Azərbaycan Respublikası Müharibə, Əmək, Silahlı Qüvvələr və Hüquq-Mühafizə Orqanları Veteranları Təşkilatının V qurultayı keçirilmişdir

Aprelin 11-də Azərbaycan Respublikası Müharibə, Əmək, Silahlı Qüvvələr və Hüquq-Mühafizə Orqanları Veteranları Təşkilatının V qurultayı keçirilmişdir.

AzərTAc xəbər verir ki, Azərbaycanın dövlət himni səsləndirildikdən sonra qurultay açıq elan olunmuşdur.

Sonra Azərbaycan xalqının ümummilli lideri Heydər Əliyevin, şəhidlərimizin və hesabat dövründə dünyasını dəyişmiş Şura üzvlərinin xatirəsi bir dəqiqəlik sükutla yad edilmişdir.

Daha sonra qurultayın mandat komissiyası və katibliyi seçilmişdir.

Hesabat məruzəsi ilə çıxış edən Azərbaycan Respublikası Müharibə, Əmək, Silahlı Qüvvələr və Hüquq-Mühafizə Orqanları Veteranları Təşkilatı sədrinin birinci müavini S.Tağızadə Prezident İlham Əliyevin veteranlara göstərdiyi diqqət və qayğısından minnətdarlıqla danışmışdır.

Məruzəçi ümummilli lider Heydər Əliyevin veteranların hüquqlarının bərpa olunmasında, onlara diqqət və qayğı göstərilməsində böyük xidmətlərini xatırladaraq demişdir ki, veteranlar hazırda Prezident İlham Əliyevin qayğı və diqqətini daim hiss edirlər.

O, görülən tədbirlərin veteranların daha da fəallaşmasına, gənclərin hərbi vətənpərvərlik ruhunda tərbiyə edilməsi sahəsində onların üzərinə düşən vəzifələrin ardıcıl yerinə yetirilməsinə müsbət təsir göstərdiyini xüsusi vurğulamışdır.

Bildirilmişdir ki, hesabat dövründə həm respublika, həm də yerli veteran şuralarının əsas aparıcı qüvvəsi olan daimi komissiyalarının fəaliyyətinin canlanması üçün gərgin iş aparılmışdır. Rayon və şəhər veteranlar şuralarının rəyasət heyətinin tərkibində əhəmiyyətli keyfiyyət dəyişiklikləri edilmişdir. Hazırda fəaliyyət göstərən 23 rayon və şəhər təşkilatında veteran təşkilatlarının 26,4 faizində rəhbərliyə yeni fəal veteranlar seçilmişlər. Əvvəllər mövcud olan və paralel fəaliyyət göstərən komissiyaların sayı iki dəfə azaldılmış, onların rəhbərliyi möhkəmləndirilmişdir. Veteranlar Şurası bu gün ölkənin vətəndaş cəmiyyətinin ən nüfuzlu təmsilçisi kimi 1742 ilk təşkilatı, 86 rayon və şəhər təşkilatını, Naxçıvan Muxtar Respublikası və 3 iri peşə sahəsi veteran təşkilatını özündə birləşdirir. Şura MDB Veteranlar Təşkilatının Əlaqələndirmə Şurasının və Dünya Veteranlar Şurası kimi beynəlxalq təşkilatların üzvü olaraq bu təşkilatların işində fəal iştirak edir.

Natiq Veteranlar Şurasının fəaliyyətini geniş işıqlandırdıqlarına görə Azərbaycan Dövlət Teleqraf Agentliyinin (AzərTAc), "Azərbaycan", "Xalq qəzeti" və "Respublika" qəzetlərinin kollektivlərinə minnətdarlığını bildirmişdir.

Azərbaycan dövlətinin və şəxsən Prezident İlham Əliyevin veteranlara göstərdiyi diqqət və qayğıdan razılıqla danışan S. Tağızadə demişdir ki, Azərbaycan veteranları Prezident İlham Əliyevin ətrafında sıx birləşərək onun simasında öz gələcəyinə ümidlə baxırlar. S.Tağızadə vurğulamışdır ki, Respublika Veteranlar Şurasının Rəyasət Heyəti Azərbaycan Prezidentinin ətrafında sıx birləşib və builki prezident seçkilərində də Heydər Əliyev siyasətinin layiqli davamçısı İlham Əliyevə səs verəcəkdir.

S.Tağızadə təşkilatın adından İlham Əliyevin qarşıdan gələn prezident seçkilərində namizədliyinin irəli sürülməsi təklifi ilə çıxış etmişdir.

Təklif yekdilliklə qəbul olunmuşdur.

Qurultayda çıxış edən Prezident Administrasiyasının İctimai-siyasi məsələlər şöbəsinin müdir müavini Ərəstun Mehdiyev Böyük Vətən müharibəsində hamının bir əqidə, bir fikir - Vətəni müdafiə etmək əzmi ilə cəbhəyə yollandığını, bu yolda canlarından keçdiklərini diqqətə çatdırmışdır. Keçən əsrin 90-cı illərinin əvvəllərində bu müharibəyə, eləcə də veteranlara münasibətin dəyişdiyini xatırladan natiq yalnız ümummilli lider Heydər Əliyevin hakimiyyətə qayıdışından sonra veteranların bir çox problemlərinin həll olunduğunu və bu münasibətin dahi rəhbərin siyasi xəttinin layiqli davamçısı Prezident İlham Əliyev tərəfindən davam etdirildiyini xüsusi qeyd etmişdir.

Şuranın fəaliyyətini yüksək qiymətləndirən Ə.Mehdiyev demişdir ki, Azərbaycanın dövlət müstəqilliyinin qorunmasında, xalqın rifah halının yaxşılaşmasında, eləcə də gənc nəslin vətənpərvərlik ruhunda tərbiyə olunmasında veteranlarımız öz töhfəsini vermişlər. İstər sovet dövründə, istərsə də müstəqillik illərində veteranlar bütün sahələrdə fəallıq nümayiş etdirmişlər. Bu gün veteranlarımız bizim sıralarımızdadır. Veteranların vətən və dövlətçiliklə bağlı fikirləri həmişə önəmli olmuşdur.

Azərbaycan dövləti də veteranların əməyinə böyük qiymət verir. Hər il 9 may Qələbə Gününün qeyd edilməsi və bu ənənənin qorunub saxlanması hər bir veteranın ürəyincədir və bu ənənə davam etdiriləcəkdir. İnanırıq ki, veteranlar bundan sonra da öz vətəndaşlıq, dövlətçilik mövqeyi ilə ölkədə aparılan siyasətə dəstək verəcəklər.

Sonra Veteranlar Şurasının rayon təşkilat sədrlərinin çıxışı dinlənilmişdir. Çıxış edən veteranlar onların sosial-məişət məsələlərinin həllinə dövlətimizin göstərdiyi qayğıdan danışmış, təşkilatlarda görülən işləri, qarşıda duran vəzifələri, eləcə də problemləri diqqətə çatdırmış, rəy və təkliflərini bildirmişlər.

Qurultayda təşkilati məsələlərə baxılmış, Respublika veteranlar Təşkilatının Nizamnaməsinə dəyişikliklər edilmiş, Nəzarət Təftiş Komissiyasının Əsasnaməsi təsdiqlənmiş, Qətnamə qəbul olunmuş, Veteranlar Şurasının və Nəzarət Təftiş komissiyasının yeni tərkibləri seçilmişdir.

Tədbirin sonunda Veteranlar Şurası adından Prezident İlham Əliyevə müraciət qəbul edilmişdir.

* * *

Qurultaydan sonra Azərbaycan Respublikası Müharibə, Əmək, Silahlı Qüvvələr və Hüquq-Mühafizə Orqanları Veteranlar Şurasının plenumu keçirilmişdir.

Plenumda təşkilati məsələlərə baxılmış, Əlövsət Baxışov səs çoxluğu ilə Azərbaycan Respublikası Müharibə, Əmək, Silahlı Qüvvələr və Hüquq-Mühafizə Orqanları Veteranlar Şurasının sədri seçilmişdir.

Azərbaycan.- 2013.- 12 aprel.- S. 3.