Bakıda istedadlı rəssam İnna Kostinanın fərdi sərgisi açılmışdır

Sentyabrın 28-də Azərbaycan Milli İncəsənət Muzeyində çoxcəhətli yaradıcılığı ilə ölkəmizdə və xaricdə təsviri incəsənətsevərlər tərəfindən yaxşı tanınan, istedadlı rəssam İnna Kostinanın fərdi sərgisi açılmışdır.Mədəniyyət və Turizm Nazirliyinin təşkilatçılığı ilə keçirilən "Cənnət yuxuları" adlı sərgidə rəssamın 1993-cü ildən bugünədək müxtəlif texnikalarla çəkilmiş 150-dən artıq bir-birindən maraqlı əsərləri nümayiş etdirilmişdir.

AzərTAc xəbər verir ki, tədbirdə dövlət qurumlarının nümayəndələri, tanınmış rəssamlar, KİV nümayəndələri iştirak etmişlər.

Açılış mərasimində çıxış edən Azərbaycan Milli İncəsənət Muzeyinin direktoru Çingiz Fərzəliyev yeni sərginin açılışı münasibətilə rəssamı təbrik etmiş, ona yeni yaradıcılıq uğurları və belə sərgilərin davamlı olmasını arzulamışdır.

Mədəniyyət və Turizm Nazirliyinin şöbə müdiri Fikrət Babayev müasir rəssamların sərgilərinin təşkilini təqdirəlayiq hal kimi qiymətləndirmişdir.

Azərbaycan Dövlət Rəssamlıq Akademiyasının rektoru, xalq rəssamı Ömər Eldarov, xalq rəssamı Ağaəli İbrahimov çıxışlarında istedadlı rəssamın çoxşaxəli yaradıcılığından söhbət açmışlar.

Bildirilmişdir ki, Azərbaycanda və xarici ölkələrdə keçirilən 250-dən artıq sərginin iştirakçısı olmuş İnna Kostina "batik" texnikasında işlədiyi pannoları və "Arabeski" seriyasından rəsm əsərləri ilə məşhurlaşmışdır. Onun əsərləri dünyanın bir çox ölkələrinin tanınmış muzey və qalereyalarında nümayiş etdirilmiş, bir çox mükafat və qrantlara layiq görülmüşdür. Rəssamın qazandığı böyük uğurlardan biri də 2010-cu ildə İtaliyanın II Leone İncəsənət Mərkəzində keçirilən müsabiqənin mükafatçısı olmasıdır.

Qeyd edilmişdir ki, İnna Kostinanın ən böyük uğuru bir pedaqoq kimi onun böyük yaradıcılıq məktəbinin layiqli davamçısı, gözqamaşdırıcı əsərləri ilə bu gün hər kəsi valeh edən gənc rəssam Məryəm Ələkbərlinin istedadında özünü göstərir. Məryəm Ələkbərli bu gün yaratdığı əsərlərlə insan təxəyyülünü heyran qoyan yeni dünya yaratmışdır.

Mərasimdə çıxış edən Azərbaycan Respublikasının Prezidenti Administrasiyasının Humanitar siyasət məsələləri şöbəsinin müdiri Fatma Abdullazadə rəssamın yaradıcılığını yüksək qiymətləndirmişdir.

F.Abdullazadə bildirmişdir ki, o, bir tərəfdən fəal işləyən, üstəlik, konseptual işləyən rəssamdır, digər tərəfdən vaxtının xeyli hissəsini insanları sənətkarlıq ideyalarının sirlərindən agah etməyə, onları bizə yaxınlaşdırmağa həsr edir. İstedadlı rəssam öyrədəndə öz şəxsiyyətinin, öz yaradıcılığının hər birinin təbii gözəlliyini axtarmağa çalışır ki, bu da onun istedadının tam açılmasına kömək edir, bir növ kamilləşmə dövrü başlayır. Onun yaratdığı bütün obrazlar, xalq dastanlarının, miflərin, nağılların səhifələrindən qoparaq canlanan qadın obrazları, əfsanəvi quşlar, yarıqadınlar, yarıquşlar, əslində, bütöv bir dünya yaradır. Zənnimcə, o, ildən-ilə kamilləşəcək, gələcəkdə bizə yeni əsərlər bəxş edəcək, yaradıcılığında yeni üfüqlər açılacaqdır. İnna Kostina demişdir: "Biz öyrətdiklərimizə cavabdehik". Mən bu gün müəyyən mənada rəssama onun öyrətdikləri bütün insanlar adından da "sağ ol" demək istəyirəm.

Sonra İnna Kostina sərginin Milli İncəsənət Muzeyində təşkil edilməsindən məmnunluğunu bildirmiş və bu işdə zəhməti olan təşkilatçılara minnətdarlığını bildirmişdir.

Sonda sərgiyə baxış keçirilmişdir.

Azərbaycan.-2012.- 29 sentyabr.- S.6.