İdman və bədən tərbiyəsi sosial siyasətin mühüm istiqamətidir

Kütləvi idman və Azərbaycan təcrübəsi

İdman və bədən tərbiyəsi sosial siyasətlə vəhdətdədir

Bu fikirlər fəlsəfi yüklə yanaşı, həm də bir həqiqəti agah edir ki, insanın sağlamlığı, ilk növbədə, onun fiziki tərbiyəsindən keçir. Elə buna görə də fiziki və həm də mənəvi sağlamlığa xidmət hərəkətlərin məcmusu olaraq böyük təkamül yolu keçən idman və bədən tərbiyəsinin hələ qədim və antik dövrlərdən cəmiyyətin zəruri tələbatı kimi özünü göstərməyə başlaması təsadüfi sayılmamalıdır. İdman və bədən tərbiyəsi nəzəriyyələrində, elmi ədəbiyyatda bu anlayışlar həm dar, həm də geniş mənalarda işlədilir. Bədən tərbiyəsi və idman dar (məhdud) mənada şəxsiyyətin mədəniyyətinin bir hissəsi olmaqla, insanın öz hərəkət fəaliyyətindən səmərəli istifadə edərək fiziki keyfiyyətlərinin inkişaf etdirilməsi kimi başa düşülür. Geniş mənada isə idman və bədən tərbiyəsi cəmiyyətin mədəniyyətinin üzvi hissəsi kimi insanların fiziki imkanlarının inkişafının təmin edilməsinə yönəldilmiş, elmi, texniki və təcrübi nailiyyətlərin vəhdəti nəticəsində yaradılmış xüsusi vasitə və üsul anlamında qəbul olunur.

Lakin nə cür başa düşülməsindən və qəbul edilməsindən asılı olmayaraq, müasir dünyamızı idmansız təsəvvür etmək mümkün deyil. Əvvəldə də qeyd etdiyim kimi, idman və bədən tərbiyəsi fiziki sağlamlıqla yanaşı, insanları mənəvi ucalığa, ədalətə və dostluğa dəvət edir. İdman və bədən tərbiyəsi həm də insanlarda həyata nikbinlik yaradır, onlara yaşamaq eşqi, zövq və istirahət verir. Beləliklə, idman və bədən tərbiyəsi sosial siyasətin özünəməxsus bir sahəsi kimi özünü göstərməyə başlayır.

Sosial siyasət sivil cəmiyyətlərdə dövlət siyasətinin əsas istiqamətlərindən birini təşkil edir. Şəxsiyyətin və cəmiyyətdəki qrupların sosial tələblərini təmin etmək məqsədi daşıyan bu siyasət sosial müdafiəni, məşğulluq, əmək şəraitinin yaxşılaşdırılması, əhalinin sağlamlığının qorunması, asudə vaxtın təşkili kimi vəzifələri yerinə yetirir. Bütün dövrlərin ən maraqlı fenomeni olan idman və bədən tərbiyəsi cəmiyyətin bütün sosial qruplarına nüfuz etdiyi, insanların əmək və həyat fəaliyyətinə, yaşayış tərzinə, etik-əxlaqi dəyərlərə, hətta millətlərarası və dövlətlərarası münasibətlərə güclü təsir göstərdiyi üçün hər bir sivil ölkədə sosial siyasətin prioritet istiqamətlərindən birinə çevrilib.

Ümumiyyətlə, idman və sosial siyasət məsələsi həmişə alimlərin diqqət mərkəzində olmuşdur. Bu sahədə aparılmış çoxsaylı tədqiqatlar belə nəticəyə gətirib çıxarmışdır ki, idman sosial siyasətin bir qoludur. Lakin burada məsələyə bir kontekstdən yanaşmaq olmaz. Birincisi, idman və bədən tərbiyəsi hər şeydən əvvəl insanın sağlamlığı ilə bilavasitə əlaqədardır. İdmanla məşğul olub yüksək idman ustalığına yiyələnənlər üçün idman peşəyə, sənətə çevrilir. Deməli, idman əmək və məşğulluq problemi ilə də bağlıdır ki, bu da sosial siyasətin məşğul olduğu əsas məsələdir.

İkincisi, sosial siyasət üzrə mütəxəssislərin fikrincə, idman ayrıca fərdlərin və ya komandaların fiziki, intellektual bacarıqlarının, eləcə də hazırlıqlarının qarşı-qarşıya qoyulub mübarizədə müqayisəsinin sosial forması və sahəsidir. Belə mübarizə cəmiyyət tərəfindən qəbul olunur, bəyənilir. İdman fəaliyyəti müxtəlif idman yarışlarına hazırlıq və bu yarışlarda iştirak prosesində nəticə qazanmağa yönəlir.

Üçüncüsü isə, idman və bədən tərbiyəsi çağdaş dünyamızda irqindən, dinindən və milliyyətindən asılı olmayaraq, insanlar arasında sosial bərabərliyin əsas tərənnümçüsünə çevrilmişdir. BOK-un "İdman və siyasət" mövzusunda Lozannada keçirilmiş toplantısında qəbul edilmiş qərarda bildirilirdi ki, "Beynəlxalq Olimpiya Komitəsi və beynəlxalq federasiyalar idmana siyasi, irqi və dini motivlərə görə hər cür qarışmanın əleyhinə mübarizə aparacaqlar".

Bütün bunlarla yanaşı, əgər dövlət öz idmançılarının nailiyyətlərini qiymətləndirirsə, bu, sosial qrup kimi ayıra biləcəyimiz idmançıların və idman mütəxəssislərinin sosial müdafiə və sosial təminatı problemlərinin həlli kimi təzahür edir.

Nəhayət, idman asudə vaxtın səmərəli təşkilində əvəzsiz bir vasitədir. Göründüyü kimi, idman və bədən tərbiyəsi sosial siyasətlə çoxşaxəli və qırılmaz vəhdətdədir. Buradan da belə nəticəyə gəlinir ki, idman və bədən tərbiyəsi sosial siyasətin özünəməxsus bir sahəsidir.

Sağlam həyat tərzinin təmini Azərbaycanda sosial siyasətin əsasını təşkil edir

Rus alimi L.İ.Lubışeva cəmiyyətin inkişafında idmanın sosial rolunu öyrənərkən belə qənaətə gəlmişdir ki, XXI əsrin əvvəllərində idmanın müasir cəmiyyətdəki rolunu kifayət qədər qiymətləndirən dövlət və dövlət başçıları o qədər də çox deyildir. Böyük qürur hissi ilə qeyd etmək lazımdır ki, Azərbaycanın bu sahədə bəxti gətirmişdir.

Ulu öndər Heydər Əliyev idmanın və bədən tərbiyəsinin cəmiyyətdə oynadığı rolu həmişə qiymətləndirmiş, bu sahəni daim özünün şəxsi diqqət və qayğısı altında saxlamışdır. Ümummilli liderin layiqli siyasi varisi Prezident İlham Əliyev də bu siyasəti davam etdirərək Azərbaycan xalqının fiziki-mənəvi sağlamlığına çalışır, idman və bədən tərbiyəsinin inkişafı və kütləviliyinin təmin edilməsi sahəsində kompleks tədbirlərin həyata keçirilməsini diqqətdə saxlayır.

Bütün bunlar ondan xəbər verir ki, Azərbaycanda əhalinin sağlam həyat tərzinin təmin olunması məqsədi ilə hər bir vətəndaşın bədən tərbiyəsi və idmanla məşğul olması üçün şəraitin yaradılması, xəstəliklərin, zərərli vərdişlərin aradan qaldırılmasında bədən tərbiyəsi və idman vasitələrindən istifadə olunması, respublikanın şəhər və rayonlarında idmanın mövcud maddi-texniki bazasının qorunub saxlanılması və beynəlxalq standartlara uyğunlaşdırılması, yüksək dərəcəli idmançıların beynəlxalq miqyaslı yarışlarda respublikamızı şərəflə təmsil etməsi üçün lazımi şəraitin yaradılması, bədən tərbiyəsi və idmanın inkişafının elmi əsaslar üzərində qurulması, səhhətində qüsuru olan gənclərin bədən tərbiyəsi, idman və sağlamlıq bölmələrində sərbəst məşğul ola bilməsi, idmançıların sosial müdafiəsi və digər məsələlərin həlli ilə bağlı nəzərdə tutulmuş tədbirlərin həyata keçirilməsi sosial siyasətin əsasını təşkil edir.

İdman sosiologiyası istiqamətində araşdırmalar isə göstərir ki, bugünkü həyatımızın "idman və gənclik", "idman və tərəqqi", "idman və humanizm", "idman və şəxsiyyətin hərtərəfli inkişafı", "idman və kütləvi tamaşalar", "idman və mədəniyyət", "idman və ekologiya", "idman və qadın" kimi sosial məsələləri də qarşılıqlı vəhdətdədir. Bu da Azərbaycan dövlətinin sosial siyasətinin əsas qollarından birinin daim dövlət qayğısı ilə əhatə olunduğunu təsdiqləyir.

Azərbaycanın elmi əsaslar üzərində qərar tutan sosialyönümlü inkişaf strategiyası insan amilinin yüksəlişinə xidmət edən çoxşaxəli islahatları uğurla gerçəkləşdirmək və hər bir fərdin maraq və mənafeyini yüksək səviyyədə reallaşdırmaqla yanaşı, əhalinin sağlam həyat tərzinin təmin olunmasına istiqamətlənmiş sosial siyasəti uğurla həyata keçirmək imkanı vermişdir. Hazırda vətəndaşların etibarlı sosial müdafiəsinin, fiziki-mənəvi sağlamlığının, elmi-intellektual yüksəlişinin təmini bu siyasətin prioritet xəttinə çevrilərək yüksək humanizm və insanpərvərlik kimi ideallara söykənmişdir. Prezident İlham Əliyev bazar iqtisadiyyatı şəraitində "sosial dövlət" konsepsiyasına daim üstünlük verərək bu yolda atılan bütün addımlarda məhz əhalinin rifahı, sağlamlığı və firavanlığı məsələlərini ön planda saxlayır. Artıq Azərbaycanın insan inkişafı sahəsində mühüm uğurlar qazandığını əksər beynəlxalq təşkilatlar da etiraf edirlər. Birləşmiş Millətlər Təşkilatı (BMT) İnkişaf Proqramının hər il üçün açıqladığı "İnsan İnkişafı Hesabatı" respublikamızın insan inkişafı indeksinə görə yüksək nəticələr əldə etdiyini bir daha təsdiqləyir.

Bu gün müstəqil Azərbaycanın bədən tərbiyəsi hərəkatı qarşısında fiziki tərbiyə sistemini yüksək səviyyədə qurmaq, insanın sağlamlığını möhkəmləndirmək naminə bədən tərbiyəsi vasitələrindən səmərəli istifadə etmək, idmanımız üçün müasir milli baza yaratmaq və onu xalqın məişətinə daxil etmək kimi mühüm vəzifələr durur. Azərbaycan dövləti idmanın və bədən tərbiyəsinin kütləviliyini təmin etmək üçün bütün addımları atır. Prezident İlham Əliyevin təsdiq etdiyi Azərbaycan Respublikası regionlarının sosial-iqtisadi inkişafına dair dövlət proqramlarında qarşıya qoyulan vəzifələr sırasında ölkədə bədən tərbiyəsi və idmanla bağlı mühüm məsələlərin öz əksini tapması bunu təsdiq edir. Prezident İlham Əliyev Azərbaycanın hər yerində idmanla məşğul olmaq üçün müasir tələblərə cavab verən idman infrastrukturunun formalaşdırılmasını mühüm vəzifələrdən biri kimi müəyyənləşdirib. Təsadüfi deyil ki, ötən 12 ildə ölkəmizin iqtisadi inkişafına, artan maliyyə imkanlarına uyğun olaraq idmanın maddi-texniki bazasının möhkəmləndirilməsi yolunda daha böyük işlərə başlanılıb. Müasir idman infrastukturunun yaradılması istiqamətində aparılan işlər geniş vüsət alıb. Bunun nəticəsi olaraq əksər bölgələrdə olimpiya idman kompleksləri tikilib. Hətta cəbhə xəttinin bir neçə kilometrliyində, Ağdamın Quzanlı qəsəbəsində möhtəşəm idman qurğusu idmançılarımızın istifadəsinə verilib.

Azərbaycan qanunvericiliyində də idman və bədən tərbiyəsinin kütləviliyinin təmin olunması ilə bağlı bütün məsələlər öz əksini tapıb. Ölkədə bədən tərbiyəsi və idman hərəkatını istiqamətləndirən, kütləviliyi təmin edən əsas sənəd "Bədən tərbiyəsi və idman haqqında" qanundur. Azərbaycan vətəndaşları qanunvericiliyə əsasən peşəkar idman klubları və assosiasiyaları yaratmaq, bədən tərbiyəsi və idman təşkilatlarına, ayrı-ayrı şəxslərə pullu xidmət göstərmək, idman təyinatlı məhsulların istehsalı ilə məşğul olmaq, idman qurğuları və tikililərini, digər idman vasitələrini əldə etmək, icarəyə vermək hüququna malikdir. Bütün bunlar idmanın kütləviliyinə xidmət edən mühüm məsələlərdir.

İdmanın inkişafında ictimai sektorun və federasiyaların rolu

Artıq hər kəsə bəllidir ki, idman ümummilli dəyərə çevrilib. Hər bir dövlətin məqsədlərindən biri mövcud idman ənənəsini qoruyub inkişaf etdirmək olmalıdır. Lakin bu məqsədin həyata keçirilməsini təkcə dövlətə şamil etmək yanlış mövqedir. Daxili siyasət çərçivəsində idmana qayğı hamının, hər kəsin, hər bir sosial qrupun, təşkilatın və hətta siyasi partiyanın borcudur.

Məqsədi ulu öndər Heydər Əliyevin ölkənin sosial-iqtisadi, mədəni tərəqqisi, xalqın maddi rifahının yaxşılaşması naminə müəyyən etdiyi siyasətin və ideyaların həyata keçirilməsinə dəstək vermək, bu işə xidmət edən genişmiqyaslı proqramların həyata keçirilməsinə kömək etmək, Azərbaycanın beynəlxalq nüfuzunu artırmaq olan Heydər Əliyev Fondunun başlıca məramlarından biri idmana diqqət və qayğı göstərməkdir. Heydər Əliyev Fondunun təşəbbüsü ilə indiyədək tikilən 300-ə yaxın məktəbin əksəriyyətində idman meydançaları, lazımi avadanlıqla təchiz olunmuş idman salonları yaradılmışdır. Uşaqlar və gənclər arasında idmanın təbliğini diqqətdə saxlayan Fond Azərbaycanda keçirilmiş bir çox yarışlara hamilik etmişdir. Ümummilli lider Heydər Əliyevin xatirəsinə həsr olunmuş "Prezident Kuboku" Beynəlxalq şahmat festivalı da Fondun dəstəyi ilə keçirilmişdir. Heydər Əliyev Fondunun Prezidenti, Milli Məclisin deputatı, UNESCO və İSESCO-nun xoşməramlı səfiri Mehriban xanım Əliyevanın 2008-ci il sentyabrın 2-də müstəqillik dövründə Olimpiya Oyunlarının medallarını qazanmış idmançılarla keçirdiyi görüş də Fondun idmanın inkişafı ilə bağı həyata keçirilən dövlət siyasətinə verdiyi töhfənin bariz təcəssümüdür.

Pekin Yay Olimpiya Oyunlarında medal qazanmış idmançılarımız həm dövlət, həm də Milli Olimpiya Komitəsi tərəfindən mükafatlandırıldılar. Heydər Əliyev Fondu isə Olimpiya Oyunlarının medalçılarını xüsusi mükafatla - Fondun fərdi təqaüdçüsü adını verməklə mükafatlandırdı. Həmin idmançılarla görüşdə Mehriban xanım Əliyeva təkcə Pekində deyil, ölkəmiz dövlət müstəqilliyini bərpa etdikdən sonra bütün Olimpiya Oyunlarında iştirak edən və medal qazanan idmançıları Heydər Əliyev Fondunun təqaüdçüsü elan etdi.

Müstəqillik illərində Paralimpiya Oyunlarında medal qazanmış Azərbaycan idmançıları da Heydər Əliyev Fondunun aylıq təqaüdlərinə və diplomlarına layiq görülmüşlər. 2008-ci il sentyabrın 26-da Sidney, Afina və Pekin paralimpiya oyunlarında medal qazanmış idmançılarla görüşən Mehriban xanım Əliyeva onları da Heydər Əliyev Fondunun təqaüdçüsü elan etmişdir. Heydər Əliyev Fondunun fəaliyyətə başlamasının 8 illiyi ilə bağlı keçirilən mərasimdə Fondun təsis etdiyi "Qızıl çinar" beynəlxalq mükafatının ikiqat paralimpiya, üçqat dünya çempionu İlham Zəkiyevə verilməsi Heydər Əliyev Fondunun Azərbaycan idmanının inkişafına və təbliğinə göstərdiyi xidmətin təcəssümüdür.

Barselona, Atlanta, Sidney, Afina, Pekin Yay Olimpiya Oyunlarında və Paralimpiya Oyunlarında medal qazanmış idmançılara Heydər Əliyev Fondunun fərdi təqaüdçüsü adının verilməsi Heydər Əliyev Fondunun Azərbaycan idmanının inkişafına diqqət və qayğısının, bu istiqamətdə həyata keçirilən dövlət siyasətinə verdiyi töhfənin bariz nümunəsidir. İnanırıq ki, Heydər Əliyev Fondunun fərdi təqaüdçüsü kimi şərəfli adı daşıyan idmançılarımız həm peşəkar idmançı, həm də layiqli vətəndaş olaraq onlara bəslənən etimadı daim doğruldacaqlar.

Bununla yanaşı, idmanın inkişafında sistemli addımların atılmasında və yüksək səviyyəli nailiyyətlərin əldə olunmasında, həmçinin idman növünün kütləviləşdirilməsində idman federasiyalarının da rolu mühümdür. Hazırda Azərbaycanda 24 idman federasiyası fəaliyyət göstərir: Avarçəkmə, Ağır Atletika, Atçılıq, Atıcılıq, Atletika, Badminton, Basketbol, Boks, Cüdo, Gimnastika, Güləş, Həndbol, Kamandan Oxatma, Otüstü Xokkey, Qılıncoynatma, Qış İdman Növləri, Stolüstü Tennis, Taekvando, Tennis, Üzgüçülük, Velosiped, Voleybol, Yelkən idmanı və Futbol federasiyaları. Lakin vurğulamaq lazımdır ki, Azərbaycanda idmana olan marağın hər gün artması yeni-yeni idman federasiyalarının yaranmasına və fəaliyyətə başlamasına səbəb olur.

Əlbəttə ki, bu federasiyaların da hər biri, ilk növbədə, aidiyyəti idman növünün inkişaf istiqamətlərini və prioritetlərini müəyyənləşdirir, eyni zamanda, gənclərin idmana axınını təşkil edirlər. Artıq, demək olar ki, Azərbaycanda fəaliyyət göstərən idman federasiyalarının bir çoxu beynəlxalq əlaqələrə sahibdir və ölkəmizdə dünya və Avropa birinciliyinin, qran-prilərin keçirilməsinə nail olurlar. Onların arasında Atçılıq, Boks, Cüdo, Gimnastika, Güləş, Velosiped, Voleybol, Taekvando, Tennis və başqa federasiyaları göstərmək olar.

Xüsusilə qeyd etmək lazımdır ki, dünyada elit idman növləri üzrə keçirilən yarışlar daha çox diqqəti cəlb edir. Bunların sırasında, ilk növbədə, tennis turnirini vurğulamaq lazımdır. Çox sevindirici haldır ki, Azərbaycanda da ilk dəfə tennis üzrə beynəlxalq turnir keçirildi. Belə ki, Bakı Tennis Akademiyasında keçirilən "Baku Cup-2012" beynəlxalq turniri bu sahədə ilk addım olsa da, ümidverici nəticələrlə yaddaşlarda qaldı.

Bununla yanaşı, ölkədə idmanın inkişafında qeyri-hökumət təşkilatlarının da rolu əhəmiyyətlidir. Çünki sosiumla hakimiyyət arasında vasitəsi olan və vətəndaş cəmiyyətinin vacib ünsürü kimi çıxış edən QHT-lər, ilk növbədə, çalışmalıdırlar ki, idmanın kütləviliyi təmin olunsun və gənclərin idmana axını güclənsin. Çünki nə qədər çox gənc idmanla məşğul olarsa, bir o qədər də gələcək nəsillərimizin sağlam və vətənpərvər yetişməsinə olan ümidlərimiz gerçəkləşər.

Azərbaycanda idmanın inkişaf perspektivləri

Ölkəmiz Prezident İlham Əliyevin rəhbərliyi ilə dinamik inkişaf edir və bu yüksəlişdən, eləcə də dünyanın enerji təhlükəsizliyinə, sülhün qorunmasına verdiyi böyük töhfələrdən irəli gələrək beynəlxalq mövqelərini möhkəmləndirir. Təbii ki, hər bir ölkəni çağdaş dövrümüzdə dünya nizamı üçün əhəmiyyətli edən meyarlardan biri məhz beynəlxalq imicdir. Elə beynəlxalq təşkilatlar da öz tədbirlərini keçirərkən dövlətin imkanları, resursları ilə yanaşı, qlobal miqyasda mövqelərini nəzərə alırlar. İndiyədək Azərbaycanda beynəlxalq təşkilatların çoxlu sayda siyasi, iqtisadi, mədəni və idman tədbirləri keçirilib.

"Eurovision" mahnı yarışmasını yüksək səviyyədə təşkil etməklə Azərbaycan istənilən beynəlxalq tədbirə uğurla ev sahibliyi etmək iqtidarında olduğunu bütün dünyaya nümayiş etdirdi. Eyni fikirləri idman yarışları barədə də demək olar. İndiyədək respublikamızda onlarla beynəlxalq idman yarışı keçirilib. Bütün ölkələrin və idman təşkilatlarının təmsilçiləri Azərbaycanın ev sahibliyindən razılıqlarını ifadə ediblər. Qeyd etdiyim kimi, Azərbaycanın dinamik inkişafına uyğun olaraq bu gün ölkəmizin dörd bir yanında olimpiya idman kompleksləri, idman qurğuları, stadionlar inşa edilir, həmçinin ölkənin turizm potensialı möhkəmlənir. Həmçinin ölkədə idmanın kütləviləşdirilməsi üçün Azərbaycanda geniş tikinti-quruculuq işləri aparılır. Hazırda 34 regional Olimpiya Mərkəzi tikilib, 8 mərkəzdə isə tikinti davam edir. Son 12 il ərzində, demək olar ki, bölgələrimizin əksəriyyətində müasir olimpiya kompleksləri inşa edilib. Azərbaycan Respublikası Prezidenti Administrasiyasının rəhbəri, akademik Ramiz Mehdiyevin qeyd etdiyi kimi, Bakı şəhərində və regionlarda tikilmiş 30-dan çox olimpiya mərkəzləri və digər idman obyektləri ölkədə idman hərəkatının genişlənməsinə şərait yaradır, gənclərin fiziki və mənəvi inkişafına, həyatda özlərini təsdiqləməsinə imkan verir: "Azərbaycan idmançıları son illərdə müxtəlif növlər üzrə nüfuzlu beynəlxalq yarışlarda, hətta indiyə qədər ölkəmiz üçün ənənəvi sayılmayan idman növlərində də xeyli mükafat qazanmışlar. Bu da hökumətin ölkədə idmanın müasir maddi-texniki bazasının yaradılması və idmançıların hazırlanması üzrə düşünülmüş siyasətinin nəticəsidir".

Əlbəttə ki, bu gün Azərbaycanın dünyada idman ölkəsi kimi tanınmasının ilk səbəblərindən biri onunla bağlıdır ki, idman sahəsinə yüksək dövlət qayğısı var. Cənab Prezident İlham Əliyev Böyük Britaniya və Şimali İrlandiya Birləşmiş Krallığının paytaxtı London şəhərində keçirilən XXX Yay Olimpiya Oyunlarında iştirak edəcək Azərbaycan nümayəndə heyətinin rəsmi yolasalma mərasimində çıxış edərkən bir daha idmanın inkişafı məsələsinə toxunaraq bildirdi ki, idmanın inkişafı Azərbaycanda dövlət siyasətidir və dövlət idmanın inkişafı üçün konkret addımlar atıb: "Bu gün də bu siyasət davam etdirilir. İdman cəmiyyətimizin ayrılmaz hissəsidir. İdmançılara olan hörmət cəmiyyətdə yüksək səviyyədədir. İdmançıların məişət problemlərinin həlli məsələləri yüksək səviyyədə təşkil edilir. Bütün bu amillər həm idmanın inkişafına böyük təkan verir, eyni zamanda, gənclərdə, yeniyetmələrdə, uşaqlarda idmana marağı artırır. Mən çox şadam ki, idman bölmələrinə axın kütləvi xarakter alıbdır. İndi idmanla məşğul olmaq üçün bütün şərait vardır. Biz idmanın inkişafı ilə bir neçə vacib məqsədi təmin edirik: ilk növbədə, ölkəmizin idman şöhrətini yüksəklərə qaldırırıq, eyni zamanda, idmanın kütləviliyini təmin edirik. İdman infrastrukturunun yaradılması ilə bu kütləvilik daha da geniş vüsət almışdır və idman hər bir insanın sağlamlığı üçün çox mühüm amildir. İdman insanları həm fiziki cəhətdən sağlam edir, eyni zamanda, gözəl milli mənəvi dəyərlərimizi idmançılara, uşaqlara aşılayır. Bir sözlə, Azərbaycanda idmanın inkişafına dair siyasət çox uğurludur və deyə bilərəm ki, bizdə olan təcrübə bəzi ölkələrdə öyrənilir və tətbiq edilir".

Bütövlükdə, dövlətin bu sahələrdə gördüyü işlər təqdirəlayiqdir. Təbii ki, dövlətimiz inkişaf etdikcə, maliyyə imkanları çoxaldıqca bu istiqamətdə daha böyük irəliləyişlərin və nailiyyətlərin şahidi olacağıq.

HADİ RƏCƏBLİ,

siyasi elmlər doktoru, professor,

Milli Məclisin Sosial siyasət

komitəsinin sədri

Azərbaycan.-2012.- 27 sentyabr.- S.5.