Slovakiya Azərbaycanın ərazi bütövlüyünü dəstəkləyir

Aprelin 11-də Milli Məclisin Sədri Oqtay Əsədov Slovakiya Respublikası Baş nazirinin müavini, xarici və Avropa işləri naziri Miroslav Layçak ilə görüşüb. Görüşdə Azərbaycan-Slovakiya dostluq əlaqələri müzakirə olunub və bir sıra təkliflər səsləndirilib.

Oqtay Əsədov bildirib ki, qarşılıqlı səfərlər ölkələr arasındakı əlaqələri daha da inkişaf etdirir. Sədr ölkələrarası hüquqi bazanın gücləndirilməsinin vacibliyini də vurğulayıb. Hər iki ölkə arasındakı iqtisadi əlaqələrə toxunan Oqtay Əsədov qeyd edib ki, Azərbaycanla Slovakiya arasında iqtisadi əlaqələr inkişaf edir, lakin hələlik bu, hər iki ölkənin iqtisadi potensialına uyğun deyil. Bunu daha da inkişaf etdirmək lazımdır: "Bu gün Cənubi Qafqazda iqtisadi inkişafın 80 faizi Azərbaycanın payına düşür. Hazırda Slovakiyanın Azərbaycanda 5 şirkəti çox uğurla fəaliyyət göstərir. Biz arzu edərdik ki, bu, beş deyil, 25 şirkət olsun".

Azərbaycanın dünyanın 78 ölkəsi ilə dostluq qrupunun olduğunu xatırladan parlamentin sədri Slovakiya ilə birbaşa dostluq qrupunun yaradılmasını vacib bilib. Oqtay Əsədov Ermənistan-Azərbaycan, Dağlıq Qarabağ problemini də qonaqların diqqətinə çatdırıb. Bildirib ki, bu problemin həllində Slovakiyanı da Azərbaycanı dəstəkləyən ölkə kimi görür: "Biz ATƏT-in Minsk qrupuna tam inamımızı itirməmişik. Dağlıq Qarabağ və işğal olunan digər yeddi rayon Azərbaycanın əzəli torpaqlarıdır. Gec-tez işğal olunan ərazilər geri qaytarılacaq. Hətta indiki Ermənistan dövləti də tarixi Azərbaycan torpaqları üzərində qurulub".

Slovakiya Respublikasının Baş nazirinin müavini, xarici və Avropa işləri naziri Miroslav Layçak çıxış edərək yüksək qonaqpərvərliyə və hörmətə görə təşəkkürünü bildirib. Qeyd edib ki, Slovakiya Azərbaycanın ərazi bütövlüyünü dəstəkləyir. Əlavə edib ki, o, Azərbaycana bir neçə iş adamı ilə birgə gəlib. Onlar burada müəyyən görüşlər keçirəcəklər: "İnanıram ki, keçirilən görüşlər ölkələrarası əlaqələrin inkişafına kömək edəcək. Biz həmçinin siyasi və iqtisadi əlaqələri yüksəltməliyik. Qanunvericilik bazasının formalaşdırılması üçün işlər aparılmalıdır. Bu, iş adamlarının təhlükəsiz mühitdə çalışmalarında əminlik yaradar".

Enerji və turizm sahəsində hər iki ölkənin böyük perspektivi olduğunu deyən M.Layçak bu sahədə əlaqələrin inkişaf etdirilməsinin vacibliyini vurğulayıb. O, həmçinin Oqtay Əsədovun parlamentlərarası dostluq qrupunun yaradılması fikrini müsbət qarşılayıb. Bildirib ki, belə bir qrupun yaradılması üçün əlindən gələn köməyi əsirgəməyəcək.

Elgün MƏNSİMOV

Azərbaycan.- 2013.- 12 aprel.- S. 2.