Fransa ilə iqtisadi əlaqələr qarşılıqlı maraqlara söykənir

Prezident İlham Əliyevin Fransaya bu ayın ikinci ongünlüyündəki işgüzar səfəri də mühüm əhəmiyyət daşıyır. Bu səfər iki ölkə arasında olan siyasi-iqtisadi münasibətləri daha da yaxınlaşdırmaqla məhdudlaşmır. Fransa dünyada, o cümlədən Avropada söz sahibi olan, beynəlxalq məsələlərin həllinə təsir göstərə bilən dövlətlərdəndir.

Fransanın ölkəmiz üçün bir əhəmiyyəti də ondan ibarətdir ki, bu dövlətin nümayəndəsi Ermənistan-Azərbaycan, Dağlıq Qarabağ münaqişəsinin həlli ilə məşğul olan Minsk qrupunun həmsədrlərindən biridir. Bu səbəbdən Avropanın bu qüdrətli dövləti ilə normal münasibətlər ölkəmiz üçün çox faydalıdır.

Fransa da ölkəmizə böyük maraq göstərir. Bu ölkə Avropanın enerji təhlükəsizliyinə xüsusi önəm verdiyindən Azərbaycanla enerji sahəsində qarşılıqlı əməkdaşlıqda maraqlıdır. Heç təsadüfi deyil ki, Fransaya budəfəki səfər çərçivəsində Prezident İlham Əliyevlə görüşündə Fransanın dövlət başçısı Fransua Olland iki ölkə arasında sürətlə inkişaf edən siyasi, iqtisadi və mədəni əlaqələrdən məmnun olduğunu bildirmişdir. Fransa şirkətlərinin Azərbaycan iqtisadiyyatında fəal rolu və ölkəmizə sərmayə qoymasının əhəmiyyətini vurğulayan Olland bu sahədə əməkdaşlığın yaxşı perspektivlərinin olduğunu söyləmişdir.

Səfər zamanı Prezident İlham Əliyevin "Fransa Sahibkarlar Təşkilatına - MEDEF İnternational"a üzv olan müxtəlif şirkətləri təmsil edən 60-a yaxın iş adamı ilə də görüşü olmuşdur. Bu görüş səbəbsiz deyildi. Belə ki, dünya maliyyə böhranının səngimədiyi bir dövrdə Azərbaycanın dinamik inkişafı fransız sahibkarları çox maraqlandırır. Çünki Avropadakı iqtisadi tənəzzül fransız iş adamları üçün yeni bazar və tərəfdaşlar axtarıb tapmaqda xüsusi əhəmiyyət kəsb edir. Buna görə də Fransanın işgüzar həyatında mühüm rol oynayan bütün şirkətlərin rəhbərləri Prezident İlham Əliyevlə keçirilən görüşə ümidlə qatılmışdılar.

Prezident İlham Əliyev görüşdə bildirdi ki, ölkəmiz enerji təminatı marşrutlarının şaxələndirilməsinə xüsusi əhəmiyyət verir və bu da Azərbaycanla Avropanın maraqlarının üst-üstə düşməsi deməkdir. Dövlət başçısı həmçinin vurğuladı ki, həyata keçirilən iqtisadi siyasət nəticəsində Azərbaycanda iqtisadiyyatın şaxələndirilməsinə nail olunmuşdur. Ölkəmizin qazandığı uğurlardan söz açan Azərbaycan Prezidenti qeyd etdi ki, bu ilin 6 ayı ərzində qeyri-enerji sektorunda ümumi daxili məhsul 10 faiz artıb, ümumiyyətlə son 8 ildə üç dəfə artım qeydə alınıb. Dövlət başçısı iştirakçılara həmçinin Azərbaycanın iqtisadi prioritetləri, qeyri-neft sektoru, ölkəmizdə çalışan Fransa şirkətlərinin fəaliyyəti, enerji, nəqliyyat, səhiyyə, turizm, informasiya və kommunikasiya texnologiyaları, gömrük və digər sahələrdə əməkdaşlığın mühüm istiqamətləri barədə geniş məlumat verdi.

"Total" şirkətini təmsil edən Mişel Borrel isə ölkəmizlə neft sektorunda uzunmüddətli əməkdaşlıqdan məmnun qaldığını bildirdi. O dedi: "Hesab edirəm ki, şərhimin üç əsas elementində də qeyd etdiyim kimi, SOCAR ilə və Azərbaycandakı digər şirkətlərlə tərəfdaşlıq bizim uğurumuzun açarıdır. "Total"ın Azərbaycandakı sərmayə payı ölkənizin investisiya mühitinin cəlbediciliyi, sabitlik və bizə layihələrimizə uzun müddətə milyardlarla dollar investisiya yatırmaq imkanı verən güvənlik haqqında söylədiklərinizin aydın şəkildə nümayişidir".

Çıxışlardan sonra Azərbaycanın dövlət başçısı iştirakçıları maraqlandıran sualları cavablandırdı. Prezident Azərbaycanda kosmik sənayenin inkişafı ilə bağlı sualı cavablandırarkən dedi: "Strateji cəhətdən önəmli olan sahələrdə biz vaxt itkisinə yol vermirik. Bu məqsədlərə nail olmaq istiqamətində fəaliyyət göstəririk. Biz çox zaman qarşımıza ambisiyalı və qısamüddətli planlar, hədəflər qoyuruq. Lakin bunları icra etmək heç də mümkünsüz deyildir. Biz o cür fəal və cəld şəkildə işləməsəydik, əks təqdirdə 8 il müddətində ümumi daxili məhsulu üç dəfə artıra bilməzdik. Bu, yaxın gələcək üçün nəzərdə tutulmuş bir layihədir. Mən sizin "Azərkosmos" ilə əməkdaşlığınızı tam dəstəkləyirəm və bu sahədə möhkəm əməkdaşlıq münasibətlərinin yaranacağına əminəm".

Dövlət başçısı tədbirin sonunda ölkəmizin qarşısında duran inkişaf perspektivlərindən danışaraq bildirdi ki, müstəqilliyimizin ilk illəri ölkəmiz üçün çox çətin olub. Ermənistanın ölkəmizə təcavüzü, ərazilərimizin işğal olunması, vətəndaş müharibəsi, iqtisadiyyatın tənəzzülə uğraması müstəqilliyimizin ilk illərində qarşılaşdığımız çətinliklər idi. Odur ki, dövlətçiliyimizi bərpa etmək üçün hər şeyi sıfırdan aşağı həddən başlamağa məcbur olduq. Bunun üçün ölkədə siyasi sabitlik bərpa edildi, geniş iqtisadi islahatlar həyata keçirildi.

Ölkəmizin inkişaf perspektivlərindən danışarkən isə Prezident bildirdi: "Bizim gələcəyə baxışımız aydındır. Biz Azərbaycanı gələcəkdə müasir, inkişaf etmiş, beynəlxalq birliyə tam inteqrasiya olunmuş və bütün azadlıqlar, o cümlədən iqtisadi azadıqlar təmin edilmiş yüksək həyat standartlarına malik olan ölkə kimi görürük. Yəqin ki, hər bir ölkə rəhbəri ölkəsi və vətəndaşları üçün bunları arzulayır. Bizim bunlara nail olmaq üçün çox yaxşı imkanlarımız vardır. Yenidən əvvəldə dediyimiz sözlərə qayıtmaq istərdim. Fransa ilə Azərbaycan arasında ikitərəfli münasibətlər çox əhəmiyyətlidir. Bütün bu illər ərzində biz yüksək səviyyəli qarşılıqlı əməkdaşlıq və anlaşmanın şahidi olmuşuq. Ötən gün Prezident Fransua Olland ilə görüşümüz bir daha təsdiqlədi ki, indiyədək görülmüş işlər yeni əməkdaşlıq üçün qapılar açır. Ona görə də şirkətlərin rolu əvvəlkindən daha çox ola bilər. Çünki indi Azərbaycan 10 il əvvəlkindən daha çox imkanlara malikdir. Biz islahatlar xəttini davam etdirəcəyik və gələcəkdə şirkətlərimiz üçün yeni layihələr daha da artacaqdır".

Prezident İlham Əliyev öz çıxışlarında dəfələrlə qeyd etmişdir ki, dövlətimiz inkişaf etmiş ölkələrlə iqtisadi münasibətlər qurmağa üstünlük verir və bu məqsədlə həmin ölkələrlə iqtisadi əməkdaşlığı ildən-ilə genişləndirir. Prezidentin Fransaya son səfəri və bu ölkənin işgüzar dairələri ilə olan görüşlərə əsaslanıb deyə bilərik ki, Fransa ilə iqtisadi əlaqələrimiz də daha yüksək səviyyəyə çatacaq.

Rüstəm KAMAL

Azərbaycan.-2012.-28 sentyabr.-S.5.