Azərbaycana gələn xarici turistlər yaxın gələcəkdə internet vasitəsilə elektron vizaları əldə etmək imkanına malik olacaqlar

"Hazırda biz Azərbaycanda turizm xidmətlərinin səviyyəsinin artırılmasına çox böyük əhəmiyyət veririk". AzərTAc xəbər verir ki, bu sözləri jurnalistlərə müsahibəsində mədəniyyət və turizm naziri Əbülfəs Qarayev söyləmişdir. Bildirmişdir ki, bu xidmətlərin dünya standartlarına cavab verməsi üçün mühüm işlər görməliyik. Regionlarda yerləşən hotel və mehmanxanalar növbəti yay mövsümündə yerli və əcnəbi qonaqları, turistləri bu məkanlara cəlb etmək məqsədilə xidmətin çeşidlərini artırmalı, keyfiyyətini təmin etməli, müəyyən təkliflər irəli sürməlidirlər.

Ə.Qarayev vurğulamışdır ki, Azərbaycan turizm sahəsində inkişaf edən yeni ölkələrdəndir. İlkin mərhələdə ölkənin bu sahədə tanınması üçün xarici şirkətlərlə, şəbəkələrlə əlaqələr qurulmalıdır. Bu gün ölkəmizə gələn turistlərə məlum olanda ki, Azərbaycanda "Hilton-Baku", "Four Seasons", "Marriot Abşeron" kimi hotellər fəaliyyət göstərir, artıq onlar özlərini daha rahat hiss edirlər. Çünki onlar bütün dünyada məşhur olan bu hotel şəbəkələrinin təcrübəsindən xəbərdardırlar.

Turistlərin ölkəyə rahat gəlmələrini təmin etmək məqsədilə Azərbaycanda elektron viza sisteminin tətbiqindən söz açan nazir bildirmişdir ki, Azərbaycan Prezidenti İlham Əliyevin müvafiq sərəncamına əsasən, ölkəyə daxil olan turistlər yaxın gələcəkdə internet vasitəsilə elektron vizaları əldə etmək imkanına malik olacaqlar. Bu istiqamətdə bir sıra işlər görülmüşdür. Artıq bir neçə səfirlikdə bu proses tətbiq olunur və digərlərində isə müvafiq avadanlıq, proqramlar alınması və elektron xidmətlərin tətbiqi istiqamətində müvafiq işlər, hazırlıqlar həyata keçirilir. Bu proses ilkin mərhələdə yalnız turist şirkətlərinin müqaviləsi əsasında ölkəyə gələn turistlərə şamil ediləcəkdir. Biz tam əminik ki, gələn yay mövsümünün əvvəlinədək elektron viza sistemi məsələsi tamamilə öz həllini tapacaqdır.

Əbülfəs Qarayev qeyd etmişdir ki, gələcəkdə Azərbaycanda daha ucuz hotellərin tikintisi də nəzərdə tutulmuşdur. Biz gələcəkdə Bakıda və Azərbaycanın bütün bölgələrində 3 ulduzlu və 2 ulduzlu hotel və motellərin inşasına xüsusi önəm verəcəyik.

AzərTAc

Azərbaycan.-2012.- 30 sentyabr.- S.4.