Azərbaycan Qara Dəniz İqtisadi Əməkdaşlıq Təşkilatının xarici işlər nazirlərinin toplantısında təmsil olunmuşdur

BMT Baş Məclisinin 67-ci sessiyası çərçivəsində Azərbaycanın xarici işlər naziri Elmar Məmmədyarov Qara Dəniz İqtisadi Əməkdaşlıq Təşkilatının (QDİƏT) xarici işlər nazirlərinin toplantısında iştirak etmişdir.

Xarici İşlər Nazirliyinin mətbuat xidmətindən AzərTAc-a bildirmişlər ki, iclasda əsasən təşkilatın səmərəliliyinin artırılması istiqamətində görüləcək tədbirlər ilə bağlı fikir mübadiləsi aparılmışdır.

E.Məmmədyarov çıxışında hazırda QDİƏT-də sədrlik edən Türkiyəyə və təşkilatın yeni baş katibinə uğurlar arzulamışdır.

Nazir təşkilat çərçivəsində səmərəli qərarvermə mexanizminin yaradılmasının və islahatların canlandırılmasının əhəmiyyətini qeyd etmişdir.

Ötən toplantıda qəbul olunmuş QDİƏT-in İqtisadi Gündəliyinin icrası ilə təşkilatın iqtisadi imkanlarının artacağını vurğulayan E.Məmmədyarov gündəliyin icrası üçün xüsusi fəaliyyət planının hazırlanmasının vacibliyini də qeyd etmişdir.

QDİƏT-in müxtəlif beynəlxalq təşkilatlar ilə dialoqu və əməkdaşlığı yüksək qiymətləndirdiyini deyən nazir qurumun üzvü olan ölkələrdə həlli uzadılmış münaqişələrin iqtisadi inteqrasiya meyllərinə mənfi təsir etdiyini vurğulamışdır.

Azərbaycan.-2012.- 29 sentyabr.- S.2.