Yaşıl texnologiyanın tətbiqi ilə bağlı seminar keçirildi

Sentyabrın 27-də Bakıda Polşanın Azərbaycandakı səfirliyi və Azərbaycan Sənaye və Energetika Nazirliyinin (SEN) təşkilatçılığı ilə "Greenevo - Yaşıl Texnologiyaların Akseleratoru" adlı iqtisadi seminar keçirilmişdir. Polşanın Azərbaycandakı səfiri Mixal Labenda son illərdə ölkəsinin iqtisadiyyatının inkişaf etdiyini, hətta qlobal maliyyə böhranı dövründə iqtisadiyyatında artım qeydə alındığını vurğulamışdır. Bildirilmişdir ki, Polşa ekologiya və yeni texnologiyalara sərmayə yatıran ölkədir, üçüncü rübdə burada ümumi daxili məhsul 2,4 faiz artmışdır. Sənaye və Energetika Nazirliyinin Aparat rəhbəri Rasim Məmmədov bildirmişdir ki, Azərbaycanda hər il təxminən 50 milyon ton neft, 27 milyard kubmetr qaz və 18 milyard kVt/saat elektrik enerjisi istehsal olunur. Yanacağın böyük həcmdə istifadəsi nəticəsində ekoloji çətinliklər yaranır. Məhz bu baxımdan Azərbaycanda yaşıl texnologiyalardan istifadə vacibdir. Qeyri-neft sektorunda da yaşıl texnologiyanın tətbiqinə böyük ehtiyac vardır. Aparat rəhbəri Sumqayıt Texnologiyalar Parkı, Balaxanı Sənaye Parkı və bu sahədə görülən işlərdən danışmışdır. Tədbir çərçivəsində Polşanın yaşıl texnologiyalardan istifadə edən 11 şirkətinin təqdimatı keçirilmişdir.

Azərbaycan.-2012.-28 sentyabr.-S.3.