Müalicə müəssisəsində məhkumların gözlərində cərrahiyyə əməliyyatı aparılmışdır

Ədliyyə Nazirliyinin Tibb Baş İdarəsi tərəfindən görkəmli alim, akademik Zərifə xanım Əliyevanın 90 illik yubileyinə həsr olunmuş bir sıra tədbirlər həyata keçirilir.

Cəzaçəkmə müəssisələrində saxlanılan məhkumlar arasında göz xəstəliklərini vaxtında aşkar etmək və tibbi yardım göstərmək məqsədilə Akademik Zərifə Əliyeva adına Milli Oftalmologiya Mərkəzinin əməkdaşlarının iştirakı ilə geniş ixtisaslaşdırılmış tibbi müayinələr təşkil edilmişdir. Mart-aprel ayları ərzində 80-ə yaxın məhkumun görmə orqanları müasir avadanlıqların köməyi ilə müayinə edilmiş, 10-a yaxın məhkum daha dəqiq müasir avadanlıqlarla müayinə olunmaq üçün Mərkəzə göndərilmişdir.

Penitensiar Xidmətin ictimaiyyətlə əlaqələr şöbəsindən AzərTAc-a bildirmişlər ki, aprelin 5-də Xidmətin müalicə müəssisəsində Akademik Zərifə Əliyeva adına Milli Oftalmologiya Mərkəzinin xüsusi səyyar oftalmoloji müayinə və əməliyyat blokunda mərkəzin əməkdaşlarının iştirakı ilə 10-dan artıq məhkumun gözlərində cərrahiyyə əməliyyatı aparılmış, 30 məhkum əlavə oftalmoloji müayinələrə cəlb olunmuş və onlara eynəklər paylanılmışdır.

Məhkumların görmə orqanlarında yaranan xəstəliklərin müasir tələblərə cavab verən səviyyədə müalicəsini təmin etmək üçün Tibb Baş İdarəsi tərəfindən Akademik Zərifə Əliyeva adına Milli Oftalmologiya Mərkəzi ilə səmərəli əməkdaşlıq əlaqələri yaradılmışdır. Cari ildə cəzaçəkmə müəssisələrinin 12 məhkumu Mərkəzə göndərilərək cərrahiyyə əməliyyatı olunmuş, 24 məhkum müxtəlif əlavə müasir oftalmoloji müayinələrə cəlb edilmişdir. Mərkəzin mütəxəssisləri tərəfindən cəzaçəkmə müəssisələrində 128 məhkum üzərində tibbi baxış və oftalmoloji müayinə həyata keçirilmişdir. Bu əməkdaşlıq məhkumlara yüksək səviyyəli oftalmoloji yardımın təmin edilməsinə köməklik göstərir.

Azərbaycan.- 2013.- 6 aprel.- S. 8.