Uşaq kitab karvanı Astarada

Mədəniyyət və Turizm Nazirliyinin təşkilatçılığı ilə F.Köçərli adına Respublika Uşaq Kitabxanası "Uşaq kitab karvanı cənub bölgəsində" adı altında silsilə tədbirlər keçirir. Bu tədbirlərdən biri bu günlərdə Astarada təşkil olundu. Xatırladaq ki, tədbir "Kitab karvanı - İpək yolu ilə" layihəsinin davamıdır.

Rayon mədəniyyət evinin qarşısında bayramsayağı bəzədilən meydana toplaşmış məktəblilər, onların valideynləri və müəllimlər Bakıdan gəlmiş qonaqları, həmçinin uşaq kitabxanasının işçilərini, şair və yazıçıları alqışlarla qarşıladılar. Tədbiri giriş sözü ilə Astara Rayon Mərkəzləşdirilmiş Kitabxana Sisteminin direktoru Nazim Fərəməzov açaraq bunun böyük əhəmiyyət daşıdığını, kitabla bağlı maarifləndirmə işinin gücləndirilməsində mühüm rol oynadığını söyləyərək, qonaqları rayon ictimaiyyəti adından salamladı. Azərbaycan Yazıçı Qadınlar Cəmiyyətinin sədri, yazıçı Nüşabə Məmmədli, tanınmış şairlərdən İlyas Tapdıq, Əlamdar Quluzadə, Qəşəm İsabəyli, "Tumurcuq" qəzetinin redaktoru Səməd Məlikzadə və başqaları Astaraya gəlişlərindən məmnun qaldıqlarını, keçirilən tədbirin maraqlı və yaddaqalan olacağını söyləyib, uşaqlar üçün yazdıqları şeirləri oxudular.

Astarada yaşayıb-yaradan qələm və söz əhlindən Azərbaycan Yazıçılar Birliyinin üzvləri - İlham İlhami, Faiq Həsənov, Sakitə Əliyeva belə gözəl və əhəmiyyətli tədbirin keçirilməsinə görə Respublika Uşaq Kitabxanasının rəhbərliyinə minnətdarlıq edib, uşaqlar üçün yazdıqları şeirləri səsləndirdilər.

F.Köçərli adına Respublika Uşaq Kitabxanasının direktoru, respublikanın əməkdar mədəniyyət işçisi Fizurə Quliyeva çıxışında "Uşaq kitab karvanı"nın burada keçirilməsinin rayonda böyük maraq və sevinc doğurduğunu, cənub bölgəsinin mirvarisi kimi məşhur olan Astaranın gözəlliyindən məmnun qaldığını bildirməklə yanaşı, rayon MKS-in uşaq şöbəsinə və filiallara 1000 nüsxə kitab, 2 ədəd kompyuter və fəal oxuculara hədiyyələr etdi.

Tədbir çərçivəsində "V Uşaq Kitab Bilik Bayramı" da keçirilib. Ən fəal oxuculara MKS-in fəxri fərmanları və Mədəniyyət İşçiləri Müstəqil Həmkarlar İttifaqı Rayon Komitəsinin qiymətli hədiyyələri verildi.

Qabaqcıl mədəniyyət işçisi Cəlal Mədətzadənin rəhbərlik etdiyi "Sevinc" xalq çalğı alətləri ansamblının, müğənnilərin və oğlanlardan ibarət rəqs qrupunun çıxışları tədbir iştirakçılarında xoş ovqat yaratdı.

Azərbaycan.-2012.- 26 sentyabr.- S.7.