Azərbaycanda İKT sahəsində qazanılan təcrübə Braziliya üçün maraqlı və faydalıdır

Rabitə və İnformasiya Texnologiyaları Nazirliyində Braziliyanın ölkəmizdə diplomatik missiyasını başa vuran səfiri Sergio de Souza Fontes Arrudan ilə görüş olmuşdur.

Nazirliyin mətbuat xidmətindən AzərTAc-a bildirmişlər ki, Azərbaycan ilə Braziliya arasında dostluq müstəvisində davam edən əlaqələrdən söz açan nazir Əli Abbasov gələcəkdə də ölkələrimiz arasında ikitərəfli münasibətləri genişləndirmək və tərəfdaşlıq əlaqələrini inkişaf etdirməkdə maraqlı olduğumuzu bildirmişdir.

Azərbaycanda 2013-cü ilin "İnformasiya-kommunikasiya texnologiyaları ili" elan edildiyini xatırladan Sergio Arruda isə ölkəmizdə informasiya-kommunikasiya texnologiyaları (İKT) sektorunun dinamik inkişafının müşahidə edildiyini vurğulamışdır. Azərbaycanda bu sahədə qazanılan təcrübənin Braziliya üçün də maraqlı və faydalı ola biləcəyinə diqqət çəkən səfir bu haqda məlumatları artıq öz hökumətinə təqdim etdiyini söyləmişdir.

Ötən il Braziliyada keçirilmiş ümumdünya "Açıq Hökumət Tərəfdaşlığı" (AHT) üzrə nazirlər toplantısı və illik sammitdə iştirakı ilə bağlı Braziliya səfirliyinin göstərdiyi fəaliyyəti yüksək dəyərləndirən nazir Əli Abbasov bu tədbirdən sonra ölkəmizdə İKT-nin tətbiqi ilə dövlətin idarəedilməsi, "Elektron hökumət", elektron xidmətlərin genişləndirilməsi və s. kimi faydalı tədbirlərin həyata keçirildiyini, eyni zamanda Azərbaycanın AHT təşəbbüsünə qoşulduğunu, bununla bağlı tədbirlər planının hazırlanaraq ölkə Prezidenti tərəfindən imzalandığını, müvafiq sənədə uyğun olaraq, artıq konkret işlərin icrasına başlanmasını qeyd etmişdir. Ölkələrimiz arasında İKT sektorunda təcrübə mübadiləsinin genişləndirilməsi məqsədilə qarşılıqlı səfərlərə ehtiyac olduğunu söyləyən nazir bu görüşlərin hər iki tərəf üçün faydalı və əhəmiyyətli ola biləcəyinə əminliyini bildirmişdir. Bakıda ənənəvi olaraq hər il keçirilən "Bakutel" sərgi-konfransına Braziliyanın müvafiq nazirliyi və informasiya texnologiyaları şirkətlərini də dəvət edən nazir Azərbaycanda "Yüksək Texnologiyalar Parkı"nın yaradılması üzrə işlərin aparılmasını, növbəti tədris ilindən İnformasiya Texnologiyaları Universitetinin, tezliklə isə İnformasiya Texnologiyalarının İnkişafı Dövlət Fondunun fəaliyyətə başlayacağını əsas gətirərək, ölkəmizdə bu sahəyə sərmayə qoyulması üçün əlverişli mühitin və geniş imkanların yarandığını, eyni zamanda gələcəkdə Braziliya şirkətlərinin sərmayələrinin Azərbaycan üzərindən region ölkələrinə ixracının mümkünlüyünü vurğulamışdır.

Azərbaycan.-2013.- 4 aprel.- S.5.