prezident İlham Əliyev Azərbaycanın çevik, sürətlə inkişaf edən xarici siyasətindən bəhs etdi.

Zərurətdəndir ki, son illər xarici ölkələrdə səfirliklərimizin, diplomatik nümayəndəliklərimizin sayı durmadan artır. Bu da dövlətimizin dünyada mövqeyinin genişlənməsi və söz sahibi olmasının nişanəsidir. Dövlət başçısı çıxışına yenə də ağrılı problemimiz olan Ermənistan-Azərbaycan, Dağlıq Qarabağ münaqişəsinin həlli məsələsindən başladı: "Bu bizim nəinki xarici siyasətdə, ümumiyyətlə, ölkəmizin qarşısında duran ən mühüm məsələdir. Məsələ uzun illərdir ki, öz həllini tapmır, beynəlxalq hüquq normaları pozulur, ədalətsizlik davam edir. Səfirliklərin bu istiqamətdə fəaliyyəti məqsədyönlüdür. Dünyadakı dostlarımızın, dost ölkələrin sayı artmaqdadır. Beynəlxalq təşkilatlarda Dağlıq Qarabağ məsələsinə dair ədalətli, yəni, maraqlarımızı təmin edən qətnamələr kifayət qədər qəbul edilmişdir. BMT Təhlükəsizlik Şurasının dörd qətnaməsi, ATƏT-in qərarları, digər beynəlxalq təşkilatların-İslam Əməkdaşlıq Təşkilatının, Avropa Parlamentinin, Avropa Şurasının, Qoşulmama Hərəkatının qətnamələri, NATO-nun qərarları, yəni, hüquqi baza kifayət qədər genişdir, möhkəmdir və sarsılmazdır. Münaqişənin həlli üçün ilk növbədə hüquqi baza möhkəm olmalıdır. Bu məsələ ilə bağlı Ermənistanın mövqeləri çox zəifdir. Bizim mövqelərimiz isə çox güclüdür".

Ermənistan ilə Azərbaycan arasında hər sahədə fərq getdikcə artır. İqtisadiyyatımız heç müqayisəyə gəlməz. Hərbi xərclərimiz Ermənistanın bütün büdcəsindən iki dəfə artıqdır. Xarici yardımlar, ianələr olmasa, Ermənistanın iqtisadiyyatı çökər. Demoqrafik vəziyyət də acınacaqlıdır. Lakin bu terrorçu dövlət qonşusuna qarşı torpaq iddiasından əl çəkmir. Azərbaycan isə məsələnin qan tökülmədən, sülh şəraitində həll olunmasının tərəfdarıdır. Lakin bir yerə qədər. Ölkə rəhbəri bu fikri çıxışında xüsusilə vurğuladı: "Biz torpaqlarımızı geri istəyirik. Nəyin bahasına olursa-olsun, sülh olsun yanaşmasını biz qəbul etmirik. Yəni məsələnin dondurulması mümkün deyildir. Ermənistan təbii, istəyir ki, məsələ dondurulsun, status-kvo pozulmasın, danışıqlar aparılsın, necə deyərlər, heç bir nəticə əldə edilməsin. Ermənistanın riyakar mövqeyi, yalançı vədləri imkan vermədi ki, biz razılaşmaya nail olaq. Yəni, bizim üçün sirr deyildir, Ermənistan çalışır ki, məsələni dondursun, nə qədər mümkünsə məsələni uzatsın. Mən dəfələrlə bizim tərəfdaşlara bu barədə fikirlərimi demişəm. Biz də sülh istəyirik, amma bir daha demək istəyirəm ki, ilk növbədə, vətəndaşlarımız işğal edilmiş torpaqlara qayıtmalıdır..."

Prezident xarici siyasətlə bağlı digər mühüm vəzifə kimi Xocalı soyqırımının dünyada tanıdılması istiqamətində işləri davam etdirməyi tapşırdı. "Çalışmalıyıq ki, Xocalı soyqırımı müxtəlif səviyyələrdə tanınsın" - deyən dövlət başçısı bildirdi ki, vaxt gələcək Xocalı soyqırımını törədənlər qanun qarşısında cavab verəcəklər.

Qeyd olunduğu kimi, xarici əlaqələrin genişlənməsində dostluq münasibətləri, qarşılıqlı anlaşma və iqtisadi mövzuların önə çəkilməsi çox vacibdir. Azərbaycan özünün investisiya siyasətində dəyişikliklər edir, yeni ünvanlarda sərmayə yatırır. İqtisadi böhrana görə son illər dünyada Azərbaycanın investisiyalarına, maliyyə resurslarına böyük ehtiyac yaranıb. Dövlət başçısı diplomatik xidmət orqanlarının işçilərinə xüsusilə tövsiyə etdi ki, səfirlər bu sahədə daha fəal olmalıdırlar. Çünki inkişaf etmiş ölkələr daim öz şirkətlərinə başqa ölkələrdə yaxşı vəziyyətin yaradılması üçün səylər göstərirlər ki, burada da səfirlərin rolu danılmazdır. Diaspor təşkilatlarının dünyada daha da genişlənməsinin vacibliyindən danışan ölkə rəhbəri bildirdi ki, bizim üçün diaspor təşkilatlarının fəaliyyəti, xüsusilə Ermənistan-Azərbaycan, Dağlıq Qarabağ məsələsi ilə bağlı çox önəmlidir. Bu istiqamət daim diqqət mərkəzində olmalıdır: "Media ilə əlaqələr daha fəal qurulmalıdır. Çünki hələ ki, erməni lobbisinin təhriki ilə hərdən-bir Azərbaycana qarşı əsassız ittihamlar səslənir. Biz bilirik, bu haradan qaynaqlanır. Əlbəttə, bu cür çirkin yazıların birinci mənbəyi erməni lobbisidir. Çünki erməni lobbisi, dünya erməniliyi Azərbaycanı bir nömrəli hədəf seçibdir. Yəni bu reallıqdır, bu belədir. Çünki başa düşürlər ki, onlar üçün bir nömrəli təhlükə məhz Azərbaycandır".

Azərbaycan Prezidenti hər bir sahədə olduğu kimi, xarici siyasətdə də ləngliyi inkişafı durduran amil kimi səciyyələndirdi: "Çünki həllini gözləyən məsələlər çoxdur. Dünya dinamik şəkildə inkişaf edir və hətta bir ay, bir həftə də gözləmək olmaz. Biz xarici siyasətdə, iqtisadi sahədə, texnologiyalar sahəsində hadisələri qabaqlamalıyıq. Bax, bu gözəl Diplomatik Akademiyanın üstünlüklərindən biri də odur ki, burada ən müasir texnologiyalar tətbiq olunur. Gənclərimiz bu texnologiyalar əsasında təhsil alacaqlar. Yəni yeni texnologiyalar, kosmik sənayenin inkişafı. Bəzilərinə təəccüblü gəlir ki, Azərbaycan kimi ölkədə kosmik sənaye necə ola bilər? Niyə də olmasın? Bizim istedadlı kadrlarımız, maliyyə resurslarımız və gələcəyə baxışımız vardır. Ona görə də bir addım da yavaşımayacağıq..."

Bu cəsarətli çıxışlardan göründüyü kimi, Azərbaycan Prezidenti İlham Əliyevin rəhbərliyi altında həyata keçirilən və əsası Heydər Əliyev tərəfindən qoyulmuş Azərbaycanın xarici siyasəti dünya ictimaiyyətinin bütün xoşməramlı üzvlərilə qarşılıqlı faydalı münasibətlərin hərtərəfli inkişaf kursuna möhkəm sadiqliyini nümayiş etdirməkdədir. Bu siyasət Azərbaycanın çiçəklənməsinə, milli maraqlarının qorunmasına, dünyada bəlli bir məqama sahib olmasına və ən əsası, vətəndaşlarının rifah içində yaşamasına istiqamətlənib. Kompleks və çoxşaxəli xarakter daşıyan bu proses çərçivəsində aparılan diplomatik fəaliyyət bir neçə əsas istiqamətdən ibarətdir. Bütövlükdə isə onlar Azərbaycanın xarici siyasətini təşkil edirlər.

Rəsmiyyə RZALI

Azərbaycan.-2012.- 23 sentyabr.- S. 2.