Azərbaycan Milli İncəsənət Muzeyində vokal musiqisi axşamı olmuşdur

Bakıda Heydər Əliyev Fondunun və Mədəniyyət və Turizm Nazirliyinin təşkilatçılığı ilə keçirilən Üzeyir Hacıbəyli IV Beynəlxalq Musiqi Festivalı çərçivəsində sentyabrın 25-də Azərbaycan Milli İncəsənət Muzeyində vokal musiqisi axşamı olmuşdur.

AzərTAc xəbər verir ki, musiqi axşamı unudulmaz bəstəkarımız Üzeyir Hacıbəylinin dahi şairimiz Nizami Gəncəvinin eyniadlı qəzəllərinə bəstələdiyi "Sevgili canan" və "Sənsiz" romanslarının səsləndirilməsi ilə başlamışdır.

Səhnədə ifası ilə tamaşaçıları heyran edən vokalçı - İtaliyanın Pezaro Musiqi Akademiyasının tələbəsi Azər Rzazadəni beynəlxalq festivallar və müsabiqələr iştirakçısı, Üzeyir Hacıbəyli adına Bakı Musiqi Akademiyasının tələbəsi Müşfiq Quliyev fortepianoda müşayiət etmişdir.

Musiqi axşamında tanınmış bəstəkarlar - Fikrət Əmirovun "Sevil" operasından Balaşın, Giacomo Puccinin "Toska" operasından Kavaradossinin ariyaları, Françesko Çileanın "Arlezianka" operasından Federikonun Nalesi, habelə Ravel Morisin "Alborada", Frederik Şopenin "Polonaise ¹ 5 op.44" musiqiləri, F.Əmirovun "Ulduz", "Mən səni araram", "Gecə keçir", Niyazinin "Vətən nəğməsi", Asəf Zeynallının "Ölkəm" romans və mahnıları səsləndirilmişdir.

Musiqiçilərin çıxışları tamaşaçılar tərəfindən alqışlarla qarşılanmışdır.

Azərbaycan.-2012.- 26 sentyabr.- S.7.