Kəndlərin siması dəyişir

Tikinti-quruculuq işləri kəndləri də əsaslı şəkildə əhatə etməyə başlayıb. Prezident İlham Əliyev çıxışlarında dəfələrlə bildirib ki, ən ucqar kəndimizdə də müvafiq infrastrukturun yaradılması üçün dövlətin yetərincə imkanları mövcuddur. Kəndlərə içməli su, qaz xətləri çəkilir, yollar abadlaşdırılır, təhsil, səhiyyə və mədəniyyət ocaqları tikilib istifadəyə verilir.

Qobustan rayonunun kəndləri də tikinti-quruculuq işləri sayəsində simalarını dəyişir. Məsələn, 254 təsərrüfatı, 1400 nəfərə yaxın əhalisi olan Cəmcəmli kəndində xeyli işlər görülüb. Onların sırasında şəhid Rauf Babaşov adına kənd tam orta məktəbi üçün 180 şagirdlik yeni binanın inşasını, şəhid Fuad Hüseynquluyev adına kitabxananın təmirini, yeni park salınmasını, yollara çınqıl döşənməsini qeyd etmək olar. Dağətəyi kənd olan Cəmcəmlidə heyvandarlıq və əkinçilik əhalinin əsas məşğuliyyəti sayılır. İki süni gölün yaradılması təsərrüfat işlərinə müsbət təsir edir. Kənddə təmizlik işlərinə diqqətin artırılması əhalinin ürəyincədir.

Bunlardan əlavə, Cəmcəmlinin girişinə qədər içməli su xətti çəkilib. Təsi-Qobustan xəttindən gələn sudan əhali razılıqla istifadə edir.

Fermer Telman Əhmədov da bu kənddə yaşayır. "Gücdaşı" kəndli-fermer təsərrüfatının rəhbəridir. Əkinçilik və heyvandarlıqla məşğuldur. Cari ilin məhsulu üçün 200 hektar sahədə taxıl əkib. Əsasən toxum istehsal edir. Qobustan Bölgə Təcrübə Stansiyası ilə işgüzar əlaqələri var. Təsərrüfat istehsal etdiyi yüksək reproduksiyalı taxılı digər fermerlərə və fiziki şəxslərə də satır. Kombayn, traktor, taxılsəpən və digər kənd təsərrüfatı texnikaları, 1000 tonluq taxıl anbarı olan təsərrüfatda 80 baş qaramal, 500 baş davar da bəslənir.

F.Əhmədov 5 hektarlıq üzüm sahəsini daha da genişləndirmək, 10 hektar nar bağı salmaq, cins heyvandarlıq təsərrüfatı yaratmaq arzusundadır. Bu il Sahibkarlığa Kömək Milli Fondundan 30 min manat güzəştli kredit alıb. Ümumilikdə təsərrüfat işlərində 30-dan çox ailə ilə çiyin-çiyinə çalışır. O da Cəmcəmlini müasir və inkişaf etmiş bir kənd kimi görmək istəyir. Bu yolda üzərinə düşən hər bir işin öhdəsindən gəlməyə hazır olduğunu bildirir.

Qobustanın Ərəbşahverdi, Qaradüzlü və Xəlfəli kəndləri Qurbançı ərazi nümayəndəliyinə daxildir. Ümumilikdə bu kəndlərdə 251 təsərrüfat mövcuddur və 1649 ailə yaşayır. Bələdiyyə hesabına kənd yolları, bulaqlar təmir olunur. Regionların sosial-iqtisadi inkişafına dair Dövlət Proqramı xətti ilə Qurbançıda müasir klub, kitabxana, feldşer-mama məntəqəsi inşa edilib.

Ərəbşahverdi kəndində sahibkar Əlikram Musayevin dəstəyi ilə 200 yerlik xeyir-şər evi tikilib. Ə.Musayev "Emil" kəndli-fermer təsərrüfatının rəhbəridir. Əkinçilik və heyvandarlıqla məşğuldur. 50 baş qaramalı, 400 baş davarı var. Süni mayalanmadan səmərəli istifadə edən Ə.Musayev 128 hektar sahədə buğda, 110 hektar sahədə arpa da əkib. Mövcud kənd təsərrüfatı texnikaları ilə işlərinin öhdəsindən gələ bilir. Dövlətin sahibkarlığın inkişafına göstərdiyi diqqətə görə razılıq edir.

Qurbançı icra nümayəndəliyinə daxil olan kəndlərdə çətinliklər də az deyil. Qobustan RİH başçısının həmin kəndlərdə keçirilən səyyar qəbullarında bu barədə ətraflı danışılıb və müvafiq tədbirlərin görülməsi üçün lazımi qərarlar qəbul edilib. Ötən əsrin 60-cı illərində çəkilmiş və istismar müddətini bir neçə dəfə başa vurmuş elektrik xətlərinin dəyişdirilməsi, kənd yollarının asfaltlaşdırılması, təbii qaz çəkilməsi əhalinin hələ də həllini gözlədiyi məsələlərdir.

Əvvəllər Qaradüzlü kəndində 400 hektara yaxın suvarılan əkin sahəsinin bu gün cəmi 40 hektarını suvarmaq mümkündür. Suvarma qurğuları sıradan çıxıb, arxlar yararsız hala düşüb. İşlərin yoluna qoyulması üçün dövlətin dəstəyinə ciddi ehtiyac var. Dəstək olsa, əkin sahələrini 600-700 hektara çatdırmaq olar. Vaxtilə şöhrəti çox-çox uzaqlara yayılan bu yerlərin süfrə üzümü indi ancaq həyətlərdə qalıb. Magistraldan Qaradüzlüyə gedən yolun təmirinə, körpü tikintisinə də ehtiyac var.

Bəli, problemlər az deyil. Ancaq görülmüş işləri yüksək qiymətləndirən kənd əhalisi əmindir ki, mövcud problemlər də tezliklə həllini tapacaq. Bu əminliyi isə dövlətin bölgələrə qayğısı və diqqəti yaradır.

Telman NƏZƏRLİ.

Azərbaycan.- 2013.- 11 aprel.- S. 10.