AMEA Rəyasət Heyətinin növbəti iclası keçirilmişdir

Azərbaycan Milli Elmlər Akademiyası (AMEA) Rəyasət Heyətinin AMEA Fizika-Riyaziyyat və Texnika Elmləri Bölməsinin (FRTEB) 2011-ci il üçün hesabatına həsr olunmuş növbəti iclası keçirilmişdir.

Akademiyadan AzərTAc-a bildirmişlər ki, iştirakçılar əvvəlcə foyedə bölmə institutlarının 20 ildə qazandığı nailiyyətləri əks etdirən sərgi ilə tanış olmuşlar.

AMEA-nn prezidenti akademik Mahmud Kərimov gündəlikdəki məsələlər haqqında məlumat vermişdir.

AMEA FRTEB-in akademik-katibi, akademik Akif Hacıyev bölmə institutlarının 2011-ci ildə elmi və elmi-təşkilati fəaliyyəti haqqında hesabat məruzəsi ilə çıxış etmişdir. Bildirilmişdir ki, keçən il bölmə müəssisələrinin planına həm fundamental elmi-tədqiqat işləri, həm də tətbiqi xarakterli elmi-texniki tədqiqatlar daxil edilmişdir. Bölmə institutlarında 26 problemə aid 82 mövzu üzrə 220 tədqiqat işi aparılmışdır. 39 elmi-tədqiqat işinin nəticəsinin xalq təsərrüfatına tətbiqi tövsiyə edilmiş, bunlardan 29-u artıq tətbiq olunmuşdur. "AMEA elmi müəssisələrinin başa catdırılmış elmi-tədqiqat və təcrübə-konstruktor işlərinin 2011-ci il üçün tətbiq planı"na bölmə müəssisələrinin 34 işi (16-sı keçici, 18-i yeni) daxil edilmiş, bu işlər plan üzrə tam yerinə yetirilmişdir. Bölmə müəssisələrində aparılan tədqiqatların nəticələrinin xalq təsərrüfatında tətbiqi üçün 6 müqavilə üzrə iş yerinə yetirilmişdir. Ölkənin elmi tutumlu strateji problemlərinin həllində bölmənin elmi potensialından geniş istifadə olunmuşdur.

Hesabat ilində bölmə əməkdaşları xarici ölkələrin bir sıra nüfuzlu elmi jurnallarının redaksiya heyətinin tərkibinə daxil edilmişdir. Alimlərimizin apardığı tədqiqatların nəticələrinə olan xarici istinadların sayı da əvvəlki illərlə müqayisədə artmışdır.

A.Hacıyev bildirmişdir ki, hazırda bölmənin müəssisələrində 1934 nəfər, o cümlədən 1085 elmi işçi (175 elmlər doktoru, 446 elmlər namizədi), 16 akademik, AMEA-nın 26 müxbir üzvü çalışır.

Bölmənin əməkdaşları tərəfindən 11 monoqrafiya (5-i xaricdə), 15 kitab, 30 dərslik və elmi-kütləvi nəşr, 1286 məqalə (218 SCİ jurnalları) çap olunmuşdur. Məqalələrin 605-i xaricdə çap olunmuşdur. Bölmə əməkdaşları 13 patent almışlar.

Qeyd olunmuşdur ki, bölmədə 52 (34-ü əyani, 18-i qiyabi) doktorant təhsil alır, 23 doktorant isə təhsilini başa vurmuşdur. Bundan əlavə, bölmə müəssisələrində 136 nəfər mütəxəssis dissertant kimi elmi-tədqiqat işi aparır. Əməkdaşlardan 6-sı doktorluq, 27-si fəlsəfə doktorluğu dissertasiyaları müdafiə etmişlər.

Akademiklər Arif İsmayılzadə, Arif Mehdiyev, Əhliman Əmiraslanov, Akif Əlizadə, Fikrət Əliyev, Telman Əliyev, Arif Həşimov, AMEA-nın müxbir üzvləri Adil Qəribov, Rasim Əliquliyev və Əyyub Quliyev bölmənin illik hesabatını qənaətbəxş hesab etmişlər.

AMEA Fizika-Riyaziyyat və Texnika Elmləri Bölməsinin 2011-ci ildəki elmi və elmi-təşkilati fəaliyyəti haqqında hesabatı müzakirələrdən sonra AMEA RH-ın qərarı ilə təsdiq olunmuş və AMEA-nın illik hesabatına daxil edilmişdir.

Tədbirdə, həmçinin 2012-2013-cü illərdə keçiriləcək beynəlxalq və respublika səviyyəli elmi və elmi-texniki tədbirlərin planı da müzakirə olunmuşdur.

Azərbaycan.- 2012.- 12 yanvar.- S. 5.