Diplomatik Akademiya və Beynəlxalq Münasibətlər institutlarının rektor və dekanlarının 40-cı Ümumdünya Forumunun Azərbaycanda keçirilməsi əlamətdar hadisədir

Diplomatik Akademiya və Beynəlxalq Münasibətlər institutlarının rektor və dekanlarının 40-cı Ümumdünya Forumunun Azərbaycanda keçirilməsi əlamətdar hadisədir.

Bu sözləri xarici işlər nazirinin müavini, Azərbaycan Diplomatik Akademiyasının rektoru Hafiz Paşayev sentyabrın 27-də jurnalistlərə açıqlamasında demişdir.

ADA-nın rektoru bildirmişdir ki, forumun keçirilməsinin məqsədi diplomatiya sahəsində təhsillə bağlı aktual məsələlər barədə fikir mübadiləsi aparmaq, dünyada həyata keçirilən dəyişiklikləri nəzərə alaraq yeni proqramlar tərtib etməkdir. Forumda iştirak edən nüfuzlu diplomatik təhsil ocaqlarının nümayəndələri üçün bir-birləri ilə tanış olmaq və gələcək fəaliyyətlərini müəyyənləşdirmək imkanı yaradılmışdır. Forumun iştirakçıları həmçinin Azərbaycan ilə yaxından tanış olacaqlar.

Hafiz Paşayev qeyd etmişdir ki, forumun diplomatiya təhsili ilə bağlı olmasına baxmayaraq, tədbirin panel iclasında Ermənistan-Azərbaycan, Dağlıq Qarabağ münaqişəsi də müzakirə olunacaqdır.

AzərTAc

Azərbaycan.-2012.-28 sentyabr.-S.4.