AMEA-nın Tarix İnstitutu ilə Türkiyə Başbakanlıq Atatürk Kültür Dil və Tarix Yüksək Qurumu Atatürk Araşdırma Mərkəzi arasında birgə əməkdaşlıq protokolu imzalanmışdır

Aprelin 5-də Azərbaycan Milli Elmlər Akademiyasının A.Bakıxanov adına Tarix İnstitutunda Türkiyə Başbakanlıq Atatürk Kültür Dil və Tarix Yüksək Qurumu Atatürk Araşdırma Mərkəzinin əməkdaşları ilə görüş olmuşdur.

AzərTAc xəbər verir ki, görüşdə institutun direktoru, Milli Məclisin deputatı, AMEA-nın müxbir üzvü Yaqub Mahmudov imzalanacaq müqavilə haqqında məlumat vermişdir. Bildirmişdir ki, müqavilənin məqsədi birgə ümumtürk tarixinin araşdırılması, ortaq türk tarixinin yaradılması və yazılmasına nail olmaqdır. Bunun üçün Azərbaycan alimləri dəfələrlə Türkiyədə olmuş və türk tarixçiləri ilə Bakıda görüşlər keçirilmişdir və sonda birgə ortaq türk tarixinin yaradılması üçün razılıq əldə olunmuşdur. Əsas məqsədimiz dünyada bir türk xalqı, türk dövlətləri olaraq öz haqqımızı özümüzə qaytarmaqdır. Bildiyiniz kimi, müxtəlif dövrlərdə türklərin tarixi haqları tapdalanmış, onların tarixi təhrif olunmuş, türk xalqlarının mədəniyyətləri mənimsənilmişdir. Həmçinin əlifbalarımız əlimizdən çıxmış və tariximiz dünyaya düzgün təqdim olunmamışdır. Bunun üçün qardaş ölkənin alimləri ilə belə qərara gəldik ki, həm Türkiyənin, həm də Azərbaycanın görkəmli dövlət xadimlərinə eyni mövqedən yanaşaq. İnanıram ki, yaratdığımız ortaq türk tarixi gələcək nəsillərə dəyərli töhfə olacaqdır. Müqavilə əsasında soyqırımı tarixləri birlikdə araşdırılacaq, bu sahədə ayrı-ayrı problemlər birlikdə işləniləcək, birgə konfranslar təşkil ediləcək, alimlərimizin, doktorantlarımızın, tələbə və magistrlərin mübadiləsi aparılacaq, ümumtürk tarixinin yazılması üçün türk dünyasının görkəmli dövlət xadimlərinə, məşhur tarixi abidələrimizə aid kitablar nəşr olunacaqdır. Güman edirəm ki, gələcəkdə bu işdə bizə Mərkəzi Asiyanın türk dövlətləri və xalqları da qoşulacaqlar.

Türkiyə Başbakanlıq Atatürk Kültür Dil və Tarix Yüksək Qurumu Atatürk Araşdırma Mərkəzinin sədri professor Mehmet Ali Beyhan ortaq türk tarixinin yazılması istiqamətində imzalanacaq müqavilənin əhəmiyyətini vurğulamışdır.

Sonra Tarix İnstitutu ilə Atatürk Araşdırma Mərkəzi arasında elmi, mədəni və digər müxtəlif istiqamətli əlaqələri əhatə edən birgə əməkdaşlıq protokolu imzalanmışdır. Sənədi Tarix İnstitutunun direktoru Yaqub Mahmudov və Atatürk Araşdırma Mərkəzinin sədri Mehmet Ali Beyhan imzalamışlar.

Azərbaycan.- 2013.- 6 aprel.- S. 8.