Azərbaycanın xarici işlər naziri BMT Baş Məclisinin 67-ci sessiyasında iştirakı çərçivəsində bir sıra görüşlər keçirmişdir

Azərbaycanın xarici işlər naziri Elmar Məmmədyarov BMT Baş Məclisinin 67-ci sessiyasında iştirakı çərçivəsində Qəmər Adalarının xarici işlər naziri Ahmed Ben Said Jaffare ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə Ahmed Ben Said Jaffare aramsız yağan leysan yağışlarının ölkəsinin iqtisadiyyatına mənfi təsir göstərdiyini, kənd təsərrüfatına və infrastruktura ciddi ziyan dəydiyini qeyd etmişdir. O, Azərbaycan şirkətlərinin Qəmər Adalarında infrastruktur layihələrinin həyata keçirilməsində iştirak imkanlarının nəzərdən keçirilməsini xahiş etmişdir.

Nazir Elmar Məmmədyarov İslam Əməkdaşlıq Təşkilatının Qəmər Adalarındakı vəziyyətlə bağlı üzv dövlətlərə müraciət etdiyini xatırladaraq, Azərbaycanın dəstək göstərməyə hazır olduğunu bildirmişdir. Nazir, eyni zamanda, Qəmər Adalarından olan tələbə və gənc diplomatların Azərbaycan Diplomatik Akademiyasında təhsil almaları üçün imkanların mövcud olduğunu qeyd etmişdir.

Azərbaycanın xarici işlər naziri Elmar Məmmədyarov BMT Baş Məclisinin 67-ci sessiyası çərçivəsində Sinqapurun xarici siyasət idarəsinin rəhbəri Kasivisvanatan Şanmugam ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə nazirlər Azərbaycan-Sinqapur əməkdaşlığının inkişaf etdirilməsi məqsədi ilə müxtəlif sahələri əhatə edən hüquqi bazanın genişləndirilməsi və tərəflər arasında rəsmi sənədlərin imzalanması məsələsinin nəzərdən keçirilməsi barədə razılığa gəlmişlər.

Nazirlər ikitərəfli münasibətlər üçün zəruri olan beynəlxalq təşkilatlar çərçivəsində əməkdaşlığın möhkəmləndirilməsinin və qarşılıqlı səfərlərin həyata keçirilməsinin vacibliyini vurğulamışlar.

Azərbaycanın xarici işlər naziri Elmar Məmmədyarov BMT Baş Məclisinin 67-ci sessiyası çərçivəsində sloveniyalı həmkarı Karl Erjavec ilə görüşmüşdür.

Xarici İşlər Nazirliyindən AzərTAc-a bildirmişlər ki, görüşdə Azərbaycan ilə Sloveniya arasında münasibətlərin inkişaf perspektivləri müzakirə olunmuş və əlaqələrimizin genişləndirilməsinə qarşılıqlı maraq ifadə olunmuşdur.

Tərəflər ölkələrimiz arasında hüquq-müqavilə bazasının genişləndirilməsi, qarşılıqlı səfərlərin təşkili, iqtisadiyyatın müxtəlif sahələri üzrə əməkdaşlıq imkanlarının öyrənilməsi məqsədi ilə hər iki ölkədə biznes forumların keçirilməsi barədə razılıq əldə etmişlər.

Sentyabrın 27-də Azərbaycanın xarici işlər naziri Elmar Məmmədyarov BMT Baş Məclisinin 67-ci sessiyası çərçivəsində Türkdilli Dövlətlərin Əməkdaşlıq Şurasının (TDƏŞ) baş katibi Xəlil Akıncı ilə görüşmüşdür.

Xarici İşlər Nazirliyindən AzərTAc-a bildirmişlər ki, görüşdə Azərbaycan ilə TDƏŞ arasında əlaqələr, qurumun BMT və digər beynəlxalq təşkilatlar yanında müşahidəçi statusu alması istiqamətində görülən işlər müzakirə olunmuşdur.

Görüşdə, həmçinin qurumun üzvü olan ölkələr arasında iqtisadi inteqrasiyanın artırılması, müxtəlif regionlarda diplomatik nümayəndəliklər səviyyəsində məsləhətləşmələr mexanizminin yaradılması, eləcə də beynəlxalq təşkilatlar çərçivəsində əməkdaşlıq məsələləri ətrafında fikir mübadiləsi aparılmışdır.

Sentyabrın 27-də Azərbaycanın xarici işlər naziri Elmar Məmmədyarov BMT Baş Məclisinin 67-ci sessiyası çərçivəsində serbiyalı həmkarı İvan Mrkiç ilə görüşmüşdür.

Xarici İşlər Nazirliyindən AzərTAc-a bildirmişlər ki, görüşdə Azərbaycan ilə Serbiya arasında ikitərəfli münasibətlərin hazırkı vəziyyəti və əlaqələrin inkişaf perspektivləri müzakirə edilmişdir.

Tərəflər iki ölkə arasında siyasi əlaqələrin yüksək səviyyəsindən məmnunluq ifadə edərək iqtisadi sahədə də əməkdaşlığın daha da genişləndirilməsi istiqamətində lazımi addımların atılması, o cümlədən qarşılıqlı səfərlərin intensivləşdirilməsi və müvafiq ikitərəfli sənədlərin imzalanması barədə razılığa gəlmişlər.

Azərbaycanın xarici işlər naziri Elmar Məmmədyarov BMT Baş Məclisinin 67-ci sessiyasında iştirakı çərçivəsində sentyabrın 27-də Xorvatiyanın xarici işlər və Avropa məsələləri üzrə naziri xanım Vesna Pusiç ilə görüşmüşdür.

Xarici İşlər Nazirliyindən AzərTAc-a bildirmişlər ki, görüşdə nazirlər ikitərəfli münasibətlərin inkişaf etdirilməsi imkanlarını müzakirə edərək, qarşılıqlı maraq doğuran sahələr üzrə hüquqi sənədlərin imzalanması istiqamətində işlərin aparılması barədə razılığa gəlmişlər.

Xanım Vesna Pusiç ölkəsində həyata keçirilən layihələrə Azərbaycandan investisiya cəlb edilməsində maraqlı olduqlarını vurğulamışdır.

Nazir Elmar Məmmədyarov Azərbaycanın Balkan ölkələri, o cümlədən Xorvatiya ilə əməkdaşlığı genişləndirmək marağında olduğunu bildirmiş və bu istiqamətdə müvafiq addımların atılması üçün bu ölkədə həyata keçirilən infrastruktur layihələrində iştirak etmək imkanlarının öyrənilməsinin vacibliyini vurğulamışdır. Azərbaycanın xarici siyasət idarəsinin rəhbəri, həmçinin iqtisadiyyat, turizm və energetika sahələrində iki ölkə arasında əməkdaşlıq imkanlarının dəyərləndirilməsi üçün aidiyyəti sahələr üzrə nümayəndə heyətlərinin qarşılıqlı səfərlərinin həyata keçirilməsinin zəruriliyini qeyd etmişdir.

Azərbaycan.-2012.-28 sentyabr.-S.2.