Avropa Şurası Parlament Assambleyasının yeni sədri seçilmişdir

Avropa Şurası Parlament Assambleyasının (AŞ PA) qış sessiyası ənənəvi olaraq büro və siyasi qruplarda keçirilən yığıncaqlardan qurumun yeni sədrinin seçkisi ilə öz işinə başlamışdır.

Avropalı deputatlar yekdilliklə Fransanın AŞ PA yanındakı daimi nümayəndəsinin rəhbəri Jan-Klod Minonun namizədliyini dəstəkləmişlər.

Yeni sədr ondan əvvəl bu vəzifəni aparmış həmkarlarının Avropa Şurasının (AŞ) prinsiplərinə sadiq qalaraq, onun imicinin yüksəlməsinə öz töhfələrini verdiklərini yüksək qiymətləndirmiş, AŞ-ın əsas prioritetləri olan demokratiya, insan haqları və qanunun aliliyinin inkişafında mühüm və əhəmiyyətli addımlar atıldığını diqqətə çəkmiş və qurumun əldə etdiyi dəyərlərin daha da zənginləşməsinə bütün qüvvə və bacarığı ilə səy göstərəcəyini bildirmişdir.

Avropa məkanındakı dondurulmuş münaqişələrə, o cümlədən, Ermənistan-Azərbaycan, Dağlıq Qarabağ münaqişəsinə toxunan Jan-Klod Mino onların dialoq yolu ilə həllini dəstəklədiyini bəyan etmişdir.

Sonra AŞ PA sədrinin yeni müavinlərinin seçkisi keçirilmişdir. AŞ nizamnaməsinə uyğun olaraq sədrin 19 müavini seçilmişdir.

Sessiyanın gündəliyinin müzakirəsi zamanı Rusiyada keçirilmiş dumaya seçkilər və qarşıdakı prezident seçkiləri ilə bağlı məsələnin təxirə salınmadan təcili müzakirə edilməsi ətrafında fikir ayrılığı yarandığından həmin məsələ səsə qoyulmuşdur. 94 deputat lehinə və 94 nəfər isə əleyhinə səs verdiyindən məsələnin təcili müzakirəyə çıxarılması gündəlikdən çıxarılmışdır.

Deputatlar Macarıstanda demokratiyanın vəziyyəti ilə bağlı məsələni təcili deyil, yaz sessiyasında müzakirə edilməsini qərara almışlar.

AŞ PA-nın keçmiş sədri sessiyada iki illik fəaliyyəti ilə bağlı çıxışında tolerantsızlığa və diskriminasiyaya qarşı mübarizə apardığını, Ermənistan-Azərbaycan, Dağlıq Qarabağ münaqişəsi üzrə alt komitənin fəaliyyətinin bərpasına nail olduğunu xatırlatmış, dinlərarası və mədəniyyətlərarası dialoqun fəaliyyətinin əsas tərkib hissəsi təşkil etdiyini, ayrı-ayrı ölkələrə səfərləri zamanı həmin ölkələrdə demokratiyanın inkişafına çağırışlar etdiyini bildirmişdir.

Mərakeşdə keçirilmiş seçki ilə bağlı məruzəçi hələ 12 il bundan əvvəl bu ölkədə islahatlara start verildiyini, əhalisinin 45 faizinin savadsız olduğu Mərakeşdə islahatların həyata keçirilməsinin müəyyən çətinliklərlə qarşılaşdığını, buna baxmayaraq digər ərəb ölkələri ilə müqayisədə bu ölkədə vəziyyətin sabit olduğunu demişdir.

Rusiya Dumasına keçirilmiş seçkiləri müşahidə edən AŞ-ın deputat qrupunun rəhbəri hollandiyalı deputat seçkilər zamanı bəzi məntəqələrdə pozuntulara yol verilməsinin seçicilərin haqlı narazılığına səbəb olduğunu, onun nəticələri ilə razılaşmayan vətəndaşların nümayiş keçirdiklərini, xalqın haqlı tələbini nəzərə alan dövlət rəhbərlərinin seçki sistemində müəyyən dəyişikliklər etdiyini müsbət hal kimi qeyd etmişdir.

Bununla qış sessiyasının iş gününün birinci yarısı başa çatmışdır.

Əsgər ƏLİYEV,

AzərTAc-ın xüsusi müxbiri

Strasburq

Azərbaycan.- 2012.- 24 yanvar.- S. 5.