İctimai Televiziya və Radio Yayımları Şirkəti Yayım Şurasına namizədlər irəli sürülüb

Azərbaycanın İctimai Televiziya və Radio Yayımları Şirkəti Yayım Şurasının 6 illik səlahiyyət müddəti başa çatmış üç üzvünün yerinə yeni namizədlər təqdim olunub. "İctimai televiziya və radio yayımı haqqında" Azərbaycan Respublikasının qanununa uyğun olaraq İctimai Televiziya və Radio Yayımları Şirkəti Yayım Şurasına idman federasiyaları, dini konfessiyalar və yaradıcılıq təşkilatları tərəfindən namizədlər irəli sürülüb.

Milli Məclisin Mədəniyyət komitəsinin dünən keçirilən iclasında bununla bağlı məsələ müzakirəyə çıxarılıb. Sənəd barədə məlumat verən komitə sədri Nizami Cəfərov qeyd edib ki, bununla bağlı layihə komitəyə Milli Televiziya və Radio Şurasının (MTRŞ) sədri Nuşirəvan Məhərrəmovun imzası ilə daxil olub. Nizami Cəfərov namizədlərin hər birinin ictimai fəaliyyətinin aktivliyini və cəmiyyətdə öz işləri ilə tanınmış insanlar olduğunu vurğulayıb. Bildirib ki, idman federasiyaları tərəfindən Boks Federasiyasının təşkilat komitəsinin sədri Babanlı Yusif Məmməd oğlu və Dövlət Bədən Tərbiyəsi və İdman Akademiyasının Tələbə Yaradıcılıq Birliyinin rəhbəri Ağayeva Validə Eldar qızı bir yer üçün namizəd kimi təqdim ediliblər.

Dini konfessiyalar tərəfindən Qafqaz Müsəlmanları İdarəsi sədrinin müşaviri Nurullayev Fuad İzzət oğlu və Alban-Udi Xristian Dini İcmasının sədri Mobili Robert Baqratoviçin namizədliyi irəli sürülüb. Yaradıcılıq təşkilatları tərəfindən nəzərdə tutulan yerə isə Azərbaycan Bəstəkarlar İttifaqından Qafarova Zemfira Həsən qızı, Azərbaycan Yazıçılar Birliyindən Ələddinov Rafiq Səməndər oğlu, Azərbaycan Rəssamlar İttifaqından Əliyev Ziyadxan Alxan oğlu və Azərbaycan Jurnalistlər Birliyindən Babayev Şahin Ənvər oğlu namizəd kimi təqdim olunublar.

Tədbirdə çıxış edən Milli Televiziya və Radio Şurasının sədri Nuşirəvan Məhərrəmov əminliyini bildirib ki, Yayım Şurasına təqdim olunan namizədlərin hər biri ümidləri doğrulda bilən insanlardır. O həmçinin özəl telekanallarda çəkilən serialların ssenari, mövzu seçimi, rejissor işi baxımından aşağı olduğunu vurğulayıb: "Bu telekanallar əsasən reklam, pul arxasınca getdiklərindən milli-mənəvi dəyərləri bəzən yaddan çıxarırlar. Xüsusən də, serialların çəkilişində, ssenarilərdə bu problemlər var. Hər şey xəyanət, intiqam üzərində qurulmamalıdır. Özəl kanallar bu məsələlərdə birbaşa cəmiyyət üçün faydalı, cəmiyyətin marağını özündə daşıyan seriallar çəkməlidirlər. Yaxşı ki, bizim ictimai və dövlət kanallarımız var, bu kimi əhəmiyyətli halları onlardan dərhal tələb edə bilirik. Onlara dövlət büdcəsindən vəsait ayrılır, tövsiyəmiz odur ki, özəl kanalların arxasınca getməsinlər".

Namizədlərin təsdiq edilməsi ilə bağlı məsələnin müzakirəsi Milli Məclisin plenar iclasına tövsiyə olunub.

Elgün MƏNSİMOV.

Azərbaycan.- 2013.- 11 aprel.- S. 7.