Tibbi sosial ekspertiza işinin təkmilləşdirilməsi ilə bağlı müşavirə keçirilmişdir

Aprelin 5-də Respublika Tibbi Sosial Ekspertiza Mərkəzində əhaliyə göstərilən tibbi-sosial ekspertiza xidmətinin təşkili və əlillərin reabilitasiyası sahəsində mövcud vəziyyətin və qarşıda duran vəzifələrin müzakirəsinə həsr olunmuş müşavirə keçirilmişdir.

Əmək və Əhalinin Sosial Müdafiəsi Nazirliyinin ictimaiyyətlə əlaqələr şöbəsindən AzərTAc-a bildirmişlər ki, müşavirədə əmək və əhalinin sosial müdafiəsi nazirinin müavini Natiq Məmmədov və respublika üzrə Tibbi Sosial Ekspertiza komissiyalarının sədrləri iştirak etmişlər.

Tədbirdə vətəndaşlara göstərilən tibbi-sosial ekspertiza xidmətinin təkmilləşdirilməsi, eyni zamanda, tibbi-sosial ekspert komissiyalarının (TSEK) reabilitasiya göstəricilərinin daha da yüksəlməsi istiqamətində səylərini artırmalarının vacib olduğu bildirilmişdir.

Vurğulanmışdır ki, respublikada ilkin əlilliyin profilaktikasının gücləndirilməsi, əlilliyə görə göndərişlərin TSEK-ə səhiyyə müəssisələri tərəfindən təqdim edilməsi, əhaliyə göstərilən tibbi-sosial ekspertiza xidmətinin sadələşdirilməsi və səhiyyə müəssisələri tərəfindən TSEK-ə əsassız göndəriş hallarının azaldılması üçün Səhiyyə Nazirliyinə məktub göndərilmiş və bu istiqamətdə işin təşkilinə başlanılmışdır.

Tədbirdə əlilliyi doğuran faktorların öyrənilməsi, əlilliyin müəyyən edilməsi və ilkin əlilliyin profilaktikası, vətəndaşlara xəstəliyinə görə əmək zəmanətinin verilməsi, hər bir əlilə fərdi reabilitasiya proqramının tərtib edilməsi və digər məsələlər müzakirə edilmişdir.

Qeyd edilmişdir ki, cari ilin mart ayında tibbi-sosial ekspertiza ilə bağlı 200 nəfərdən çox şəxs nazirlikdə qəbul edilmiş, onlara lazımi izahat verilmiş, qanunvericilik daxilində köməklik göstərilmişdir.

Azərbaycan.- 2013.- 6 aprel.- S. 9.