Yaltada MDB Hökumət Başçıları Şurasının iclası olmuşdur

MDB İcraiyyə Komitəsinin mətbuat xidmətindən AzərTAc-a bildirmişlər ki, sentyabrın 28-də Yaltada (Krım, Ukrayna) MDB Hökumət Başçıları Şurasının (HBŞ) növbəti iclası olmuşdur. Azərbaycanın nümayəndə heyətinə baş nazirin birinci müavini Yaqub Eyyubov başçılıq etmişdir.

Gündəlikdə Birlik çərçivəsində qarşılıqlı inteqrasiya əlaqələrinin müxtəlif cəhətlərinə aid iyirmidən çox məsələ olmuşdur.

HBŞ 2020-ci ilədək olan dövr üçün MDB dövlətlərinin innovasiya əməkdaşlığına dair Dövlətlərarası proqramın həyata keçirilməsi barədə 2012-2014-cü illər üçün Tədbirlər kompleksini təsdiq etmişdir. Həmçinin 2015-ci ilədək olan dövr üçün informasiya cəmiyyətinin qurulmasında və inkişafında MDB dövlətlərinin əməkdaşlıq strategiyası və onun həyata keçirilməsinə dair Fəaliyyət Planı təsdiq olunmuşdur.

Azad ticarət zonası haqqında müqavilənin qüvvəyə minməsi ilə əlaqədar iclasda hökumət başçılarının Bəyanatı qəbul edilmişdir. Hökumət başçıları müqavilənin hazırlanması sahəsində uzun illər boyu aparılmış işin başa çatdırılmasını alqışlayaraq bildirmişlər ki, bu sənəddə həm ÜTT-in üzvü olan dövlətlərin, həm də adı çəkilən təşkilata qoşulmaq məsələsi gündəlikdə duran dövlətlərin mənafelərini birləşdirmək mümkün olmuşdur. Bəyanatda qeyd edilmişdir ki, səmərəli fəaliyyət göstərən azad ticarət zonası hazırda MDB-nin iştirakçısı olan dövlətlərin optimal birgə fəaliyyət modelidir və Birliyin dövlətləri arasında ticarət-iqtisadi münasibətlərin keyfiyyətcə yeni səviyyədə və yeni hüquqi zəmində formalaşdırılması üçün əsas olacaqdır. Müqavilənin əsas müddəalarının inkişafı iştirakçı dövlətlərin xalqlarının rifahı naminə Birliyin daha da möhkəmləndirilməsinə təminat verəcəkdir.

İclasın iştirakçıları Özbəkistan Respublikasının Azad ticarət zonası haqqında müqavilədə iştirakı məsələsinə baxmışlar. Müvafiq ekspert qrupuna tapşırılmışdır ki, 2011-ci ilin oktyabrında razılaşdırılmış mövqelər əsasında sənədin layihəsini hazırlasın. Nəzərdə tutulur ki, bu məsələ barədə danışıqların iştirakçısı olan dövlətlərin hökumətləri göstərilən sənədin cari ilin sonunadək imzalanması məqsədilə onun layihəsinin dövlətdaxili razılaşdırılmasını həyata keçirəcəklər.

Birlik ölkələrinin pərakəndə ticarət şəbəkələrində ərzaq mallarının satışı xidmətləri bazarında rəqabətin vəziyyəti müzakirə edilmişdir. İclasın iştirakçıları MDB-nin iştirakçısı olan dövlətlərin antiinhisar orqanları və Dövlətlərarası Antiinhisar Siyasəti Şurası tərəfindən aparılan və pərakəndə ticarət şəbəkələrində bərabər rəqabət imkanlarının təmin edilməsinə və genişləndirilməsinə yönəldilmiş işi bəyənmişlər.

Dövlətlərarası Antiinhisar Siyasəti Şurasına tövsiyə edilmişdir ki, milli antiinhisar orqanlarına və pərakəndə ticarət bazarında rəqabətin inkişaf etdirilməsində, o cümlədən antirəqabət sazişlərinin və analoji mallar göndərənlər barəsində ayrı-seçkilik praktikasının aradan qaldırılması sahəsində MDB-nin iştirakçısı olan dövlətlərin ticarət sferasını tənzimləyən müvəkkil orqanlara kömək göstərsin.

Hökumət başçılarına Moskvada Ümumrusiya Sərgi Mərkəzi əsasında Birlik dövlətlərinin daimi fəaliyyət göstərən sərgilərinin yaradılması işlərinin gedişi barədə məlumat verilmişdir. İclasın iştirakçıları "Mir" Dövlətlərarası Teleradio Şirkəti əsasında "Mir -24" informasiya telekanalının Konsepsiyasını təsdiq etmişlər.

HBŞ-in üzvləri MDB-nin baza təşkilatları statusunun verilməsi barədə qərar qəbul etmişlər: MDB-nin Nanotexnologiyalar üzrə Beynəlxalq İnnovasiya Mərkəzinə - nanotexnologiyalar sahəsində elmi və innovasiya fəaliyyəti üzrə, Rusiya Federasiyasının hökuməti yanında Maliyyə Universitetinə və Ukrayna Dövlət Vergi Xidmətinin Milli Universitetinə - vergilər və vergitutma sahəsində kadrların hazırlanması, peşə hazırlığı və ixtisasartırması üzrə.

İclasın iştirakçıları qlobal maliyyə sabitliyi naminə maliyyə tənzimi və nəzarəti sahəsində Maliyyə Sabitliyi Şurasının üzvü olmayan dövlətlərlə qarşılıqlı əlaqələri genişləndirmək məqsədilə Şurada Müstəqil Dövlətlər Birliyi məkanında Regional Məsləhət Qrupunun yaradılması barədə Rusiya Federasiyası Maliyyə Nazirliyinin informasiyasını bəyənmişlər.

Hökumət Başçıları Şurası Vladimir Sokolini MDB-nin Dövlətlərarası Statistika Komitəsinin sədri təsdiq etmiş, MDB dövlətlərinin Sərhəd Qoşunları Komandanları Şurasının təklifi ilə polkovnik Marat Abdırayevi (Qırğızıstan) MDB dövlətlərinin Antiterror Mərkəzi rəhbərinin müavini, Birlik dövlətlərinin Müdafiə Nazirləri Şurasının təklifi ilə Veniamin Solovyovu (Rusiya) MDB dövlətlərinin Antiterror Mərkəzi rəhbərinin müavini təyin etmişdir.

Birliyin fəaliyyətinin bir sıra büdcə-maliyyə və təşkilati məsələləri də müzakirə olunmuşdur.

MDB Hökumət Başçıları Şurasının növbəti iclasının 2013-cü il mayın 31-də Minskdə keçirilməsi nəzərdə tutulmuşdur.

Zeynal AĞAZADƏ,

AzərTAc-ın xüsusi müxbiri

Azərbaycan.-2012.- 29 sentyabr.- S.2.