Azərbaycan ən mötəbər turnirlərə ev sahibliyi edəcək imkana malikdir

Dünyanın 5 qitəsindən olan gənc jurnalistlər Bakıya valeh oldular

Son illərdə beynəlxalq tədbirlərin, siyasi toplantıların, mədəniyyət yarışlarının əsas ünvanlarından birinə çevrilmiş Azərbaycan daha bir mötəbər idman turnirinə ev sahibliyi edir. Bakıda "On bir ürək, bir istək " şüarı adı altında FİFA U-17 qadınlararası dünya çempionatı keçirilir.

Oktyabrın 13-dək davam edəcək mundial çərçivəsində bir sıra tədbirlər də təşkil olunur. Onlardan biri də Bakıda Beynəlxalq İdman Jurnalistləri Assosiasiyası (AİPS), Azərbaycan Respublikası Gənclər və İdman Nazirliyi və Milli Olimpiya Komitəsinin dəstəyi ilə gənc idman jurnalistləri üçün keçirilən tədris proqramıdır. 23 gün davam edəcək "Gənc Jurnalistlər Proqramı"na AİPS-in 5 qitədən - Afrika, Asiya, Amerika, Okeaniya və Avropadan 19-25 yaşlar arasında 20 nəfər gənc jurnalist cəlb olunmuşdur. Onlar Bakıda 17 yaşadək qızlar arasında futbol üzrə dünya çempionatının qarşılaşmalarını birlikdə izləyir, təmsil etdikləri KİV üçün məqalələr hazırlayırlar.

Paytaxtımızda təşkil olunmuş tədris proqramında iştirak etdiyimizdən dünyanın müxtəlif ölkəsindən gələn gənc jurnalistlərlə söhbət edib, onların Azərbaycanla bağlı fikirlərini öyrəndik.

Keir RADNEDGE, İPS-in futbol komitəsinin rəhbəri: "Azərbaycan çox gözəl ölkədir. AİPS-in gənc jurnalistləri U-17 qadınlararası futbol çempionatını yerində izləmək üçün Bakıya dəvət etməsi alqışlanmalıdır. Çünki onlar burada çempionatı izləməklə yanaşı, tədris proqramında bir çox yeniliklərin şahidi olur. Fürsətdən istifadə edərək AİPS-in prezidenti Covanni Merloya və yaradılan yüksək şəraitə görə isə Azərbaycan Respublikası Gənclər və İdman Nazirliyinə, Milli Olimpiya Komitəsinə dərin təşəkkürümü bildirmək istərdim. Bakıya isə ilk dəfədir səyahət edirəm. Necə gözəl və möhtəşəm bir şəhər olduğunu "Eurovision" mahnı müsabiqəsində televiziya vasitəsilə izləmişdim. İndi isə bunun şahidi oluram. Tarixilik və müasirlik bir arada cəm olub. Həm Qərb, həm də Şərq elementləri sintez təşkil edir. İnsanlar gülərüz və mehribandır. Təhlükəsizlik baxımından dünyanın ən rahat yaşanacaq ölkələrindən biridir. Ölkənizdə qısa müddət ərzində idman sahəsində əldə edilən uğurlar təqdirəlayiqdir. Burada son illərdə futbolda da böyük bir inkişaf nəzərə çarpmaqdadır. Bakının "Neftçi" klubunun UEFA Avropa Liqası yarışlarının qrup mərhələsinə yüksəlməsi və ilk turda Serbiyanın "Partizan" komandası ilə heç-heçə oynaması Azərbaycanda idmanın bu növünün inkişaf mərhələsində olmasından xəbər verir. Dünyanın tanınmış hakimi Tofiq Bəhramov və hücumçusu Anatoli Banişevskinin adları isə Azərbaycanın futbol tarixində qızıl hərflərlə yazılmışdır. Sonda onu əminliklə söyləyə bilərik ki, Azərbaycan gələcəkdə daha böyük mundiallara ev sahibi edəcək gücə və imkana malikdir".

Anxel QONZALES, Meksika, "Frontera" qəzeti: "Mən Meksikadanam. Avropaya ilk dəfədir ki, səyahət edirəm. Bundan əvvəl Azərbaycan haqda ancaq internet vasitəsilə məlumat əldə etmişdim. Lakin ölkəniz, xüsusilə paytaxt Bakı barədə heç bir təsəvvürə malik deyildim. Lakin Bakıya qədəm qoyduqdan sonra tam əminliklə deyə bilərəm ki, paytaxtınız çox gözəl şəhərdir, gözəl görkəmi ilə Avropanın ən qabaqcıl şəhərləri ilə bir sırada dayanmağa layiqdir. Eyni zamanda, müşahidə etdim ki, Bakı keçmişlə müasirliyin vəhdətidir. Ona görə ilk dəfədən Bakı haqqında təəssüratım çox yüksək oldu. İnsanları isə çox mehribandır. Bakıda qonaqpərvərliyin şahidi oldum. Çalışacağam bundan sonra Azərbaycana yenə də səfər edim. Yaxın günlərdə ölkənizin regionlarına da səfər etməyi planlaşdırırıq. Oralardakı gözəlliklərin də şahidi olacağımızdan əminik".

Radnage KRİSTİAN, İngiltərə, Olimpiya Oyunları ilə bağlı sayt: "Bu gün Azərbaycanda olduğumuza görə özümüzü çox xoşbəxt hiss edirik. Açığı, ölkənizə əvvəllər gəlmədiyim üçün bura ilə əyani tanışlığım yox idi. Lakin gördüm ki, Azərbaycan, doğrudan da görməli və gəzməli yerdir. Bakıda olduğum qısa müddət ərzində ölkənizə valeh olmuşam. Sizin insanlarda olan mehribanlığı, səmimiliyi dünyanın heç bir ölkəsində görməmişəm. Bunları heç bir zaman unutmayacam. Bakının özünəməxsus ənənələri var, memarlıq abidələri ilə zəngindir. Sizin gözəl və rəngarəng təbiətiniz də var. Qonaqpərvərliyiniz isə çox məşhurdur. Azərbaycanın U-17 qadınlararası dünya çempionatının hazırlığına isə söhbət ola bilməz. Biz jurnalistlərin rahat çalışması üçün gözəl şərait yaradılıb".

Al Massalmeh NADİA, Almaniya, "Algemeine" qəzeti: "Müstəqilliyinin 20-ci ilini qeyd etmiş bir ölkənin qısa müddət ərzində böyük bir inkişafa imza atması təqdirəlayiqdir. Məni cəlb edən ən əsas məqam ölkənizin müasirliyidir. Demək olar ki, artıq 3 günə yaxındır ki, buradayam. Bircə onu fikirləşirəm ki, görəsən, dünya çempionatı yekunlaşdıqdan sonra Bakıdan necə ayrılacağam (gülür). Bir neçə ay bundan əvvəl Bakını "Eurovision" mahnı müsabiqəsi zamanı televiziya vasitəsilə izləmiş və ölkənizə heyran qalmışdım. Heç ağlıma belə gətirməzdim ki, təxminən 4-5 ay sonra bu gözəl ölkəyə səfər edəcəyəm. Sizin kimi belə yüksək potensiala malik gənc həmkarlarımızı tanıdığıma görə özümü çox xöşbəxt hiss edirəm. Gənc jurnalistlərə yaradılan hər bir şəraitə görə isə təşkilat komitəsinə və xüsusilə Gənclər və İdman Nazirliyinə təşəkkürümü bildirirəm".

Ojevunni TENNİTAYO, Nigeriya, radio: "Bakı şəhər infrastrukturunun səviyyəsinə görə dünyanın bir sıra şəhərlərini qabaqlayır. Sizin bəxtiniz gətirib ki, belə gözəl bir ölkədə yaşayırsınız. Nigeriyaya qayıdanda buradakı bütün gözəllikləri öz vətəndaşlarımıza çatdıracağam. "Gənc Jurnalistlər Proqramı" çərçivəsində biz müxtəlif ölkələrdən yeni dostlar tapdıq. Yeniliklərin şahidi olduq. Dünya çempionatını yerində izləmək üçün çox gözəl şərait yaradılıb. Futbol qarşılaşmalarını izləyir, bununla bağlı qeydlərimizi aparır və müzakirələr edirik. Bir sözlə, hər şey mükəmməldir. Burada olduğuma görə özümü çox xöşbəxt hiss edirəm. Dünya çempionatının başa çatmasını heç istəmirəm (gülür)".

Aleksandro BENDANA, Nikaraqua, müstəqil jurnalist: "Azərbaycan möhtəşəm bir ölkədir. Dövlətin apardığı siyasət nəticəsində ölkəniz günü-gündən dünyanın qabaqcıl respublikaları sırasına qoşulmaqdadır. Elə düşünürəm ki, vaxt baxımından 20 il heç də böyük tarix deyil, amma bu illər ərzində görülmüş işlərə nəzər salanda bir daha əmin olursan ki, demək, qısa müddətdə böyük nailiyyətlərə imza atmaq mümkündür. Bütün bunlar göstərir ki, bu ölkəni daha xoşbəxt bir gələcək gözləyir. Dünya çempionatının təşkilatçılığı ilə bağlı görülən işlərə isə söz yoxdur. Hər şey əladır. Bir daha vurğulamaq istərdim ki, bu ölkədə olduğum üçün özümü xoşbəxt hesab edirəm. Gələcəkdə buraya daha böyük və möhtəşəm idman tədbirlərini işıqlandırmaq üçün tez-tez gələcəyik".

Söhbəti yazdı: Elçin CƏFƏROV

Azərbaycan.-2012.- 26 sentyabr.- S.6.