Sumqayıt Təlim-Tədris Mərkəzində buraxılış imtahanları keçirilmişdir

Azərbaycan Dövlət Neft Şirkətinin Sumqayıt Təlim-Tədris Mərkəzində (STTM) gənc mütəxəssis-fəhlələrin ilk buraxılış imtahanı olmuşdur.

"Azərikimya" İstehsalat Birliyinin, ARDNŞ-nin Təlim-Tədris və Sertifikatlaşdırma İdarəsi rəhbərliyinin, həmçinin KİV nümayəndələrinin iştirakı ilə keçirilən imtahan zamanı tornaçı ixtisası üzrə texniki peşə təhsili almış 12 nəfər gənc imtahan komissiyası qarşısında öz nəzəri biliklərini və praktiki bacarıqlarını nümayiş etdirmişlər.

İmtahan başlamazdan əvvəl ARDNŞ-nin Təlim-Tədris və Sertifikatlaşdırma İdarəsinin Sumqayıt Təlim-Tədris Mərkəzinin pedaqoji kollektivi bu cür müasir texniki təlim-tədris ocağının yaradılması, gənclərin yüksək səviyyədə müxtəlif ixtisaslara yiyələnməsi üçün diqqət və qayğı göstərmiş ölkə rəhbərinə minnətdarlıqlarını bildirmişlər. Qeyd edilmişdir ki, ikimərtəbəli tədris korpusuna, ixtisaslaşmış auditoriyalara malik, peşə təhsili üzrə müasir tədris vasitələri və texniki avadanlıqlarla, maşın-mexanizmlər, qurğu və dəzgahlarla təchiz edilmiş STTM-də ötən ilin sentyabrında test imtahanı yolu ilə qəbul olunmuş 100 nəfər gənc müxtəlif peşələr - aparatçı, tornaçı, maşinist, elektrik və qaz qaynaqçısı, nəzarət-ölçü cihazları üzrə yüksək texniki təhsil almaq imkanı əldə etmişdir.

İxtisasdan asılı olaraq hər biri 6 və 10 ay davam edən kurslar zamanı gələcək mütəxəssislər STTM-in ixtisaslaşmış emalatxanaları ilə yanaşı "Azərikimya"nın müəssisələrində də istehsalat təlimi keçirlər.

Tədbirdə iştirak edən "Azərikimya" İB-nin Müşahidə Şurasının sədri, Milli Məclisin deputatı Muxtar Babayev və ARDNŞ-nin Təlim-Tədris və Sertifikatlaşdırma İdarəsinin rəisi Fuad Süleymanov STTM-in rəhbərliyini və gənc tornaçıları ilk buraxılış münasibətilə təbrik etmiş, məzunlara gələcək əmək fəaliyyətlərində uğurlar arzulamışlar.

Akif ƏLİYEV

Azərbaycan.- 2013.- 6 aprel.- S. 11.