İnsan Hüquqları üzrə Avropa Məhkəməsi Dağlıq Qarabağı Azərbaycan Respublikasının ərazisi kimi tanıyır

AzərTAc xəbər verir ki, İnsan Hüquqları üzrə Avropa Məhkəməsinin Yuxarı Palatası yanvarın 9-da Dağlıq Qarabağ ilə bağlı iki işə baxmışdır.

Azərbaycan Respublikasının İnsan Hüquqları üzrə Avropa Məhkəməsindəki nümayəndəsi Çingiz Əsgərov bildirmişdir ki, Ermənistanın işğal etdiyi Gülüstan kəndinin milliyyətcə erməni olan sakininin şikayətində Azərbaycanda guya onun əmlak hüququnun pozulduğu, digər işdə isə Azərbaycanda erməni qəbiristanlığının dağıdıldığı iddia edilirdi. Bu işlərlə bağlı yanvarın 9-da İnsan Hüquqları üzrə Avropa Məhkəməsində dinləmələr keçirilmişdir. Azərbaycan nümayəndəsinin təqdim etdiyi sübutlar əsasında məhkəmə çox ədalətli və əhəmiyyətli qərar çıxarmışdır. İnsan Hüquqları üzrə Avropa Məhkəməsinin Yuxarı Palatası ermənilərin müraciətini rədd etmişdir.

İnsan Hüquqları üzrə Avropa Məhkəməsinin qərarında vurğulanmışdır ki, Dağlıq Qarabağ Azərbaycan Respublikasının ərazisidir və Ermənistan silahlı qüvvələri tərəfindən işğal olunmuşdur. Ermənistanın işğalı nəticəsində bir milyondan artıq azərbaycanlı qaçqın və məcburi köçkün vəziyyətində yaşamaq məcburiyyətində qalmışdır.

Azərbaycan.- 2012.- 11 yanvar.- S. 4.