Bakıda yaşayan 57 min məcburi köçkün ailəsinin köçürülməsinə başlanılmışdır

"Bakıda yaşayan 57 min məcburi köçkün ailəsinin köçürülməsinə başlanılmışdır". Bu sözləri Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov aprelin 5-də jurnalistlərə açıqlamasında demişdir.

Əli Həsənov bildirmişdir ki, ötən il Azərbaycanda məcburi köçkünlər üçün 4 min yeni mənzil tikilmiş və 20 minə yaxın məcburi köçkün yeni mənzillərə köçürülmüşdür.

Komitə sədri qeyd etmişdir ki, məcburi köçkün ailələri üçün Müşfiqabadda 1440, Masazırda isə 760 mənzildən ibarət qəsəbələrin açılışı olmuşdur. Bu il də məcburi köçkünlər üçün 4 minə qədər mənzilin tikilməsi nəzərdə tutulur.

Əli Həsənov sözünə davam edərək demişdir: "Gəncə, Bərdə, İmişli, Balakən, Qəbələ və İsmayıllı rayonlarında məcburi köçkünlər üçün binalar tikiləcəkdir. Həmçinin Lökbatandakı Ümid qəsəbəsi də yenilənəcəkdir. Beləliklə, bu il 20 minə yaxın məcburi köçkün yeni mənzillərə köçürüləcəkdir".

Əli Həsənov vurğulamışdır ki, 9-cu mikrorayonda yarımçıq tikililərdə məskunlaşan məcburi köçkünlərin köçürülməsinə də başlanılacaqdır. Bu obyektlərin köçürülməsi üçün 14 milyon manat əlavə vəsait ayrılmışdır. Bu vəsait hesabına Müşfiqabadda 3 yeni hündürmərtəbəli bina tikiləcək və həmin yarımçıq binada məskunlaşanlar tam şəkildə bu qəsəbəyə köçürüləcəklər. Azərbaycan Dövlət Neft Akademiyasının yataqxanalarında yaşayan məcburi köçkünlər isə Masazır qəsəbəsində tikilmiş evlərdə yaşayacaqlar.

AzərTAc

Azərbaycan.- 2013.- 6 aprel.- S. 7.