Azərbaycan diplomatı və AzərTAc-ın xüsusi müxbiri «Ukraynanın müstəqilliyinin 20 illiyi» medalı ilə təltif edilmişlər

AzərTAc xəbər verir ki, yanvarın 9-da Kiyevdə "Qızıl fortuna" ("QF") Beynəlxalq Akademik Reytinqi tərəfindən təşkil edilmiş təntənəli Yeni il - Milad qəbulu olmuşdur. Qəbulda ikitərəfli münasibətlərin inkişafına və dərinləşməsinə sanballı şəxsi töhfələrinə görə əcnəbi vətəndaşlar mükafatlandırılmışlar.

Qeyd edək ki, "QF"nin Rəyasət Heyətinə dünyanın 29 ölkəsinin, o cümlədən Azərbaycanın Milli Elmlər Akademiyasının rəhbərləri daxildir. Qalibin və namizədlərin reytinqlərinin müəyyən edilməsində ekspert qismində Ukrayna MEA-nın Sosiologiya İnstitutunun aparıcı mütəxəssisləri, Ukrayna Ali Radasının deputatları, vilayət və şəhər dövlət administrasiyalarının, sahə nazirliklərinin və idarələrinin rəhbərləri, aparıcı kütləvi informasiya vasitələrinin nümayəndələri iştirak etmişlər.

Tədbirdə Ukrayna hakimiyyətinin bütün qollarının, bu ölkədə akkreditasiya olunmuş diplomatik korpusun, o cümlədən Azərbaycan səfirliyinin nümayəndələri, hərbi attaşelər, Ukraynanın elmi və mədəni elitasının, yerli və xarici KİV-lərin təmsilçiləri iştirak etmişlər.

Qəbulun rəsmi hissəsində Azərbaycanın Ukraynadakı səfirliyinin ikinci katibi Fərid Babayevə və Azərbaycan Dövlət Teleqraf Agentliyi - AzərTAc-ın Ukrayna, Belarus və Moldovadakı xüsusi müxbiri (müxbir məntəqəsi Kiyevdə yerləşir) Zeynal Ağazadəyə "Ukraynanın müstəqilliyinin 20 illiyi" medalı təqdim olunmuşdur.

Azərbaycan diplomatına və jurnalistinə medalları Reytinqin Rəyasət Heyətinin başçısı, Ukrayna Milli Elmlər Akademiyasının prezidenti, akademik Boris Patonun imzası olan vəsiqələrlə birlikdə Reytinqin Baş Direktorluğunun rəhbəri, doktor Dmitri Akimov təqdim etmişdir.

O, təbrik nitqində ulu öndər Heydər Əliyevlə unudulmaz görüşlərini səmimiyyətlə xatırlayaraq qeyd etmişdir ki, Prezident İlham Əliyevlə də görüşmək şərəfinə nail olmuşdur. D.Akimov, həmçinin "Qızıl fortuna"nın Azərbaycan Milli Elmlər Akademiyası ilə sıx və səmərəli əməkdaşlıq etdiyini vurğulamışdır.

Sonra bayram konserti olmuşdur.

Azərbaycan.- 2012.- 11 yanvar.- S. 4.