Avropada Ermənistanın terror qruplaşmaları fəaliyyət göstərir

Amma dünya birliyi buna göz yumur

Azərbaycan ordusunun zabiti Ramil Səfərovun ekstradisiyası və əfv olunması işğalçı Ermənistan dövlətinin əsl niyyətini, iç üzünü bir daha dünyaya göstərdi. Hər kəsə bəllidir ki, Azərbaycan torpaqlarının 20 faizini işğal edən bir ölkə təcavüzkar və terrorizmi himayə edən bir dövlətdir. Bu gün terrorizm, ekstremizm Ermənistanda dövlət siyasəti səviyyəsinə yüksəldilib. ASALA terror təşkilatının isə Azərbaycanın Macarıstandakı və digər ölkələrdəki diplomatik korpuslarına qarşı hədələri təsadüfi deyil. Bu, Ermənistanın Azərbaycana qarşı dövlət səviyyəsində apardığı terrorçuluq siyasətinin növbəti təzahürüdür.

ASALA-nın Azərbaycana qarşı təhdidləri Ermənistan prezidentinin çağırışından sonra baş verdi. Bu isə o anlama gəlir ki, bütün bunlar bir mərkəzdən idarə olunur. Tarix göstərib ki, bu hədələr real hədələrdir və yüzlərlə insan erməni terrorçuları tərəfindən qətlə yetirilib. Beynəlxalq təşkilatlar, Avropa və dünyanın böyük dövlətləri də Ermənistanın himayə etdiyi ASALA və digər terrorçu qruplaşmaların törətdikləri cinayət əməllərindən, terror aktlarından xəbərdardırlar. Ancaq Azərbaycana qarşı beynəlxalq təşkilatların ikili standartlar "oyunu" bu məsələdə də özünü büruzə verir. Daim insan hüquq və azadlıqlarının müdafiəçisi kimi çıxış edən Avropa Parlamenti 8 il Macarıstanda həbsdə yatdıqdan sonra azadlığa çıxan Ramil Səfərovun əfv olunmasına etiraz edir, ancaq ASALA-nın azərbaycanlıları ölümlə təhdid etməsindən heç bir narahatçılıq keçirmir. Bu terrorçu qruplaşmaların tək Azərbaycan üçün deyil, bütün Avropa üçün də təhlükə mənbəyi olduğu halda, Ermənistana təzyiqlər edilmir. Eyni zamanda, erməni terror qruplaşmalarının törətdikləri qanlı cinayətlərin tarixi də uzaq keçmişə aid deyil. 1980-90-cı illər ərzində Avropanın müxtəlif ölkələrində həyata keçirilən terror aktları, qanlı hadisələr yaddaşlardan silinməyib. Əgər kimlərsə bu terrorçu qruplaşmaların fəaliyyətini, çirkin əməllərini unudublarsa, onları bir daha xatırlatmağa məcburuq.

ASALA-nın yaranma tarixi və fəaliyyəti ilə bağlı saysız-hesabsız məqalələr, yazılar, faktlar qəzetimizdə dərc edilib. 1970-ci illərin ortalarında daşnaklar bir sıra müstəqil terrorçu təşkilatlar yaradıblar və onların arasında "Ermənistanın Azadlığı uğrunda Gizli Erməni Ordusu" ("Armenian Secret Armi for the Liberation of Armenia"- ASALA") fəallığı ilə diqqəti cəlb edir. ASALA dünyanın bir sıra ölkələrindəki sol ekstremist və millətçi hərəkatları dəstəkləyir. Ümumdünya Kilsələr Şurası binasının partladılması ilə fəaliyyətə başlayan erməni terror təşkilatı yüzlərlə insanın həyatına son qoymuşdur. ASALA-nın bir qrup üzvü Hilbert Minasyan, Monte Melkonyan, Varujan Karapetyan, Vazgen Sislyan Dağlıq Qarabağ münaqişəsi zamanı qanunsuz erməni silahlı birləşmələrinin tərkibində vuruşublar. 1990-cı illərin əvvəllərində təşkilatın fəaliyyətinin bir qədər zəifləməsi müşahidə olunub, qurumun bəzi üzvləri yeni yaranmış terrorçu qruplaşmalara, o cümlədən "Verj" ("Qisas") hərəkatına üzv olublar. Bu yeni yaranan qruplaşma Rusiya Federasiyasının Şimali Qafqaz bölgəsində və Rostov vilayətində əməliyyatlar keçirmiş, xüsusən də Azərbaycan istiqamətində hərəkət edən qatarlarda terror aktları törətmişlər. Mövcud məlumatlara görə, ASALA-nın liderləri Ermənistan siyasi rəhbərliyi, eləcə də işğalçı ölkənin xüsusi xidmət orqanları ilə mütəmadi məsləhətləşmələr aparırlar.

Onu da xatırladaq ki, SSRİ dağıldıqdan sonra erməni terrorçuluğu öz fəaliyyət istiqamətini dəyişərək "Qarabağ ermənilərinin müqəddəratı uğrunda mübarizə" adı altında Azərbaycana qarşı işğalçılıq siyasətinin alətinə çevrilib. Bu fonda Yerevanda Türkiyə rəsmilərinə qarşı terrorçuluq aktları həyata keçirmələrinə görə ittiham olunan ermənilərə dövlət səviyyəsində dəstək kampaniyası təşkil edilib.

Qarabağ ermənilərinin "öz müqəddəratını həlletmə", "münaqişənin ədalətli həlli", eləcə də "tarixi hüquqları" uğrunda mübarizəsinin güclənməsi fonunda Ermənistan hökuməti tərəfindən bölgəyə ASALA-nın yeni üzvlərinin göndərilməsi istiqamətində tədbirlər görülüb.

Ermənistanın azərbaycanlılara qarşı dövlət səviyyəsində yürütdüyü terrorçuluq siyasətinin nəticəsi olaraq 1989-1994-cü illərdə Dağlıq Qarabağda erməni terrorçuları tərəfindən nəqliyyat vasitələrində 29 terror aktı törədilib, 2 mülki vertolyot və 2 təyyarə vurulub. Erməni terrorçularının başlıca hədəfləri ictimai nəqliyyat, o cümlədən metro, avtobus, təyyarə, körpülər, diplomatik nümayəndəliklər, eləcə də dinc əhalinin sıx toplaşdığı yerlər olub.

Digər erməni terrorçu qruplaşmaları olan "Erməni Soyqırım Ədalət Komandosları" ("Justice Commandos of the Armenian Genocide"- "JCAG") da 1975-ci ildə Beyrutda yaradılıb və bu təşkilatın əsas məqsədi Şərqi Türkiyə də daxil olmaqla müstəqil Ermənistan dövlətini yaratmaq olub. 1983-cü ildən isə "Erməni İnqilab Ordusu" ("Armenian Revolutionary Army"- "ARA") adı altında çıxış etməyə başlayıb. Öz fəaliyyətində marksist ideyalarını üstün tutan JCAG daha millətçi mövqedən çıxış edir. Mətbu orqanı "Yerevan" qəzetidir. Əsas terror hədəfləri türk diplomatları, türklərə məxsus müəssisə və obyektlərdir. Bəzi məlumatlara görə, "ARA"-nın mənzil-qərargahı Fransada yerləşir.

"Gizli Erməni Azadlıq Təşkilatı" ("Secret Armenian Liberation Organization") 1975, "Erməni Azadlıq Cəbhəsi" ("Armenian Liberation Front" - "ALF) isə 1979-cu illərdə yaradılıb. "ALF" faktiki olaraq ASALA tələfindən idarə olunur və Türkiyə, Dağlıq Qarabağda təxribatlar törətmək məqsədi ilə silahlıların hazırlanmasında fəal iştirak edib.

"Erməni Birliyi" ("Armenian Unity" - "AU") 1988-ci ildə Moskvada Vazgen Sislyan tərəfindən yaradılıb. Bu təşkilat ASALA-nın silahlı basqınlarının maddi təminatı, muzdluların cəlb edilməsi və silahlandırılması məsələləri ilə məşğul olur.

"Dağlıq Qarabağın İnqilabi İdarə Olunması Komitəsi" ("KRUNK") 1987-ci ildə Xankəndidə qeyri-qanuni olaraq xarici erməni diasporunun iştirakı ilə yaradılıb. "Erməni Azadlıq Təşkilatı" ("Armenian Liberation Movement" - "ALM") isə 1991-ci ildə Fransada təsis edilib. "ALM" terror aksiyalarının təşkili və həyata keçirilməsi istiqamətində ASALA ilə sıx əməkdaşlıq edir.

"9 İyun Qrupu" ("9 June Group) 1991-ci ildə yaradılıb və İsveçrədə fəaliyyət göstərir. Qrupun əsas məqsədi kimi həbs və məhkum olunmuş erməni terrorçuların müəyyən dövlətlərə qarşı terror aktları törətmək yolu ilə azadlığa buraxılmasına nail olmaqdır.

"Erməni Müqavimət Təşkilatı" (Armenian Resistance Organization") 1977-ci ildə Parisdə yaradılıb.

Xankəndidə yaradılan "Dağlıq Qarabağın İnqilabi İdarə Olunması Komitəsi"nin "KRUNK"-un sıralarında Yaxın Şərqdən olan muzdlular da döyüşüblər. Qurumun ideoloji bölməsinə isə sabiq Ermənistan prezidenti Robert Köçəryan rəhbərlik edib. Hazırda təşkilat dünyanın bir çox ölkələrində Dağlıq Qarabağ münaqişəsinin tarixi və qondarma "erməni soyqırımı"na dair materialların yayılması ilə məşğul olan erməni mədəniyyət mərkəzi kimi fəaliyyət göstərir.

Göründüyü kimi, Avropanın bir çox ölkələrində, şəhərlərində işğalçı Ermənistanın terrorçu qruplaşmaları fəaliyyət göstərir. Ancaq dünya birliyi buna, insanlara qarşı ölüm təhdidlərinə göz yumur.

Rəşad BAXŞƏLİYEV,

Azərbaycan.-2012.- 21 sentyabr.- S.4.