XVI Avrasiya İqtisadi Zirvə Toplantısı başa çatmışdır

Xəbər verdiyimiz kimi, İstanbulda Mərmərə Qrupu Strateji və Sosial Araşdırmalar Vəqfinin təşkilatçılığı ilə XVI Avrasiya İqtisadi Zirvə Toplantısı keçirilmişdir. Azərbaycanın geniş tərkibli nümayəndə heyəti tədbirdə iştirak etmişdir.

Toplantının son günü Azərbaycan rabitə və informasiya texnologiyaları naziri Əli Abbasovun da iştirak etdiyi "Kiber-təhlükəsizlik strategiyaları" başlıqlı bölmə iclası olmuşdur. İclasda Türkiyə Telekommunikasiya İdarəsinin sədri Tayfun Acarer, telekommunikasiya birliklərinin təmsilçiləri informasiya texnologiyalarının təhlükəsizliyi məsələlərindən bəhs etmişlər.

Sonda dövlət və hökumət başçılarının "Qlobal dünyanın problemləri" mövzusunda iclası olmuşdur. Makedoniya Prezidenti Gyorge İvanov, Albaniya Prezidenti Buyar Nişani, Bolqarıstanın keçmiş prezidentləri Jelyu Jelev, Petar Stoyanov və digərləri iclasda çıxış etmişlər.

XVI Avrasiya İqtisadi Zirvə Toplantısı yekun Bəyannamənin qəbul olunması ilə öz işini başa çatdırmışdır.

Oqtay BAYRAMOV,

AzərTAc-ın xüsusi müxbiri

İstanbul

Azərbaycan.- 2013.- 12 aprel.- S. 6.